ماقالاعا ارقاۋ بولعان سپورتشىلار – ءار جىلدارى حالقىمىزدىڭ مەرەيىن ءوسىرىپ, مارتەبەسىن كوتەرگەن جامپوزدار. ءبىز ولاردىڭ بوزبالا كەزىندەگى تۇساۋكەستى ءىرى جەڭىستەرى مەن باستى جەتىستىكتەرىن ءتىزىپ قانا قويماي, سپورت الامانىنداعى ەرەكشە كوڭىل اۋدارۋعا تۇراتىن كەيبىر قالتارىس تۇستارىن دا قامتۋعا تىرىستىق.
ساڭلاقتار ستاتيستيكاسى
ءابدىسالان نۇرماحانوۆ, بوكس (19.04.1936) – بوكسپەن 17 جاسىنان شۇعىلدانا باستادى. 1957 جىلى 21 جاسىندا كەڭەس وداعى چەمپيوناتىنىڭ كۇمىس جۇلدەگەرى, 1963 جىلى 27 جاسىندا 48 ەل قاتىسقان گانەفو ويىندارىنىڭ جەڭىمپازى. ءامين تۇياقوۆ, جەڭىل اتلەتيكا (12.02.1937) – جۇگىرۋمەن 17 جاسىنان شۇعىلدانا باستادى. 22 جاسىندا 100, 200, 400 مەتردە قازاقستان سپارتاكياداسىنىڭ جەڭىمپازى, 1962 جىلى 100 مەتردە 10,2 سەكۋند ناتيجەمەن كسرو رەكوردىن قايتالادى. 1965 جىلى 28 جاسىندا 200 مەتردە 20,6 سەكۋندپەن كەڭەس وداعىنىڭ رەكوردشىسى. 1967 جىلى 30 جاسىندا 200 مەتردە كسرو حالىقتارى سپارتاكياداسىنىڭ چەمپيونى. ءالجان جارمۇحامەدوۆ, باسكەتبول (02.10. 1944) – باسكەتبولعا 19 جاسىندا باردى. 1967 جىلى 23 جاسىندا كسرو قۇراماسى ساپىندا ەۋروپا چەمپيونى, 1972 جىلى قىركۇيەكتە 28 جاسىندا وليمپيادا چەمپيونى. ءشامىل سەرىكوۆ, گرەك-ريم كۇرەسى (5.03.1956) – 1973 جىلى 17 جاسىندا كسرو ينتەرناتتار بىرىنشىلىگىنىڭ جەڭىمپازى. 1978 جىلى 22 جاسىندا الەم چەمپيونى, 1979 جىلى ەكىنشى رەت دۇنيەجۇزىنىڭ چەمپيونى. 1980 جىلى وليمپيادا جەڭىمپازى. جاقسىلىق ۇشكەمپىروۆ, گرەك-ريم كۇرەسى (06.05.1951) – كۇرەسكە 18 جاسىندا دەن قويدى. 1973 جىلى 22 جاسىندا كسرو چەمپيوناتىنىڭ قولا مەداليسى, 1975 جىلى 24 جاسىندا كسرو حالىقتارى سپارتاكياداسىنىڭ جەڭىمپازى, 1980 جىلى 29 جاسىندا ماسكەۋ وليمپياداسىنىڭ چەمپيونى, 1981 جىلى الەم چەمپيونى. سەرىك قوناقباەۆ, بوكس (25.10. 1959) – 16-17 جاسىندا كسرو جاسوسپىرىمدەر كومانداسى ساپىندا پولشاداعى «التىن بەلبەۋ» ءىرى ءتۋرنيرىنىڭ ەكى دۇركىن جەڭىمپازى. 1979 جىلى كوكتەمدە 19 جاسىندا ەۋروپا چەمپيونى, 1980 جىلى جازدا 20 جاسىندا وليمپيادا ويىندارىنىڭ كۇمىس جۇلدەگەرى, 1982 جىلى كوكتەمدە 22 جاسىندا الەم چەمپيوناتىنىڭ كۇمىس مەداليسى. داۋلەت تۇرلىقانوۆ, گرەك-ريم كۇرەسى (18.11.1963) – 1980–1981 جىلدارى 16-17 جاسىندا كەڭەس وداعىنىڭ ينتەرناتتار بىرىنشىلىگىنىڭ 2 مارتە چەمپيونى. 