مەملەكەت باسشىسىنىڭ جارلىعىمەن توتەنشە جاعداي كەزىندە شەشۋشى ارەكەتكە بارعانى ءۇشىن قورعانىس مينيسترلىگى 30153 اسكەري ءبولىمىنىڭ الىس راديوماركەر پۋنكتى بولىمشەسىنىڭ باستىعى نۇرلان بوتاعارين راحىمجان قوشقارباەۆ اتىنداعى III دارەجەلى «ايبىن» وردەنىمەن ماراپاتتالدى.
اقتاۋدا كىشى سەرجانت نۇرلان بوتاعارينگە ماڭعىستاۋ وبلىسىنىڭ اكىمى نۇرداۋلەت قيلىباي لايىقتى ماراپاتىن سالتاناتتى تۇردە تابىس ەتتى.
ءسوز كەزەگى نۇرلان بوتاعارينگە كەلگەندە, ول ۇشاق اپاتىنان قازا تاپقان ادامداردىڭ تۋعان-تۋىستارىنا كوڭىل ايتتى. ماراپاتقا العىسىن بىلدىرگەن اسكەري قىزمەتشى ءوزىن باتىرمىن دەپ سانامايتىنىن العا تارتتى.
«مەنىڭ ورنىمدا كەز كەلگەن ادام وسىلاي ارەكەت ەتەر ەدى. سول ساتتە مەنىڭ ويىمدا ءومىر مەن ءولىمنىڭ اراسىندا قالعان جانداردى اراشالاپ الىپ قالۋ عانا بولدى», دەدى ول.
فوتوعا ءتۇسىپ قالعان اسكەري ادامنىڭ كەسكىنى – اقتاۋ ماڭىنا ازەربايجاندىق اzal اۆياكومپانياسىنىڭ ۇشاعى قۇلاعان جەردە كىشى سەرجانت نۇرلان بوتاعاريننىڭ بولعانىنىڭ دالەلى.
اپاتقا ۇشىراعان ۇشاق جولاۋشىلارىن قۇتقارعانى تۋرالى قورعانىس مينيسترلىگى 30153 اسكەري ءبولىمىنىڭ الىس راديوماركەر پۋنكتى بولىمشەسىنىڭ باستىعى كىشى سەرجانت نۇرلان بوتاعارين ءۇنسىز قالۋدى ءجون كوردى.
دەگەنمەن باق-تا جاريالانعان سۋرەتتەردە جاۋىنگەردى سايىن شاپاعاتوۆ اۋىلىنىڭ تۇرعىندارى تانىدى. بىرتە-بىرتە وقيعا ورنىندا العاشقى بولىپ جەتكەن ادام قر اسكەري-اۋە كۇشتەرى اۆياتسيالىق بازاسىنىڭ اسكەري قىزمەتشىسى كىشى سەرجانت نۇرلان بوتاعارين ەكەنى بەلگىلى بولدى.
كولىكپەن ءبىر شاقىرىم قاشىقتىقتى ءجۇرىپ ءوتىپ, ول اۋە كەمەسى اپاتقا ۇشىراعاننان ساتتە بىردەن وقيعا ورنىنا جەتەدى.
قايعىلى جاعداي ورىن العان كۇنىن ەسكە قايتا ءتۇسىرۋ قيىن. ونىڭ ەسىندە دالادا اق كۇرتەشە كيگەن قىزدىڭ بەينەسى قالىپ قويعان. وسى كەزدە ول بىردەن امان قالعاندار بار-اۋ دەپ ويلايدى. قىزدىڭ امان-ساۋ ەكەنىنە كوز جەتكىزگەن سوڭ ونى جاقىنداپ كەلە جاتقان كولىكتەرگە جىبەرەدى دە نۇرلان بوتاعارين قيراعان اۋە كەمەسىنىڭ ەكىنشى بولىگىنە قاراي جۇگىرەدى. توڭكەرىلگەن اۆيالاينەردىڭ كورپۋسىنا كوتەرىلىپ, ول ىشكە كىرەدى.
كورگەندى سوزبەن جەتكىزۋ قيىن ارينە, اۋىر جاراقاتتارى بار, اشىق سىنىقتارى بار ادامدار ىڭىرسىپ, ەسەڭگىرەپ جاتتى.
ءبىرىنشى ساتتە نۇرلان بوتاعارين ولارعا زيان كەلتىرمەي قالاي كومەكتەسۋگە بولاتىنىن ويلادىم دەيدى. الايدا بىرتە-بىرتە زارداپ شەككەندەردى شىعارىپ الىپ, ولاردى ماڭعىستاۋ ەلەكتر جەلىلىك كومپانياسىنىڭ قىزمەتكەرلەرىنە بەرە باستادى. وسىلايشا ول سالوننان ون شاقتى جولاۋشىنى شىعارادى.