پروكۋراتۋرانىڭ ارالاسۋىنان كەيىن اقمولا وبلىسىنىڭ قوسشى قالاسىندا قاتتى تۇرمىستىق قالدىقتاردى شىعارۋ ءتاريفى تومەندەتىلدى. بۇل 37 مىڭ تۇتىنۋشىعا, ونىڭ ىشىندە 200 كاسىپكەرلىك سۋبەكتىسىنە جىلىنا 22,2 ملن تەڭگەنى ۇنەمدەۋگە مۇمكىندىك بەرەدى, دەپ حابارلايدى Egemen.kz.
باس پروكۋراتۋرانىڭ حابارلاۋىنشا, قوسشى قالاسى جانە وعان ىرگەلەس اۋماق قالدىقتاردى توگۋ ءۇشىن رۇقسات بەرىلمەيتىن ايماقتارعا, ياعني استانانىڭ حالىقارالىق اۋەجايىنان 30 شاقىرىمدا ورنالاسقان ايماقتارعا كىرەدى. وسىعان بايلانىستى قالا ماڭىندا قتق-نى سۇرىپتاۋعا جانە كومۋگە تىيىم سالىنعان.
ء«وز كەزەگىندە مەردىگەر ۇيىم قتق-نى قوسشى قالاسىنان 50 شاقىرىمنان استام قاشىقتىقتا ورنالاسقان استانا قالاسىنىڭ پوليگونىنا تاسىمالداعان. بۇل رەتتە قتق-نى استانا قالاسىنىڭ پوليگونىنا دەيىن تاسىمالداۋ مەن ولاردى وتكىزۋ شىعىندارىنىڭ ورنىنا قتق-نى سۇرىپتاۋ مەن كومۋگە ارنالعان شىعىندار تاريفكە نەگىزسىز ەنگىزىلگەن», دەلىنگەن حابارلامادا.
سول سەبەپتەن قوسشى قالاسى پروكۋراتۋراسىنىڭ قاداعالاۋ اكتىسى بويىنشا شىعىنداردى قايتا ەسەپتەۋ جۇرگىزىلىپ, ناتيجەسىندە جەكە (532 تەڭگەدەن 482 تەڭگەگە دەيىن) جانە زاڭدى (575 تەڭگەدەن 527 تەڭگەگە دەيىن) تۇلعالار ءۇشىن ورتاشا ولشەنگەن تاريف قۇنى 50 تەڭگەگە تومەندەگەن.
جالپى قابىلدانعان شارالاردىڭ ناتيجەسىندە, 37 مىڭ تۇتىنۋشى (ونىڭ ىشىندە 200 بيزنەس سۋبەكتىلەرى) ءۇشىن ءبىر جىلدىق ۇنەم 22,2 ملن تەڭگەنى قۇرادى.