بۇگىن ۇكىمەت وتىرىسىندا ەنەرگەتيكا مينيسترى الماسادام ساتقاليەۆ اەس قۇرىلىسىن قولداۋ ماقساتىندا وتاندىق كوللەدجدەر بازاسىندا اشىلاتىن جاڭا ماماندىقتاردى اتادى, دەپ جازادى Egemen.kz.
ءمينيستردىڭ ايتۋىنشا, ەلىمىزدەگى كوللەدجدەردە دوزيمەتريست, گازتۋربينا سلەسارى, اەس جابدىقتاردى جوندەۋ مامانى, اقپاراتتىق تەحنولوگيالار سالاسىنداعى مامانداردى وقىتۋ باستالادى.
قازاقستاندا اەس سالۋ جوباسى بويىنشا 2030 جىلعا قاراي 5 مىڭعا جۋىق ادام, ال 2032 جىلى قۇرىلىستىڭ شارىقتاۋ كەزەڭىندە 10 مىڭعا جۋىق مامان جۇمىس ورىندارىمەن قامتاماسىز ەتىلمەك.
«اەس-ءتى پايدالانۋ كەزەڭىندە جوبا كەمىندە 2 مىڭ ادامدى جۇمىس ورىندارىمەن قامتاماسىز ەتەدى. جاڭا جوبالاردان باسقا, قازىر جۇمىس ىستەپ تۇرعان وەك كاسىپورىندارىندا 2025-2029 جىلدار كەزەڭىندە كادرلارعا جالپى قاجەتتىلىك قوسىمشا 16 مىڭعا جۋىق جۇمىس ورنىن قۇرايدى», دەدى الماسادام ساتقاليەۆ.
بيىل ەنەرگەتيكا سالاسىندا جاڭا ماماندىقتار بويىنشا 4 كاسىبي ستاندارت ازىرلەنەدى. اتوم سالاسىندا 29 كاسىبي ستاندارت جاڭارتىلماق.
ەنەرگەتيكا ءۇشىن كادر دايارلاۋدى 40 جوعارى وقۋ ورنى مەن 215 كوللەدج جۇزەگە اسىرادى. وندا ەلەكتر ەنەرگەتيكاسى, جىلۋ ەنەرگەتيكاسى, جاڭارتىلاتىن ەنەرگيا سالاسىنداعى 7 ماماندىق بويىنشا 19 مىڭعا جۋىق ستۋدەنت وقيدى.
«ەلەكتر گەنەراتسياسى جاڭا نىساندارىنىڭ قۇرىلىسىن, تۇتىنۋدىڭ بەلسەندى ءوسۋىن جانە ەكونوميكانىڭ دامۋىن ەسكەرە وتىرىپ, 2030 جىلعا دەيىن سۇرانىسقا يە ماماندىقتاردىڭ تەك ەنەرگەتيكاعا دەگەن قاجەتتىلىگى 20 مىڭنان اسادى دەپ بولجانىپ وتىر. اەس قۇرىلىسىن قولداۋ ماقساتىندا وتاندىق كوللەدجدەر بازاسىندا اەس ءۇشىن پەرسونال دايارلاۋ ءىسى قولعا الىنادى», دەدى ەنەرگەتيكا ءمينيسترى.