مەملەكەت باسشىسى «انا ءتىلى» گازەتىنە بەرگەن سۇحباتىندا ءجۋرناليستىڭ «الەۋمەتتىك جەلىدە ءسىز 2026 جىلى بىرىككەن ۇلتتار ۇيىمىن باسقارۋىڭىز مۇمكىن, سوعان بايلانىستى ەلىمىزدە كەزەكتەن تىس پرەزيدەنت سايلاۋى وتەدى دەگەن قاۋەسەت تاراپ جاتىر. وسى قاۋەسەتتىڭ نەگىزى بار ما؟» دەگەن ساۋالىنا جاۋاپ بەردى, دەپ حابارلايدى Egemen.kz.
پرەزيدەنت ءوزىنىڭ ەلىمىزدى دامىتۋعا قاتىستى تالاي جىلعا ارنالعان اۋقىمدى جوسپارى بارىن, ونىڭ ءبارىن جۇزەگە اسىرۋعا نيەتتى ەكەنىن ايتتى.
«مەن بىرىككەن ۇلتتار ۇيىمى باس حاتشىسىنىڭ ورىنباسارى جانە قارۋسىزدانۋ جونىندەگى كونفەرەنتسيانىڭ باس حاتشىسى رەتىندە وسى ۇيىمنىڭ جەنەۆاداعى كەڭسەسىن ءۇش جىلعا جۋىق باسقاردىم. حالىقارالىق ۇدەرىستەردىڭ قىر-سىرىنا بويلاپ, مول تاجىريبە جينادىم. وسىنىڭ ءوزى ارتىعىمەن جەتەدى دەپ ويلايمىن», دەدى مەملەكەت باسشىسى.