1986 جىلدىڭ قىسىندا 22 جاسىندا كسرو چەمپيونى, 1988 جىلعى قىركۇيەكتە 24 جاسىندا وليمپيادا ويىندارىنىڭ كۇمىس مەداليسى, 1989 جىلى جازدا الەم چەمپيونى. نۇرلان مەڭدىعاليەۆ, سۋ دوبى (5.4.1961) – 1980 جىلى 19 جاسىندا جاستار اراسىنداعى ەۋروپا چەمپيوناتىنىڭ كۇمىس مەداليسى, كسرو ەرەسەكتەر چەمپيوناتىنىڭ قولا جۇلدەگەرى, 1981 جىلى 20 جاسىندا كسرو قۇراماسى ساپىندا الەم كۋبوگىنىڭ جەڭىمپازى, 1982 جىلى 21 جاسىندا الەم چەمپيونى, 1988 جىلى وليمپيادا ويىندارىنىڭ قولا جۇلدەگەرى. قانات بايشولاقوۆ, سامبو (20.06.1961) – 1980 جىلى 19 جاسىندا كەڭەس وداعىنىڭ ەرەسەكتەر چەمپيوناتىنىڭ قولا جۇلدەگەرى, 1981 جىلى 20 جاسىندا جاستار اراسىندا الەم چەمپيونى, 1984 جىلى ەرەسەكتەر اراسىندا الەم چەمپيونى. مارات ساتىبالديەۆ, ۆەلوسپورت (22.04.1962) – ءجاسوسپىرىم كەزىندە حالىقارالىق دەڭگەيدە ناتيجە كورسەتكەن جوق. 1985 جىلى 23 جاسىندا العاش رەت كسرو چەمپيونى, 1989 جىلى جازدا 27 جاسىندا الەم چەمپيونى. الماس مۇسابەكوۆ, سامبو (6.12.1958) – 1977 جىلى قىستا 18 جاسىندا كەڭەس وداعىنىڭ ەرەسەكتەر چەمپيوناتىنىڭ كۇمىس مەداليسى, 1984 جىلى 25 جاسىندا الەم كۋبوگىنىڭ جەڭىمپازى. ايتجان شاڭعاراەۆ, سامبو (22.01. 1963) – 13 جاسىندا سامبوعا دەن قويعان ايتجان 1981 جىلى قىستا 18 جاسىندا ەرەسەكتەر اراسىندا كسرو چەمپيونى بولدى. مۇنداي بەلەسكە اسا دارىندى سپورتشى عانا جەتەدى. 1984 جىلى 21 جاسىندا الەم كۋبوگىنىڭ جەڭىمپازى, ەۋروپا چەمپيونى. سەرىك نۇرقازوۆ, بوكس (4.10. 1959) – 1979 جىلعى جازدا 19 جاسىندا كسرو حالىقتارى سپارتاكياداسىنىڭ كۇمىس جۇلدەگەرى, 1983 جىلى كوكتەمدە 23 جاسىندا ەۋروپا چەمپيونى. اسىلبەك قيلىموۆ, بوكس (26.04. 1964) – 1979–1982 جىلدارى كسرو-نىڭ جاسوسپىرىمدەر, جاستار بىرىنشىلىكتەرىنىڭ قاتارىنان 5 مارتە جەڭىمپازى. 1981 جىلى 17 جاسىندا كەڭەس وداعى ەرەسەكتەر قۇراماسى ساپىندا 2 بىردەي ءىرى حالىقارالىق ءتۋرنيردىڭ جەڭىمپازى. 1984 جىلعى ناۋرىزدىڭ باسىندا 19 جاسىندا كسرو چەمپيونى, كەڭەس وداعى وليمپيالىق قۇراماسىنىڭ مۇشەسى. كارىمجان ءابدىراحمانوۆ, بوكس (11.05.1964) – 1980–1981 جىلدارى كسرو جاسوسپىرىمدەر بىرىنشىلىگىنىڭ قولا جۇلدەگەرى, 1983 جىلى 19 جاسىندا كەڭەس وداعى ەرەسەكتەر چەمپيوناتىنىڭ قولا مەداليسى, 1984 جىلعى ناۋرىزدىڭ باسىندا 19 جاسىندا كسرو چەمپيونى, كەڭەس وداعىنىڭ وليمپيالىق قۇراماسىنىڭ مۇشەسى. امانگەلدى جاپاروۆ, ەركىن كۇرەس (03.05.1964) – 1981 جىلى كسرو وقۋشىلار سپارتاكياداسىنىڭ جەڭىمپازى, 1983 جىلى 19 جاسىندا قازاقتىڭ ەركىن كۇرەس بالۋاندارىنان ءبىرىنشى بولىپ جاستار اراسىندا الەم چەمپيونى اتاندى. 1983 جىلى كسرو ەرەسەكتەر قۇراماسىنا ەندى. سەرىك الشىنباەۆ, ەركىن كۇرەس (21.12.1964) – 1982 جىلى 17 جاسىندا قازاقتىڭ ەركىن كۇرەس بالۋاندارىنان ءبىرىنشى بولىپ جاسوسپىرىمدەر اراسىندا الەم چەمپيونى اتاندى. 