كورنەكتى ابايتانۋشى, مەملەكەتتىك سىيلىقتىڭ لاۋرەاتى, فيلولوگيا عىلىمدارىنىڭ دوكتورى, پروفەسسور مەكەمتاس مىرزاحمەت ۇلى 95-كە قاراعان جاسىندا دۇنيەدەن ءوتتى, دەپ حابارلايدى Egemen.kz.
مەكەمتاس مىرزاحمەت ۇلى 1930 جىلى 9 مامىردا تۇركىستان وبلىسى تۇلكىباس اۋدانىنىڭ (بۇرىن جۋالى اۋدانىمەن قوسىلعان) مايتوبە اۋىلىندا ومىرگە كەلگەن.
عالىم مەكەمتاس مىرزاحمەت ۇلىنىڭ زەرتتەۋ ەڭبەكتەرى اياسىنا ابايتانۋ, مۇحتارتانۋ, باۋىرجانتانۋ, ياساۋيتانۋ, ابايدىڭ اقىندىق زەرتحاناسى, مۇراسىنىڭ رۋحاني قاينار كوزدەرى مەن شىعىسپەن بايلانىسى, ت.ب. كىرەدى.
مەكەمتاس مىرزاحمەت ۇلى – وتباسىنىڭ كەنجەسى. اتا-اناسىنىڭ 12 بالاسى بولعان ەكەن. كوبى اشتىق-جوقتىق جىلدارى ومىردەن وتسە, ەندى ءبىرى سوعىستان ورالماعان. بالالارى جاستاي شەتىنەي بەرگەندىكتەن, اتا-اناسى كەنجەسى «تاستاي قاتتى, بەكەم بولسىن» دەگەن نيەتپەن ەسىمىن مەكەمتاس قويىپتى.
اكەسى مىرزاحمەت 1933 جىلى دۇنيەدەن وتكەن. ءجيى ايتىلىپ, جەلىسى فيلمدەرگە دە ەنگەن ءبىر وقيعا وسى م.مىرزاحمەت ۇلى تاعدىرىنان الىنعان. اشارشىلىق جىلدارى اناسى سەگىز ايلىق قىزى مەن ءتورت جارىم جاسار مەكەمتاستى الىپ, تاماق ىزدەپ, كورشى اۋىلعا قاراي جولعا شىعادى. تاۋ مەن تاستىڭ اراسىنان ءوتىپ, اۋىلعا جاقىنداعان تۇستا اش قاسقىر ۇيىرىنە تاپ بولادى. سوندا اناسى شاراسىز قىزىن قاسقىرلارعا قالدىرىپ, ۇلىن امان الىپ قالادى...
عالىم ۇزاق ۋاقىت بويى عىلىم اكادەمياسىندا, ەلىمىزدىڭ جوعارى وقۋ ورىندارىندا قىزمەت ەتتى. 30-دان اسا مونوگرافيا, زەرتتەۋ جوبالارىن جاريالاپ, ادەبيەت تاريحىن زەرتتەۋشىلەردىڭ بىرنەشە بۋىنىن دايارلادى. ابايدىڭ اكادەميالىق, ەلەكتروندىق ەلەۋلى جيناعىنىڭ باس رەداكتورى.