سۋ رەسۋرستارى جانە يرريگاتسيا مينيسترلىگى 6 وبلىس اكىمدىگىمەن بىرلەسىپ, ەلدى مەكەندەردى كوكتەمگى سۋ تاسقىنىنان قورعاۋ ماقساتىندا 56 جوبانى ىسكە اسىرىپ جاتىر, دەپ حابارلايدى Egemen.kz.
اقمولا, اقتوبە, باتىس قازاقستان, پاۆلودار, سولتۇستىك قازاقستان, قوستاناي وبلىستارىندا 580 مىڭ تۇرعىنى بار 84 ەلدى مەكەننىڭ قاۋىپسىزدىگىن قامتاماسىز ەتۋ جوسپارلانىپ وتىر. جوبالار شەڭبەرىندە جالپى ۇزىندىعى 310 شاقىرىم بوگەت سالۋ قاراستىرىلعان. بۇگىندە جۇمىستاردىڭ شامامەن 40%-ى ورىندالعان.
«وسىعان دەيىن مينيسترلىكتىڭ باسسەيندىك ينسپەكتسيالارى تجم جانە اكىمدىكتەرمەن بىرلەسىپ ەلىمىز بويىنشا 1502 گيدروتەحنيكالىق قۇرىلىسقا زەرتتەۋ جۇرگىزدى. تەكسەرىس قورىتىندىسى بويىنشا گيدروتەحنيكالىق قۇرىلىستاردىڭ يەلەرىنە انىقتالعان كەمشىلىكتەردى جويۋ بويىنشا ۇسىنىستار بەرىلدى. كوكتەمگى سۋ تاسقىنىن قابىلداۋ ءۇشىن بوس سىيىمدىلىقتاردى قامتاماسىز ەتۋ ماقساتىندا ەلىمىزدىڭ سولتۇستىگى, باتىس, شىعىس, ورتالىق ايماقتارىنداعى سۋ قويمالارىنان سۋ جىبەرۋ جۇمىسى جالعاسىپ جاتىر», دەدى ۆيتسە-ءمينيسترى ەربولات يبرايحانوۆ.