وسى ورايدا, باس شاھاردا بۇگىن «جارتى عاسىر – جارقىن جىلدار» اتتى سالتاناتتى ءىس-شارا ءوتتى, دەپ جازادى Egemen.kz.
مەرەيتويعا ەلىمىزدىڭ مادەنيەت جانە ونەر قايراتكەرلەرى, ەلوردالىق ماسليحات دەپۋتاتتارى, اتالعان سارايدىڭ ارداگەرلەرى جانە جاستار ۇيىمدارىنىڭ وكىلدەرى قاتىستى. استانا قالاسىنىڭ اكىمى جەڭىس قاسىمبەكتىڭ ارنايى ىزگى تىلەگىن قالالىق ءماسليحات توراعاسى ەرلان كاناليموۆ جەتكىزىپ, ساراي ۇجىمى مەن جينالعان قاۋىمدى مەرەيتويمەن قۇتتىقتادى.
«بۇگىندە «جاستار» سارايى – جاستاردىڭ شىعارماشىلىق جانە سپورتتىق الەۋەتىن دامىتۋعا ارنالعان زاماناۋي كەشەن. ەلوردامىزدىڭ مادەني جانە قوعامدىق ءومىرىنىڭ اجىراماس بولىگى رەتىندە جاستاردى شابىتتاندىرىپ, رۋحاني دامۋعا ىقپال ەتۋ تۇرعىسىندا ەرەكشە ورىن الادى. «جاستار» سارايىنىڭ ۇجىمى كاسىبي شەبەرلىگىمەن, بەلسەندىلىگىمەن جانە ءوز ىسىنە دەگەن ادالدىعىمەن وسى جىلدار ىشىندە كوپتەگەن جەتىستىكتەرگە قول جەتكىزدى», دەدى قالالىق ءماسليحات توراعاسى.
«جاستار» سارايى – جاس تالانتتاردى قولداۋعا ارنالعان ەرەكشە مادەني وردا, حالىق پەن ونەر اراسىنداعى التىن كوپىر. جارتى عاسىر بويى ەلوردا تۇرعىندارىنىڭ سۇيىكتى مەكەنىنە اينالعان عيمارات – ونەر مەن شىعارماشىلىقتى دامىتۋ ورتالىعى بولىپ قانا قويماي, كوپتەگەن ەلىمىزگە تانىمال ونەرپازداردىڭ العاشقى قادامىن جاساعان الاڭ بولىپ ەسەپتەلەدى.
مەرەكەلىك كەشتە «استانا» ەسترادا-سيمفونيالىق وركەسترى, «تەررا» بي تەاترى, «جىگەر» ەسترادالىق-دجاز ءانسامبلى جانە ت.ب. ارتىستەر ونەر كورسەتتى. سونداي-اق تاريحي قۇجاتتار, ەستەلىكتەر, سارايدىڭ مادەني جەتىستىكتەرىن كورسەتەتىن ارنايى كورمە ۇيىمداستىرىلدى.