1986 جىلعى جازدا 21 جاسىندا كسرو حالىقتارى سپارتاكياداسىنىڭ كۇمىس مەدالىنە يە بولىپ, كەڭەس وداعى قۇراماسىنا ەندى. دەنساۋلىعى سىر بەرىپ, بيىك بەلەستەرگە جەتە المادى. بولات تەمىروۆ, بوكس (9.06.1969) – 1991 جىلعى اقپاننىڭ باسىندا 21 جاسىندا كسرو چەمپيونى; 1991 جىلى 22 جاسىندا كسرو حالىقتارى سپارتاكياداسىنىڭ جەڭىمپازى. ماۋلەن مامىروۆ, ەركىن كۇرەس (14.12.1970) – 1988 جىلى 17 جاسىندا الەمنىڭ جاستار بىرىنشىلىگىنىڭ قولا مەداليسى, كسرو چەمپيونى, 1990 جىلى 19 جاسىندا ەرەسەكتەر اراسىنداعى كەڭەس وداعى كۋبوگىنىڭ جەڭىمپازى, 1991 جىلعى جازدا 20 جاسىندا كسرو حالىقتارى سپارتاكياداسىنىڭ كۇمىس مەداليسى. 1996 جىلى جازدا 25 جاسىندا اتلانتا وليمپياداسىنىڭ قولا جۇلدەگەرى. باقتيار بايسەيىتوۆ, گرەك-ريم كۇرەسى (29.09.1971) – 1986 جىلى جازدا 14 جاسىندا كسرو جاسوسپىرىمدەر بىرىنشىلىگىنىڭ قولا مەداليسى, 1989 جىلى 17 جاسىندا ەرەسەكتەر اراسىنداعى ەلىمىزدىڭ چەمپيونى. 1991 جىلعى جازدا 19 جاسىندا كسرو حالىقتارى سپارتاكياداسىنىڭ كۇمىس جۇلدەگەرى, 1998 جىلى جازدا 26 جاسىندا الەم چەمپيونى. ەسەنگەلدى باتىرعارين, گرەك-ريم كۇرەسى (20.12.1970) – 1991 جىلى 20 جاسىندا كسرو حالىقتارى سپارتاكياداسىنىڭ جەڭىمپازى, الەمنىڭ جاستار چەمپيوناتىنىڭ كۇمىس مەداليسى.
الۋان-الۋان جۇيرىك بار, الىنە قاراي شاباتىن
ءابدىسالان نۇرماحانوۆ 17 جاسىندا, ءامين تۇياقوۆ پەن جاقسىلىق ۇشكەمپىروۆ 18 جاسىندا, ءالجان جارمۇحامەدوۆ 19-ىندا سپورتقا شىنداپ دەن قويدى. تورتەۋى دە اراعا 4-5 جىل سالىپ, العاشقى ءىرى جەڭىستەرىنە قول جەتكىزدى. بۇدان تۇيەتىنىمىز: دەنساۋلىعى مىقتى, ىشكەن-جەگەنى تابيعي تازا, تالابى كۇشتى, ەڭبەكقور, تاباندى سپورتشى بىلىكتى باپكەردىڭ باپتاۋىمەن 4-5 جىلدا ەل چەمپيوناتىندا نەمەسە قۇرلىق بىرىنشىلىگىندە توپ جارادى ەكەن. بالا كەزدەرىندە زورىقپاعان, قالىپتان تىس جانىقپاعان 4 ساڭلاق جاسى 30-دان اسقانشا ءدۇبىرلى سايىستاردا ولجا سالدى: ءالجان جارمۇحامەدوۆ 32 جاسىندا وليمپيادانىڭ قولا, 34 جاسىندا الەم چەمپيوناتىنىڭ كۇمىس جۇلدەگەرى, 35 جاسىندا ەۋروپا چەمپيونى; جاقسىلىق ۇشكەمپىروۆ 30 جاسىندا الەم چەمپيونى, 31 جاسىندا الەم كۋبوگىنىڭ جۇلدەگەرى; ءابدىسالان نۇرماحانوۆ 31 جاسىندا كسرو حالىقتارى سپارتاكياداسىنىڭ قولا مەداليسى; ءامين تۇياقوۆ 1965 جىلى ەۋروپا كۋبوگىنىڭ جەڭىمپازى, 1966 جىلى 29 جاسىندا كسرو چەمپيونى, ەۋروپا چەمپيوناتىنىڭ كۇمىس مەداليسى, 1967 جىلى 30 جاسىندا كسرو حالىقتارى سپارتاكياداسىنىڭ جەڭىمپازى.
