مەملەكەت باسشىسى قاسىم-جومارت توقاەۆ جاڭا جىلدىڭ باسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەسىرتكى, پسيحوتروپتىق زاتتاردىڭ, سول تەكتەستەردىڭ, پرەكۋرسورلاردىڭ جانە كۇشتى اسەر ەتەتىن زاتتاردىڭ زاڭسىز اينالىمىنا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى. بۇل – بۇگىنگى ءومىر تالابىمەن قاتاڭداتىلعان, وتە ۋاقتىلى قابىلدانعان زاڭ جوباسى. ويتكەنى «عاسىر ىندەتىنىڭ» تارالىمى كۇننەن-كۇنگە اسقىنىپ بارادى.
اتالعان زاڭعا دەپۋتاتتار باستاماشى بولعان ەدى. وندا بىرقاتار ماڭىزدى نورما قاراستىرىلعان. سونىڭ ىشىندە ەسىرتكى بيزنەسىن ۇيىمداستىرۋشىلار مەن كۋرەرلەر فۋنكتسيالارىن ورىندايتىن ادامدارعا جازا جەتىلدىرىلگەن. ۇيىمداستىرۋشىلارمەن كۇرەس كۇشەيتىلىپ, باس بوستاندىعىنان ايىرۋ مەرزىمىن ءومىر بويىنا دەيىن ۇزارتۋ جازاسى قاراستىرىلعان. سونداي-اق قىزمەت بابىن پايدالانىپ قىلمىس جاساعان لاۋازىمدى ادامدارعا جانە ەسىرتكى پسيحوتروپتىق زاتتاردى, سول تەكتەستەردى زاڭسىز وندىرگەنى ءۇشىن 15 جىلدان 20 جىلعا دەيىنگى مەرزىمگە باس بوستاندىعىنان ايىرۋ نە ءومىر بويىنا باس بوستاندىعىنان ايىرۋ تۇرىندەگى جازا بەلگىلەۋ قاراستىرىلعان.
ال ەندى ناقتى فاكتىگە توقتالساق, باسقا ايماقتارمەن قاتار كەيىنگى ءبىر-ەكى ايدا عانا سولتۇستىك قازاقستان وبلىسىنىڭ اۋماعىندا دا بىرنەشە ەسىرتكى تاراتۋ قىلمىسى اشكەرەلەندى. بارلىق قىلمىستىڭ ەكىدەن ءبىرى عانا اشكەرەلەنەدى دەسەك, جاستار مەن ۇلكەندەردى ەسىرتكىگە قۇشتار قىلىپ, قانشاما قىلمىس اشىلماي جاتقانىن بولجاۋ قيىن ەمەس.
اشىلعان قىلمىستاردىڭ قاتارىندا جۋىردا پەتروپاۆل قالاسىندا 24 جاستاعى ءبىر كوكشەتاۋلىق جىگىت ۇستالدى. ول پەتروپاۆل قالاسىنداعى ءبىر «ينتەرنەت-دۇكەنگە» قىزمەت ىستەپ, پسيحوتروپتىق زاتتاردى جەتكىزۋمەن اينالىسقان. ونىڭ قۇپيا جەرگە تىققان ەسىرتكى تۇيىنشەكتەرىن ارتىنان «زاكلادچيكتەر» الىپ, تۇتىنۋشىلارعا تاراتقان. ەسىرتكى تاراتۋشى كوسموناۆتوۆ كوشەسىندەگى جالعا العان پاتەرىندە ۇستالدى. ءتىنتۋ بارىسىندا ونىڭ ۇيىنەن 10 تۇيىنشەك «مەفەدرون» جانە «α-PvP» سينتەتيكالىق ەسىرتكىلەرى تابىلعان. بۇل تۇيىنشەكتەردىڭ ارقايسىسىن ارتىنان 25-30 «زيپ-لوك» قالتاشالارعا ءبولىپ, الۋشىعا بەلگىلى قۋىستارعا تىعىپ قويادى. «بارلىق تابىلعان ەسىرتكى كولەمى 437 گرامم بولدى. بۇل سوڭعى ۋاقىتتارداعى ەڭ ۇلكەن كولەم», دەيدى سقو پد باستىعىنىڭ ورىنباسارى اسقار مۇحامەدقاليەۆ. قازىر ۇستالعان ادام قاماۋدا جاتىر, سوت وعان 15 جىلعا دەيىن باس ەركىنەن ايىرۋ جازاسىن بەرۋى مۇمكىن.
