پرەمەر-مينيستر ولجاس بەكتەنوۆ ازەربايجاننىڭ استاناداعى ەلشىلىگىنە باردى, دەپ جازادى Egemen.kz.
ۇكىمەت باسشىسى اقتاۋ قالاسىنىڭ اۋەجايى ماڭىندا Az Airlines اۋە كومپانياسىنا تيەسىلى Embraer 190 ۇشاعىنىڭ اپاتىنا بايلانىستى اشىلعان كوڭىل ايتۋ كىتابىنا جازبا قالدىردى.
«بۇل قيىن ساتتە قازاقستان ۇكىمەتىنىڭ جانە ءوز اتىمنان قازا تاپقانداردىڭ وتباسىلارىنا, تۋىستارى مەن جاقىندارىنا قايعىرىپ كوڭىل ايتامىن. ورنى تولماس اۋىر قايعىعا ورتاقتاسىپ, اپات سالدارىنان زارداپ شەككەندەردىڭ تەزىرەك ساۋىعىپ كەتۋىن, ازەربايجان حالقىنا سابىر مەن توزىمدىلىك تىلەيمىن. ءبىز باۋىرلاس ازەربايجانعا ءتيىستى كومەك قولىن سوزىپ, جان-جاقتى قولداۋ كورسەتەمىز», دەپ جازدى ولجاس بەكتەنوۆ.بۇعان دەيىن پرەمەر-مينيستر قازا تاپقان قازاقستان ازاماتتارىنىڭ تۋعان-تۋىستارىنا كوڭىل ايتىپ, زارداپ شەككەن ازەربايجان, رەسەي جانە قىرعىزستان ازاماتتارىنا جان-جاقتى قولداۋ كورسەتۋدى تاپسىرعان ەدى.
ايتا كەتەيىك, بۇگىن ازەربايجاندا ازا تۇتۋ كۇنى جاريالاندى.