وسى جەردە ءامين اعامىزعا تاريحي باعاسىن بەرە كەتەيىك. 1960 جىلى كانادالىق گارري جەروم 100 مەترگە جارىستا 10.0 سەكۋندپەن الەم رەكوردىن جاڭعىرتسا, ءامين تۇياقوۆ 1962 جىلى 10,2 سەكۋند ناتيجەمەن كسرو رەكوردىن قايتالادى. ايىرماشىلىعى – قاس-قاعىم عانا. جەرومنىڭ بويى 180 سم, ۇزىن سيراق, ادىمى ۇزىن, تۇياقوۆ 173 سم, ورتا بويلى عانا, ادىمى قىسقا. ال اقش جەلاياعى گەنري ۋيليام كارردىڭ بويى 191 سم. ول 1963 جىلى 200 مەتردى 20,4 سەكۋندتا قۇيعىتىپ ءوتىپ, الەم رەكوردشىسى اتانسا, ءامين تۇياقوۆ 1965 جىلى 20,6 سەكۋندپەن كسرو رەكوردشىسى اتاندى. ايىرماشىلىعى – كىرپىك قاعىپ ۇلگەرمەيسىڭ. 1964 جىلى توكيو وليمپياداسىندا 100 مەتردى كۇمىس, قولا جۇلدەگەرلەر 10,2 سەكۋندتا جۇگىرىپ وتسە, توكيودا 200 مەتردە قولا جۇلدەگەر 20,6 سەكۋند ناتيجە كورسەتتى. وسىدان-اق ءامين تۇياقوۆتىڭ زامانىندا قانداي جەلاياق بولعانىن بىلە بەرىڭىز.
1984 جىلى الەم, ەۋروپا رەيتينگىندە, حالىقارالىق سپورت جۋرناليستەرىنىڭ رەيتينگىندە 75 كيلو سالماقتا جەكە-دارا كوش باستاعان اسىلبەك قيلىموۆ 1987 جىلى نەبارى 23 جاسىندا بوكستى دوعاردى. نەگە؟ بۋىنى قاتپاعان بوزبالا شاعىندا شامادان تىس جۇدىرىقتاسىپ, كەڭەس قۇراماسى ساپىندا وزىنەن جاسى ۇلكەن جىگىتتەرمەن قانجوسا ايقاسىپ, ابدەن زورىققاندىقتان. ايتپەسە, اسىلبەكتىڭ 17 جاسىندا سول تۇستاعى الەمدەگى ەڭ ازۋلى بوكس دەرجاۆاسىنىڭ ءبىرى كسرو ەرەسەكتەر قۇراماسىنا ەنۋى وتە سيرەك كەزدەسەتىن, تاڭعاجايىپ قۇبىلىس. قىسقاسى, ءمۇيىزى قاراعايداي كەڭەس قۇراماسىنىڭ باپكەرلەر القاسى اسا دارىندى قازاق بالاسىنىڭ بابىن تاۋىپ, تالابىن ۇشتاي المادى.
