مەملەكەت باسشىسى قاسىم-جومارت توقاەۆ بىرىككەن اراب امىرلىكتەرىنە جۇمىس ساپارى اياسىندا «ابۋ ءدابيدىڭ ورنىقتى دامۋ اپتالىعى» سامميتىنە قاتىستى. جيىنعا ورنىقتى دامۋدىڭ جاھاندىق سىن-قاتەرلەرىن تالقىلاۋ ءۇشىن الەم كوشباسشىلارى مەن ساراپشىلار كەلدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى سامميتتە ءبىرىنشى بولىپ ءسوز سويلەدى. قاسىم-جومارت توقاەۆ بۇگىندە الەم كليماتتىڭ وزگەرۋى, قۋاڭشىلىق, بيوالۋانتۇرلىلىكتىڭ جويىلۋى, سۋ تاپشىلىعى جانە ازىق-ت ۇلىك قاۋىپسىزدىگى سەكىلدى اسا وزەكتى پروبلەمالارمەن بەتپە-بەت كەلىپ وتىرعانىن اتاپ ءوتتى. گەوساياسي شيەلەنىس پەن جەتكىزۋ تىزبەگىنىڭ بۇزىلۋىنا بايلانىستى بۇل جاعداي ودان سايىن ۋشىعا ءتۇستى.پرەزيدەنت قازاقستاننىڭ اتالعان تۇيتكىلدەردى ءۇش باستى باعىتقا, اتاپ ايتقاندا, تسيفرلاندىرۋ مەن جاساندى ينتەللەكت, ءىرى ينفراقۇرىلىمدىق جوبالار جانە يادرولىق ەنەرگەتيكا سالالارىنا نەگىزدەلگەن ستراتەگيا ارقىلى شەشۋگە نيەتتى ەكەنىن جەتكىزدى.
«بۇكىل الەم بويىنشا پارنيكتىك گاز شىعارىندىلارىنىڭ 75 پايىزى ەنەرگەتيكالىق جۇيەلەرگە تيەسىلى. بيوالۋانتۇرلىلىكتىڭ 10 پايىزى سونىڭ سالدارىنان جويىلادى. وسى تۇرعىدان العاندا, Masdar, Total, Eni سياقتى حالىقارالىق سەرىكتەستەردىڭ قازاقستاندا جالپى قۋاتى 43 گۆت بولاتىن جاسىل ەنەرگەتيكا جوبالارىن جۇزەگە اسىرۋعا مىندەتتەمە الۋىنىڭ ءمانى زور. ەلىمىزدەگى العاشقى اتوم ەلەكتر ستانتسياسىنىڭ قۇرىلىسى وتاندىق ەنەرگەتيكا سالاسىن ورنىقتى دامىتۋ باعىتىنداعى ەلەۋلى قادام بولماق. بۇل باستاما جالپىۇلتتىق رەفەرەندۋمدا قولداۋ تاپقان. سونىمەن قاتار قازاقستان الەمدىك نارىققا اسا ماڭىزدى شيكىزات تۇرلەرىن جەتكىزۋگە ۇمتىلىپ وتىر. اۋاعا تارايتىن كومىرتەگى مولشەرىن ازايتۋ جونىندەگى جاھاندىق ماقساتتى ورىنداۋ ءۇشىن بۇل ماتەريالدار وتە قاجەت», دەدى قاسىم-جومارت توقاەۆ.