2024 جىلى قوعامدى ەلەڭ ەتكىزگەن كوپتەگەن وقيعالار بولدى. ولاردىڭ دەنى كوپشىلىكتى ءسۇيسىندىردى, ادامداردىڭ العىسىن الدى, ۇلگى بولدى. Egemen.ءkz تىلشىسى سولاردىڭ ءبىرسىپىراسىنا توقتالادى.
بالانى سۋدان قۇتقارعان باتىر
قازان ايىندا 25 جاستاعى الماتىلىق ءا.جاقسىلىق ەسەنتاي وزەنىنە باتىپ بارا جاتقان بالانى سۋدان الىپ شىقتى. قاس-قاعىم ساتتە, ەش ويلانباستان سۋعا سەكىرىپ, ەرلىكتىڭ ۇلگىسىن كورسەتكەن جانقيارلىعى ءۇشىن ول تج ءمينيسترىنىڭ اتىنان «سۋعا باتقانداردى قۇتقارعانى ءۇشىن» مەدالىمەن ماراپاتتالدى.
جاس جىگىتتىڭ ارەكەتى اينالاسىندا بولىپ جاتىرعان وقيعالارعا بەيجاي قارامايتىن ادامگەرشىلىگى مول, جاۋاپكەرشىلىگى جوعارى قازاق ازاماتتارىنىڭ ارامىزدا بار ەكەنىن كورسەتتى. قانىمىزعا سىڭگەن قايىرىمدىلىق جاساۋ, قينالعانعا كومەك قولىن سوزۋ, سىندارلى ساتتە شەشىم قابىلداي الۋ سەكىلدى قاسيەتتەردىڭ قازاق جىگىتتەرىنىڭ بويىنان تابىلۋى قاشاندا ماڭىزدى.
ماڭعىستاۋلىق كاراتەشىلەردىڭ جەڭىسى
ماڭعىستاۋ وبلىسىنىڭ سپورتشىلارى سينگاپۋردە سيتو-ريۋ كاراتەدەن وتكەن XVI ازيا جانە مۇحيت ەلدەرىنىڭ چەمپيوناتىنا قاتىستى.
وزدەرىنىڭ ەڭبەكقورلىعىنىڭ ارقاسىندا 27 ەلدەن كەلگەن 700 قاتىسۋشىنىڭ اراسىنان 9 سپورتشى جۇلدەلى ورىندارعا يە بولدى, اتاپ ايتقاندا: 6 ءبىرىنشى ورىن, 2 ەكىنشى جانە 1 ءۇشىنشى ورىن.
استانادا ءۇش مىڭنان استام دومبىراشى رەكورد ورناتتى
استانادا قۇرمانعازى ساعىرباي ۇلىنىڭ «بالبىراۋىن» كۇيىن ءۇش مىڭنان استام دومبىراشى ءبىر مەزەتتە ورىندادى. Qazaqstan جەڭىل اتلەتيكالىق سپورت كەشەنىندە «ناعىز قازاق – دومبىرا» اتتى اۋقىمدى ءىس-شارا ءوتتى. وعان ەلورداداعى دومبىرا ۇيىرمەسىنە باراتىن بالالار قاتىستى.
قاتىسۋشىلاردىڭ ونەرىن 8 ساراپشى, 4 مامان باعالادى. ونەر الەمىندەگى بۇل جارقىن وقيعا رەسمي تۇردە قازاقستاننىڭ گيننەس رەكوردتار كىتابىنا ەندى. سونىمەن قاتار, بۇل وقيعا الەمدەگى ەڭ ۇلكەن مۋزىكالىق رەكوردتاردىڭ بىرىنە اينالۋى مۇمكىن.
قازاقستاندىقتاردىڭ شاحمات سپورتىنداعى جەڭىستەرى
ۆەنگريادا وتكەن 45-ءشى شاحمات وليمپياداسى (45th FIDE Chess Olympiad) قازاقستان ءۇشىن تاماشا ناتيجەمەن اياقتالدى. وسىلايشا, ەلىمىزدىڭ ايەلدەر قۇراماسى بۇرىن-سوڭدى بولماعان ناتيجە كورسەتىپ, قازاقستاننىڭ شاحمات تاريحىنداعى تۇڭعىش وليمپيادا كۇمىسىن جەڭىپ الدى.
جارىس بارىسىندا قازاقستاندىق ايەلدەر سەگىز جەڭىس, ەكى تەڭ ويىن جانە ءبىر عانا جەڭىلىس تىركەدى. قازاقستان ايەلدەر قۇراماسىنىڭ دۇنيەجۇزىلىك شاحمات وليمپياداسىندا كۇمىسكە قول جەتكىزگەنى – قازاقستاندىق شاحمات سپورتىنىڭ مىقتىلىعىن بۇكىل الەمگە پاش ەتەتىن تاماشا جەتىستىك. وتە جاس بولسا دا, ۇلكەن پسيحولوگيالىق قىسىمعا جانە 11 ماتچتىق مارافونعا قاراماستان, كوماندا 169 ەلدەن كەلگەن قارسىلاستارىنان سەنىمدى تۇردە وزىپ, ۇزدىك اتاندى.