بوزبالا كەزىندە نايزاعايداي جارق ەتكەن سەرىك قوناقباەۆ تا 1984 جىلى 25 جاسىندا بوكستى دوعاردى. اتى دارداي كسرو قۇراماسى ماسكەۋ وليمپياداسىنا ازىرلىك كەزىندە سپورتشىلاردى جانكەشتى جاتتىعۋلارعا جەگىپ قانا قويماي, كوممۋنيستەردىڭ «جاسامپاز» يدەولوگياسىن ناسيحاتتايتىن تاپتاۋرىن لەكتسيالار تىڭداۋعا ماجبۇرلەدى. الدا – سپورتشىنىڭ اڭسارلى ارمانى وليمپيا ويىندارى. ال وعان جالعان, تامىرى ءنارسىز, ادامنىڭ قيالىنان تۋعان جاساندى يدەولوگيانى تىقپالاۋدىڭ قانشا قاجەتى بار ەدى؟ سپورتشىلار تىڭداعان كەيىپ تانىتىپ, ىقىلاسسىز, قالعىپ-مۇلگىپ وتىرادى ەكەن. مۇنىڭ ورنىنا وتباسىنان جىراقتا, كوكىرەگىن ساعىنىش كەرنەپ, مازاسى قاشقان سپورتشىلاردى الاڭسىز تىنىقتىرىپ, ۇيقىسىن قاندىرعان الدەقايدا ءتيىمدى ەدى عوي. وسىنداي جاعدايدا ەكى جاعى پىشاق جانىعانداي جۇدەگەن سەرىكتىڭ ءحالىن ەلەستەتىپ كورىڭىز. سەگىز كيلو سالماق «قۋعان» قوناقباەۆ اناسى بالتۋعانمەن دامگە بارعاندا ءبىر ءۇزىم نان مەن ءبىر ءتىلىم ەتتەن باسقا ەشتەڭە تاتپاپتى. سونىڭ وزىندە ماسكەۋ وليمپياداسىنىڭ فينالىندا ايقاستى.
تاعى ءبىر نازار اۋداراتىن ماڭىزدى دەرەك: سەرىك قوناقباەۆ, اسىلبەك قيلىموۆ, سەرىك نۇرقازوۆ, نۇرلان مەڭدىعاليەۆ, قانات بايشولاقوۆ, كارىمجان ءابدىراحمانوۆ, ماۋلەن مامىروۆ, باقتيار بايسەيىتوۆتەر 19 جاستارىندا ەرەسەكتەر اراسىنداعى قۇرلىق, كسرو چەمپيوناتتارىندا, سپارتاكيادالارى مەن كۋبوكتارىندا چەمپيون, جۇلدەگەر اتانسا, سامبوشى ايتجان شاڭعاراەۆ 18 جاسىندا كسرو چەمپيونى بولدى. ياعني بابى كەلىسكەن قازاق بوزبالالارى 18-19 جاسىندا-اق ەرەسەكتەردىڭ ءىرى رەسمي باسەكەلەرىندە توپ جارۋعا قابىلەتتى ەكەن. كەيىنگى جاس وقىرماندار كسرو چەمپيوناتتارى مەن سپارتاكيادالارىنىڭ دەڭگەيى كەي سپورت تۇرلەرىنەن الەم, ەۋروپا چەمپيوناتتارىنان كەم سوقپاعانىن دا بىلە جۇرگەنى دۇرىس. ەسكەرەتىن جاعداي, جوعارىداعى 18-19 جاسىندا ولجا سالعان سپورتشىلاردىڭ جاتتىقتىرۋشىلارى سول تۇستاعى الەمدەگى ەڭ وزىق سپورتتىق دەرجاۆانىڭ ءبىرى كسرو-نىڭ باپكەرلىك جۇيەسىن بەرىك ۇستاندى.
كەڭەس وداعى – رەسەي, ۋكراينا, بەلارۋس, قازاقستان, وزبەكستان, قىرعىزستان, تۇرىكمەنستان, تاجىكستان, ازەربايجان, گرۋزيا, ارمەنيا, مولدوۆا, لاتۆيا, ليتۆا, ەستونيا سەكىلدى 15 رەسپۋبليكادان قۇرالعانى بەلگىلى. كسرو چەمپيوناتتارىنا بۇل ەلدەردەن بولەك ماسكەۋ مەن لەنينگراد (قازىرگى سانكت-پەتەربۋرگ) قۇرامالارى جەكە كوماندا رەتىندە قاتىساتىن. بارلىعى 17 قۇراما. تەرەڭىرەك ۇڭىلسەك, رەسەيدىڭ ءوزى 16 اۆتونوميالىق رەسپۋبليكا, 15 اۆتونوميالىق وبلىس, 48 گۋبەرنيادان تۇردى. ياعني ءبىر رەسەيدىڭ ءوزىن جاداعاي, جەڭىل تارقاتقاننىڭ وزىندە گرۋزيا, لاتۆيا ءتارىزدى 20 مەملەكەتتىڭ جيىنتىعى دەۋگە بولادى. سوندا سول كەزدە جەر شارىنىڭ التىدان ءبىرىن باۋىرىنا باسقان كەڭەس وداعىن 35-40 مەملەكەتتىڭ قوسىندىسى دەسەك, كسرو چەمپيونى اتانعان باۋىرلارىمىزدىڭ شەبەرلىك دەڭگەيىنىڭ قانشالىقتى جوعارى بولعانىنا ەش كۇمان تۋمايدى.
