استانادا 31 جەلتوقسان كۇنى ساعات 00:00-دە دەمەۋشىلىك قاراجات ەسەبىنەن ۇيىمداستىرىلعان مەرەكەلىك جاڭا جىلدىق وتشاشۋ باستالادى, دەپ حابارلايدى Egemen.kz ەلوردا اكىمدىگىنە سىلتەمە جاساپ.
وتشاشۋلار ەكى جەردە وتەدى: بوتانيكالىق باق پەن اتىراۋ كوپىرىنە ىرگەلەس اۋماقتا. ءار جەردە شامامەن 2,5 مىڭ مارتە اتىلادى.
سونىمەن قاتار, 31 جەلتوقسان مەن 1 قاڭتار ارالىعىندا جاڭا جىل قارساڭىندا قالانىڭ ءۇش ورنىندا مەرەكەلىك شارالار وتەدى.
31 جەلتوقساندا ساعات 21:00-دەن 02:00-گە دەيىن ەلوردانىڭ قالالىق الاڭىندا, «قازاق ەلى» مونۋمەنتى اۋماعىندا جانە ەكسپو الاڭىندا ەسترادا جۇلدىزدارى مەن شىعارماشىلىق ۇجىمداردىڭ قاتىسۋىمەن قالا تۇرعىندارى مەن قوناقتارى ءۇشىن جاڭا جىلدىق مەرەكەلىك كونتسەرتتەر وتەدى.
سونداي-اق, جاڭا جىلدىق كۇندىزگى مەرەكەلىك باعدارلاما تاۋەلسىزدىك داڭعىلى, ورتالىق ساياباق, اتاتۇرىك ساياباعى, ونەركاسىپ كەشەنى مەن كوكتال ساياباعىنداعى وقۋشىلار سارايىنىڭ اۋماعىندا دا وتەدى.