ەلىمىزدە مەرزىمىنەن بۇرىن پارلامەنت سايلاۋىن وتكىزۋ تۋرالى پىكىرلەر ايتىلا باستادى. پرەزيدەنت قاسىم-جومارت توقاەۆ وسىعان قاتىستى ويىن «انا ءتىلى» گازەتىنە بەرگەن سۇحباتىندا ورتاعا سالدى, دەپ جازادى Egemen.kz.
مەملەكەت باسشىسى مۇنداي بولجامدار ەل اراسىندا ايتىلىپ جۇرگەنىنەن حاباردار ەكەنىن ايتتى.
«بۇل اقپارات ادەيى تاراتىلىپ جاتىر دەپ ويلايمىن. ءبىزدىڭ ەلدە جاڭا ۇكىمەت جۇمىسىنا كىرىسكەن بەتتە ونىڭ وتستاۆكاعا كەتەتىنى تۋرالى اڭگىمە تارايدى. پارلامەنت تۋرالى دا ءدال سولاي دەۋگە بولادى. مەن پارلامەنت دەپۋتاتتارى ازاماتتىق جانە ساياسي جاۋاپكەرشىلىك تانىتىپ, جاقسى جۇمىس ىستەپ جاتىر دەپ ويلايمىن. ال ۇكىمەت – اۋىس-تۇيىسكە بەيىم قۇرىلىم. ونىڭ قۇرامىندا ءتۇرلى جاعدايعا, ونىڭ ىشىندە «Amanat» پارتياسىنىڭ جانە پارلامەنتتەگى باسقا دا پارتيالاردىڭ ۇستانىمىنا بايلانىستى وزگەرىستەر بولۋى مۇمكىن», دەدى قاسىم-جومارت توقاەۆ.
قاسىم-جومارت كەمەل ۇلى پارلامەنت سايلاۋىن مەرزىمىنەن بۇرىن وتكىزۋگە ازىرگە ەش نەگىز جوق ەكەنىن دە ەرەكشە اتاپ ءوتتى.
«سايلاۋ زاڭدا بەلگىلەنگەن مەرزىمدەرگە سايكەس وتەدى. پارلامەنت وزىنە تيەسىلى مەرزىم اياسىندا قىزمەتىن اتقارۋعا ق ۇلىقتى. ال ۇكىمەت بەكىتىلگەن باعدارلامالار مەن جوسپارلارعا سايكەس ارەكەت ەتىپ, وڭ ناتيجەگە جەتۋ ءۇشىن جۇمىس ىستەپ جاتىر. ستراتەگيالىق مىندەت – تۇراقتى الەۋمەتتىك-ەكونوميكالىق دامۋدى قامتاماسىز ەتۋ, ەلىمىزدىڭ وڭىردەگى كوشباسشى مارتەبەسىن نىعايتۋ», دەدى پرەزيدەنت.