ەسىرتكى قىلمىسىن اشۋعا پوليتسيانىڭ باسقا سالالارى دا قولعابىس تيگىزىپ جاتىر. وبلىستاعى اۋدان ورتالىقتارىنىڭ ءبىرى مامليۋتكا قالاسىندا كامەلەتكە تولماعاندار بويىنشا اعا ۋچاسكەلىك ينسپەكتور نۇرلىبەك وسپانوۆ جەرگىلىكتى تۇرعىنداردىڭ ءبىرى كورشىسىنىڭ بالالارى مونشاعا تىعىلىپ, جىلاپ وتىرعانىن ايتقان سوڭ الگى ءۇيدى تەكسەرۋگە بارادى. سويتسە, 42 جاستاعى ءۇي يەسى مەن ايەلىنىڭ ەسىرتكى تۇتىنعان ادامدار ەكەنى سەزىلەدى. ءۇيدى تەكسەرۋ بارىسىندا كىرەبەرىس ۇيىندە 143 گرامم ەسىرتكى جاسىرعانى انىقتالعان. وسى ينسپەكتور تاعى ءبىر جەرگىلىكتى تۇرعىن ايەلدىڭ وزىمەن تۇراتىن ەركەكتىڭ قىلىعىنا شاعىنعانىندا 31 جاستاعى جىگىتتىڭ ناشاقور ەكەنى انىقتالىپ, ونىڭ اۋلاداعى سارايعا ماريحۋانا جاسىرعانىن تابادى. قازىر بۇلاردىڭ ۇستىنەن قىلمىستى ىستەر جۇرگىزىلىپ جاتىر.
19 جاستاعى ستۋدەنت قىز بەن وتىزدان اسقان جىگىت تە ەسىرتكى تاراتۋشىلاردىڭ ءبىر توبىن قۇرعان. ءبىر قىزىعى, تەرگەۋشىلەردىڭ اشكەرەلەگەنىنە قاراعاندا, بۇل توپتىڭ باسشىسى قىز بولعان. ەكەۋىن جىگىتتىڭ «Mercedes» كولىگىندە ۇستاعاندا بويىنان تاراتۋعا ازىرلەنگەن 72 قالتاشا, ال ماشينانى تىنتىگەندە تاعى دا 30 تۇيىنشەك سينتەتيكالىق ەسىرتكى تابىلعان. ستۋدەنت قىزدىڭ تۇراعىن تەكسەرگەندە پوليتسەيلەر 27 گرامم ەسىرتكى تاركىلەدى. ال ەر ادام جۇمىس ىستەگەن كەڭسەدە بۇرىن ىشىندە ۇنتاق ءتارىزدى زات بولعان بوس «زيپ-لوك» قالتاشالارىن تاپتى. كۇدىكتىلەردەن بارلىعى 129 گرامم «مەفەدرون» جانە «α-PvP» پسيحوتروپتىق زاتتار تاركىلەندى.
«قولدا بار اقپاراتقا سايكەس, قىلمىستىڭ باستاماشىسى قىز بولعانى انىقتالدى. قازىرگى ۋاقىتتا كۇدىكتىلەر قاماۋعا الىندى. ەسىرتكىنى وسىنداي اسا ءىرى مولشەردە وتكىزۋگە تالپىنعاندارى ءۇشىن تاراتۋشىلاردى 10 جىلدان 15 جىلعا دەيىن باس بوستاندىعىنان ايىرۋ جازاسى قاراستىرىلعان», دەيدى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى, پوليتسيا پودپولكوۆنيگى رۋسلان ساپاروۆ.
بۇل ەكەۋدىڭ بويىنان 129 گرامم سينتەتيكالىق ەسىرتكى تابىلسا, وتكەن ايدا 28 جاستاعى پەتروپاۆل تۇرعىنىنىڭ ءبىر ءوزىنىڭ بويىنان 190 قالتاشا ەسىرتكى زاتتارى تابىلعان. ءبارى دە – سينتەتيكالىق ەسىرتكى. ءۇيىن تىنتىگەندە ەسىرتكىنى بولۋگە ارنالعان ەلەكتروندى تارازى, «زيپ-لوك» قالتاشالارى, يزولەنتا, الاجاق اقشالارىن تىركەگەن ءتىزىم جانە اقش دوللارى مەن تۇرىك ءليرى ارالاسقان شەتەلدىك ۆاليۋتالار تابىلعان.
«بارلىق تاپقان ەسىرتكىنىڭ كولەمى 205 گرامم بولدى, بۇلاردان جۋىق شامامەن 1 200 ءبىر رەتتىك دوزالار جاساۋعا بولادى. تۇتاس ءبىر مەكتەپتىڭ وقۋشىلارىن وسى دوزامەن ناشاقور قىلىپ جىبەرۋگە بولادى», دەيدى پد باستىعىنىڭ ورىنباسارى اسقار مۇحامەتقاليەۆ.
وتكەن كۇزدە الماتىدان پەتروپاۆلعا 700 گرامم سينتەتيكالىق ەسىرتكى جەتكىزگەن 37 جانە 33 جاستاعى ەكى ايەل ۇستالعان ەدى. ولار ەسىرتكى تاسىمالداۋدى ابدەن كاسىپكە اينالدىرعاندار بولىپ شىقتى. كىشىسىنىڭ كۇيەۋى بۇرىن ەسىرتكىمەن ۇستالىپ, قازىر ءتيىستى جازاسىن دا وتەپ جاتىر. بىراق بۇل وقيعا ەكى ايەلدى دە قىلمىستان تىيماعان. قازىر ەكەۋىنىڭ دە سوتى بولىپ, ۇلكەنى 11, كىشىسى 10 جىلعا باس بوستاندىعىنان ايىرىلدى.
وبلىستىڭ پوليتسەيلەرى ەسىرتكى قىلمىسىنىڭ الدىن الۋ بويىنشا كوپتەگەن شارا جۇرگىزىپ جاتىر. جۋىردا تۇرمەگە قامالعان ناشاقورلار مەن ولاردىڭ اتا-انالارىنىڭ اششى زارى مەن وكىنىشىنەن تۇراتىن دەرەكتى فيلم دە كورسەتىلدى. ءفيلمدى جاساعان بلوگەر زاكىرجان ماۆليۋتوۆ كادرلاردى زونانىڭ ىشىندە, سونداي-اق ەسىرتكىدەن قايتىس بولعانداردىڭ قابىرىنەن ءتۇسىرىپتى. فيلم ستۋدەنتتەر مەن وقۋشىلارعا قاتتى اسەر ەتتى. بۇل – پەتروپاۆلدىق پوليتسەيلەردىڭ ەسىرتكىگە قارسى كۇرەس ماقساتىندا جاساعان ءۇشىنشى ءفيلمى.
مۇنداي شارالاردىڭ ءجيى بولىپ تۇرعانى جاقسى, بىراق ەڭ باستىسى زاڭنىڭ قاتايتىلعانى ەسىرتكىگە قارسى كۇرەستى تيىمدىرەك ەتەرى ءسوزسىز.
سولتۇستىك قازاقستان وبلىسى