رەيحستاگقا تۋ تىگىپ, سوعىستىڭ سوڭعى نۇكتەسىن قويعان ۇلتىمىزدىڭ ۇلىق باتىرى راقىمجان قوشقارباەۆتىڭ ەرەن ەڭبەگىن ەلگە تانىتقان جۋرناليستەردىڭ ءبىرى – جانبولات اۋپباەۆ, دەپ حابارلايدى Egemen.kz.
«ەگەمەن قازاقستان» گازەتىندە باس رەداكتوردىڭ ورىنباسارى قىزمەتىن اتقارىپ جۇرگەن ول 1999 جىلدىڭ 1 قاڭتارىندا راقىمجان قوشقارباەۆقا «حالىق قاھارمانى» اتاعى بەرىلۋ كەرەكتىگى تۋرالى «حالىق الا الماعان قامال» اتتى ماقالا جازادى.
ءجۋرناليستتىڭ كوتەرگەن ماسەلەسى ەل قالاۋىنىڭ ۇدەسىنەن شىعىپ, قوعامدىق پىكىر تۋعىزادى. ءار وڭىردەن ەل ازاماتتارى قولداۋ حاتىن جازىپ, ونى گازەت تۇراقتى تۇردە جاريالاپ وتىردى.
سونىمەن جانبولات اۋپباەۆتىڭ ۇسىنىسى مەن حالىقتىڭ قالاۋىنىڭ ناتيجەسىندە پرەزيدەنت نۇرسۇلتان نازارباەۆتىڭ جارلىعىمەن 1999 جىلى 7 مامىردا راقىمجان قوشقارباەۆقا حالىق قاھارمانى اتاعى بەرىلدى.
وسى ۋاقىت ارالىعىندا جانبولات اۋپباەۆ «ەل تانىدى ءوزىنىڭ حاس باتىرىن» اتتى ءسۇيىنشى ماقالا جازىپ, ودان سوڭ بۇل تاقىرىپتى ارىپتەسى نۇرحان مىڭباي ەكەۋى بىرىگىپ «حالىق العان قامال» دەگەن ماقالامەن تۇيىندەدى.