مەملەكەت باسشىسى قاسىم-جومارت توقاەۆ «انا ءتىلى» گازەتىنە بەرگەن سۇحباتىندا قازاق ءتىلىنىڭ باسەكەگە قابىلەتى جانە ونى ۇيرەنۋگە دەگەن قىزىعۋشىلىق بارىنشا ارتىپ كەلەتىنىن ايتتى, دەپ جازادى Egemen.kz.
پرەزيدەنتتىڭ پىكىرىنشە, ەڭ باستىسى, قازاق ءتىلىن ءبىلۋ سانگە اينالىپ, جاستارىمىز ونى مەڭگەرۋگە ۇمتىلاتىن بولعان.
«مەملەكەتتىك ءتىل ازاماتتاردىڭ قىزمەت بابىندا وسۋىنە جانە تابىسقا جەتۋىنە جول اشاتىن ماڭىزدى فاكتور سانالادى. ەلىمىزدىڭ بيزنەس وكىلدەرى ماركەتينگ سالاسىنداعى ناۋقاندارىن قازاق تىلىندە سويلەيتىن تۇتىنۋشىلاردىڭ سۇرانىسىنا قاراي وتكىزەتىن بولدى. مۇنىڭ ءبارى مەملەكەتتىڭ وتە اباي بولۋدى قاجەت ەتەتىن ءارى ساياسي تۇرعىدان ماڭىزدى سانالاتىن وسى سالاداعى ساياساتى ءتيىمدى جۇرگىزىلىپ جاتقانىن كورسەتەدى», دەدى مەملەكەت باسشىسى.
ايتا كەتەيىك, دۇنيە جۇزىندە 7 مىڭنان استام ءتىل بار. سونىڭ ىشىندە ءۇش مىڭنان استام تىلگە جويىلىپ كەتۋ قاۋپى ءتونىپ تۇر. قازاق ءتىلى بۇل توپقا كىرمەيدى. انا ءتىلىمىز 2024 جىلى الەمدە ەڭ كەڭ تارالعان تىلدەردىڭ اراسىندا 79-شى ورىنعا تۇراقتادى.
وسى رەتتە قاسىم-جومارت توقاەۆ كۇردەلى ءارى قاراما-قايشىلىققا تولى كەڭەس زامانىندا انا ءتىلىمىزدى الەمدىك لينگۆيستيكا كارتاسىنان جويىلىپ كەتۋدەن ساقتاپ قالعان زيالى قاۋىم وكىلدەرىنىڭ, اقىن-جازۋشىلاردىڭ, جۋرناليستەر مەن عالىمداردىڭ, مۇعالىمدەر مەن مادەنيەت قايراتكەرلەرىنىڭ, اۋىل ەڭبەككەرلەرىنىڭ, ياعني بارشا وتانشىل ازاماتتاردىڭ ەڭبەگىن باعالاۋىمىز كەرەك ەكەنىن تىلگە تيەك ەتتى.
«بۇدان دا جوعارى ناتيجەگە قول جەتكىزۋ ءۇشىن عىلىم-ءبىلىم سالاسىنداعى ينفراقۇرىلىمدى جاڭعىرتۋعا, مەكتەپتەر مەن باسقا دا وقۋ ورىندارىندا قازاق ءتىلىن ۇيرەتۋ جۇيەسىن جەتىلدىرۋگە قوسا وقىتۋشىلاردىڭ مارتەبەسىن ارتتىرۋ ماسەلەسىن دە شەشۋ قاجەت. 2023 جىلى «قازاق ءتىلى» قوعامىنىڭ باستاماسىمەن قۇرىلعان ارناۋلى قورعا قولداۋ كورسەتۋ كەرەك. تسيفرلىق تەحنولوگيالاردى قولدانۋعا باسا ءمان بەرگەن ءجون. ويتكەنى قازاق ءتىلىنىڭ الداعى تاعدىرى, ەلىمىزدىڭ جاھاندىق باسەكەگە قابىلەتى كوبىنە وسىعان بايلانىستى بولادى», دەدى پرەزيدەنت.
اڭگىمە بارىسىندا مەملەكەت باسشىسى شىعارماشىل جاستار جانە كرەاتيۆتى يندۋستريا مەملەكەتتىك ءتىلدى دامىتۋ ىسىنە پايداسىن تيگىزە الاتىنىنا توقتالدى.
«مەملەكەت ەكونوميكاداعى بولاشاعى زور وسى سالانىڭ وركەندەۋىنە بارىنشا قولداۋ كورسەتەدى. وتاندىق جانە الەمدىك نارىقتا قارجىلىق جاعىنان ءتيىمدى ءارى سۇرانىسقا يە بولاتىن ءتۇرلى كونتەنتتى قازاق تىلىندە جاساۋ قاجەت. بۇل جەردە ادەبيەت, مۋزىكا, كينو, سەريال جانە كومپيۋتەر ويىندارى تۋرالى ايتىپ وتىرمىن.
انا ءتىلىمىزدىڭ بولاشاعى جارقىن ەكەنىنە مەنىڭ ەش كۇمانىم جوق. قازاق ءتىلى مەملەكەتتىك ءتىل رەتىندە حالقىمىزدى ۇيىستىرۋ جولىندا ماڭىزدى ءرول اتقارا بەرەدى. بىراق ءتىلىمىزدىڭ تۇعىرىن نىعايتامىز دەپ, ونى باسقا تىلدەرگە, سونىڭ ىشىندە ورىس تىلىنە قارسى قويماۋ كەرەك», دەدى قاسىم-جومارت توقاەۆ.