كوپتىڭ كوزايىمىنا اينالعان وقۋشىلار اراسىنداعى «XXI عاسىر كوشباسشىسى» ينتەللەكتۋالدىق ويىنى تەلەەكراندارعا جاڭا فورماتتا قايتا ورالادى. «حابار» اگەنتتىگى مەن رەسپۋبليكالىق عىلىمي-تاجىريبەلىك «دارىن» ورتالىعى بىرلەسىپ, مەگاجوبانى قايتا جاڭعىرتۋعا كىرىسىپ وتىر. ينتەللەكتۋالدىق ويىن كوكتەمنەن باستاپ «حابار» ارناسىنان كورسەتىلمەك.
اتالعان تەلەجوباعا مادەنيەت جانە اقپارات مينيسترلىگى, وقۋ-اعارتۋ مينيسترلىگى, عىلىم جانە جوعارى ءبىلىم مينيسترلىگى مەن پارلامەنت ءماجىلىسى قولداۋ كورسەتىپ وتىر.
ينتەللەكتۋالدىق ويىن – ەلىمىزدىڭ بولاشاق كوشباسشىلارىن تاربيەلەۋگە باعىتتالعان جاستار قوزعالىسى. قازىرگى ۋاقىتتا جۇزدەگەن دارىندى وقۋشى شاقىرتۋدى قابىلداپ, ويىنعا قاتىسۋعا دايىندالىپ جاتىر. ءار وبلىستاعى ىرىكتەۋ كەزەڭدەرى بىلتىر قازان ايىندا باستالىپ, ناۋرىزعا دەيىن جالعاسادى. وڭىرلەردەن ىرىكتەلگەن ەڭ ۇزدىك بەس وقۋشى ءساۋىر-ماۋسىم ارالىعىندا وتەتىن رەسپۋبليكالىق كەزەڭگە قاتىسا الادى.
ايتا كەتەيىك, جاس دارىنداردىڭ بىلىمدەرى مەن قابىلەتتەرىن حالىققا كورسەتۋگە مۇمكىندىك بەرەتىن تەلەۆيزيالىق جوبا «حابار» اگەنتتىگىنىڭ 30 جىلدىعىنا وراي وتكىزىلىپ وتىر. ەڭ ۇزدىك ءۇش جەڭىمپازعا ەلىمىزدىڭ جوعارى وقۋ ورىندارىندا وقۋعا گرانتتار تابىستالادى.
بۇگىندە پاۆلودار, قاراعاندى, اباي, اقمولا, تۇركىستان, جامبىل, باتىس قازاقستان, شىعىس قازاقستان, ۇلىتاۋ, قىزىلوردا, اتىراۋ جانە ماڭعىستاۋ وبلىستارىنان, سونداي-اق استانا مەن شىمكەنت قالالارىنان رەسپۋبليكالىق تۋرعا قاتىساتىن ۇزدىك بەستىكتەر انىقتالىپ ۇلگەرگەن. الماتى, اقتوبە, جەتىسۋ, سولتۇستىك قازاقستان, قوستاناي وبلىستارىندا جانە الماتى قالاسىندا ىرىكتەۋ كەزەڭدەرى قاڭتار-اقپان ايلارىندا وتەدى.
«XXI عاسىر كوشباسشىسى» – جاس دارىندارعا جاڭا مۇمكىندىكتەر بەرەتىن بىرەگەي الاڭ. ينتەللەكتۋالدىق ويىن ءبىلىمدى ءارى تالانتتى جاستاردى قوعامعا تانىستىرىپ قانا قويماي, شالعاي ەلدى مەكەندەردەن شىققان دارىندى جاسوسپىرىمدەر ءۇشىن تاپتىرماس مۇمكىندىك ەكەنى ءسوزسىز.
ەسكە سالساق, تەلەجوبا العاش رەت 25 جىل بۇرىن ەكرانعا جول تارتقان ەدى. وسى ۋاقىت ىشىندە وتاندىق تەلەۆيزياداعى ۇزدىك جوبالاردىڭ ءبىرى رەتىندە تانىلدى. بۇگىندە بىلىمدىلەر سايىسىنا قاتىسقان كوپتەگەن جاس ءوز جولدارىن تاۋىپ, ءتۇرلى سالالاردا كاسىبي مامانعا اينالدى.