ىشتەگى نارەستەنىڭ ءومىرىن ساقتاپ قالعان تۇڭعىش وتا جاسالدى
قازاقستاندا العاش رەت ىشتەگى نارەستەنىڭ ءزار شىعارۋ جۇيەسىنىڭ تۋا بىتكەن اقاۋىن تۇزەتۋ ءۇشىن قۇرساقىشىلىك ارالاسۋ جۇرگىزىلدى. توا UMC كلينيكاسىنىڭ بازاسىندا انا مەن بالا ۇلتتىق عىلىمي ورتالىعىندا شەتەلدىك مامانداردىڭ قاتىسۋىمەن شەبەرلىك سىنىبى اياسىندا جاسالدى.
جۇكتىلىكتىڭ 19-شى اپتاسىندا ايەل ادامنىڭ ىشىندەگى نارەستەدە دامۋ اقاۋى انىقتالدى.
پرەناتالدى كونسيليۋم ىشتەگى نارەستەنىڭ قۋىعىن جاتىرىشىلىك درەناجداۋ قاجەتتىلىگى تۋرالى شەشىم قابىلدادى. بۇل وكپە گيپوپلازياسىنىڭ الدىن الۋ جانە تۋىلماعان بالادا بۇيرەكتىڭ قالىپتى جۇمىسىن ساقتاۋ ءۇشىن قاجەت. وتا ءساتتى ءوتتى.
نارەستەلىك حيرۋرگيا جاڭا تۋعان نارەستەلەردىڭ ءولىمى مەن مۇگەدەكتىگىنىڭ الدىن الۋ ءۇشىن جاتىرىشىلىك وتالار مەن ينۆازيالىق ارالاسۋلاردان تۇراتىن مەديتسيناداعى جاڭا باعىت بولىپ تابىلادى. وسىنداي پروتسەدۋرالار الەمنىڭ جەتەكشى مەديتسينالىق ورتالىقتارىندا جۇرگىزىلەدى. بۇل جاعداي مەديتسينا سالاسىنداعى وزىق جەتىستىكتەردى كورسەتىپ قانا قويماي, قازاقستاننىڭ الەمدىك ستاندارتتارعا بەلسەندى قادام باسىپ كەلە جاتقانىن كورسەتەدى. وتا جوعارى دەڭگەيدە شەبەرلىك تانىتقان ماماندار توبىنىڭ ۇيلەسىمدى جۇمىسىنىڭ ارقاسىندا مۇمكىن بولدى.
بيولوگيا ءپانىنىڭ مۇعالىمى نيككي ميناجدىڭ ساۋند-پروديۋسەرى بولدى
اباي اتىنداعى مامانداندىرىلعان مەكتەپ-گيمنازيا-ينتەرناتىندا قىزمەت ەتەتىن اباي وبلىسىنىڭ جاس پەداگوگ-بيولوگى ە.سادۋحانوۆ ۇستازدىق قىزمەتىن سۇيىكتى ىسىمەن ۇشتاستىرۋدا. مۋزىكا الەمىندە Teaholic رەتىندە تانىمال ول Blackpink توبىنان دۋا ليپا, Rosalia جانە Lisa سەكىلدى حالىقارالىق جۇلدىزدارمەن جۇمىس ىستەگەن. جاقىندا ە.سادۋحانوۆ ايگىلى امەريكالىق رەپ ورىنداۋشى نيككي ميناجدىڭ ساۋند-پروديۋسەرى بولعانى تۋرالى كەرەمەت جاڭالىعىمەن ءبولىستى. ول قوعام الدىنداعى جوعارى جاۋاپكەرشىلىك پەن ءوز ىسىنە ادالدىقتىڭ ۇلگىسى بولا ءبىلدى.
انار بۋراشەۆا ەۆەرەستتى باعىندىرعان تۇڭعىش قازاق ايەلى
12 مامىردا نەپال ۋاقىتى بويىنشا ساعات 07:25-تە الپينيست انار بۋراشەۆا الپينيستەر كومانداسىمەن بىرگە Kazakh Everest Team سپورتتىق-پاتريوتتىق ەكسپەديتسياسى اياسىندا ەۆەرەستكە شىقتى. انار بۋراشەۆا شىڭعا شىعۋىن ۇلى وتان سوعىسىنىڭ باتىرلارى ساعادات نۇرماعامبەتوۆ, راقىمجان قوشقارباەۆ جانە ءاليا مولداعۇلوۆاعا ارنادى.
قول-اياعى جوق قاراعاندىلىق بۋرابايدى ءجۇزىپ ءوتتى
26 جاستاعى قاراعاندىلىق پاراليمپياداشى ءبىر قولى مەن اياعى بولماسا دا, قازاقستان تاريحىندا العاش رەت بۋراباي كولىنەن ءجۇزىپ ءوتىپ, تاڭعاجايىپ ءجۇزۋدى كورسەتتى. پاراليمپياداشى وسى ءجۇزۋ ارقىلى بۇكىل الەمگە ءبىزدىڭ تابيعي عاجايىبىمىز – بۋرابايدى كورسەتىپ, پاراسپورتتى ەلىمىزدە جانە الەمدە ناسيحاتتاعىسى كەلگەنىن اتاپ ءوتتى.