ەندى جوعارىداعى 21 ساڭلاقتى ءار قىرىنان تارقاتىپ كورەيىك. كسرو ەرەسەكتەر قۇراماسىنا ەنگەن ەڭ جاس سپورتشى – 17 جاستاعى اسىلبەك قيلىموۆ; ەرەسەكتەر اراسىنداعى ەڭ جاس كسرو چەمپيونى – 18 جاستاعى ايتجان شاڭعاراەۆ; ەرەسەكتەر اراسىنداعى ەڭ جاس ەۋروپا چەمپيونى – 19 جاستاعى سەرىك قوناقباەۆ; كسرو حالىقتارى سپارتاكياداسىنىڭ چەمپيونى بولعان ەڭ جاس سپورتشى – 20 جاستاعى ەسەنگەلدى باتىرعارين; الەم كۋبوگىنىڭ ەڭ جاس جەڭىمپازى – 20 جاستاعى نۇرلان مەڭدىعاليەۆ; ەرەسەكتەر اراسىنداعى ەڭ جاس الەم چەمپيونى – 21 جاستاعى نۇرلان مەڭدىعاليەۆ; كسرو وليمپيالىق قۇراماسىنا ەنگەن ەڭ جاس سپورتشىلار – 19 جاستاعى اسىلبەك قيلىموۆ پەن كارىمجان ءابدىراحمانوۆ; جاسوسپىرىمدەر اراسىنداعى الەم چەمپيونى – 17 جاستاعى سەرىك الشىنباەۆ; جاستار اراسىنداعى الەم چەمپيونى – 19 جاستاعى امانگەلدى جاپاروۆ.
ەندى سپورتشىلاردىڭ العاشقى ءىرى جەڭىسى مەن ەڭ باستى جەڭىسىنىڭ اراسى قانشا جىل بولعانىن ەسەپتەپ كورەيىك. ءالجان جارمۇحامەدوۆ 23 جاسىندا ەۋروپا چەمپيونى – 28 جاسىندا وليمپيادا چەمپيونى (5 جىل); ءامين تۇياقوۆ 22 جاسىندا ەلىمىزدىڭ چەمپيونى – 28 جاسىندا ەۋروپا كۋبوگىنىڭ جەڭىمپازى (6 جىل); ءشامىل سەرىكوۆ 17 جاسىندا كسرو وقۋشىلار سپارتاكياداسىنىڭ جەڭىمپازى – 22 جاسىندا دۇنيەجۇزىنىڭ چەمپيونى (5 جىل); جاقسىلىق ۇشكەمپىروۆ 22 جاسىندا كسرو چەمپيوناتىنىڭ جۇلدەگەرى – 29 جاسىندا وليمپيادا چەمپيونى (7 جىل); الماس مۇسابەكوۆ 18 جاسىندا كسرو چەمپيوناتىنىڭ جۇلدەگەرى – 25 جاسىندا الەم كۋبوگىنىڭ جەڭىمپازى (7 جىل); سەرىك قوناقباەۆ 16 جاسىندا حالىقارالىق تۋرنير جەڭىمپازى – 20 جاسىندا وليمپيادانىڭ كۇمىس مەداليسى (4 جىل); نۇرلان مەڭدىعاليەۆ 19 جاسىندا جاستار اراسىنداعى ەۋروپا چەمپيوناتىنىڭ جۇلدەگەرى – 21 جاسىندا الەم چەمپيونى (2 جىل); قانات بايشولاقوۆ 19 جاسىندا كەڭەس وداعى چەمپيوناتىنىڭ جۇلدەگەرى – 23 جاسىندا الەم چەمپيونى (4 جىل); داۋلەت تۇرلىقانوۆ 16 جاسىندا كسرو وقۋشىلار سپارتاكياداسىنىڭ جەڭىمپازى – 25 جاسىندا دۇنيەجۇزىنىڭ چەمپيونى (9 جىل); ايتجان شاڭعاراەۆ 18 جاسىندا كسرو چەمپيونى – 21 جاسىندا ەۋروپا چەمپيونى (3 جىل); اسىلبەك قيلىموۆ 15 جاسىندا كسرو-نىڭ جاسوسپىرىمدەر اراسىنداعى چەمپيونى – 19 جاسىندا كسرو چەمپيونى (4 جىل); كارىمجان ءابدىراحمانوۆ 16 جاسىندا كسرو جاسوسپىرىمدەر بىرىنشىلىگىنىڭ جۇلدەگەرى – 19 جاسىندا كسرو چەمپيونى (3 جىل); امانگەلدى جاپاروۆ 17 جاسىندا كسرو وقۋشىلار سپارتاكياداسىنىڭ جەڭىمپازى – 19 جاسىندا جاستار اراسىنداعى الەم چەمپيونى (2 جىل); سەرىك الشىنباەۆ 17 جاسىندا جاسوسپىرىمدەر اراسىنداعى الەم چەمپيونى – 21 جاسىندا كسرو حالىقتارى سپارتاكياداسىنىڭ كۇمىس مەداليسى (4 جىل); ماۋلەن مامىروۆ 17 جاسىندا الەمنىڭ جاستار بىرىنشىلىگىنىڭ مەداليسى – 25 جاسىندا اتلانتا وليمپياداسىنىڭ قولا جۇلدەگەرى (8 جىل); باقتيار بايسەيىتوۆ 14 جاسىندا كسرو جاسوسپىرىمدەر بىرىنشىلىگىنىڭ مەداليسى – 26 جاسىندا الەم چەمپيونى (12 جىل).
وسى جەردە نازار اۋداراتىن جاعداي: مارات ساتىبالديەۆ پەن بولات تەمىروۆتەن باسقا سپورتشىلاردىڭ بارلىعى دەرلىك بالا كەزىندە, بوزبالا شاعىندا جوعارى ناتيجە كورسەتىپ, جەڭىس جولىن ءارى قاراي دا ءساتتى جالعاستىرعان ەكەن. ال م.ساتىبالديەۆ پەن ب.تەمىروۆ جاس كەزدەرىندە جارقىلداپ كورىنبەسە دە, كەشتەۋ جەتىلگەندەرىنە قاراماستان, قازاقتىڭ ايتۋلى ساڭلاقتارىنىڭ قاتارىنا قوسىلدى.
اتالعان سپورتشىلاردىڭ ىشىندە ءالجان جارمۇحامەدوۆ 36 جاسىنا دەيىن, داۋلەت تۇرلىقانوۆ پەن نۇرلان مەڭدىعاليەۆ 33 جاسىنا دەيىن سپورتتىق بابىن جوعالتقان جوق. جاقسىلىق ۇشكەمپىروۆتىڭ 29 جاسىندا وليمپيادا جەڭىمپازى, 30-ىندا الەم چەمپيونى بولعانى دا سپورتشىلارعا وي سالاتىنى انىق. بيىل پاريج وليمپياداسىندا ەلدوس سمەتوۆ 32 جاسىندا چەمپيون اتانسا, كۋبا الىبى ميحاين لوپەس 42 جاسىندا بەسىنشى رەت وليمپيادانىڭ التىن تۇعىرىنا تابان تىرەدى.
وكىنىشكە قاراي بوزبالا كەزىندە اۋىزدىقپەن الىسىپ, دۇركىرەتە شاپقان كەيبىر باۋىرلارىمىز جاسى 25-كە جەتپەي زورىعىپ قالىپ جاتىر. بۇل – ولاردىڭ بالا كەزىندەگى ەسەپسىز, جۇيەسىز جاتتىعۋىنىڭ سالدارى. بۇعان ەڭ الدىمەن كەڭەس كەزىندە بار سپورت عىلىمىن جوعالتىپ العان سالا باسشىلارى, ءبىلىم-بىلىگى كەم باپكەرلەر كىنالى. سونداي-اق كەيىنگى 13 جىلدا 10 سپورت ءمينيسترىنىڭ اۋىسقانى بۇل سالانىڭ بەرەكەسى كەتىپ, قۇلدىراۋىنا سەبەپ بولعانى انىق.
قىدىربەك رىسبەك ۇلى