المات تالعات ۇلى اقىشوۆ وسكەمەن قالاسىنىڭ اكىمى بولىپ تاعايىندالدى, دەپ حابارلايدى Egemen.kz.
المات اقىشوۆ شىعىس قازاقستان وبلىسىنىڭ تۋماسى. ەڭبەك جولىن وسكەمەن قالاسىنان باستاعان. جاڭا اكىمنىڭ 14 جىلدىق ەڭبەك ءوتىلى بار, ونىڭ 12 جىلىن مەملەكەتتىك قىزمەتكە ارناعان.
اقىشوۆ وسى جىلدارى تۋريزم, دەنە شىنىقتىرۋ جانە سپورت باسقارماسىندا, اۋىل شارۋاشىلىعى مينيسترلىگىندە قىزمەت اتقاردى, ۇلان اۋداندىق اپپاراتىنىڭ باسشىسى, اياگوز اۋدانى اكىمىنىڭ ورىنباسارى قىزمەتتەرىن اتقاردى, سونىمەن قاتار ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىن باسقاردى. سوڭعى ەكى جىلدا كۇرشىم اۋدانىنىڭ اكىمى قىزمەتىن اتقاردى. ايماقتاردى دامىتۋ ماگيسترى, پرەزيدەنتتىك جاستار كادرلىق رەزەرۆىنىڭ مۇشەسى.
ايماق باسشىسى جاڭا اكىمگە قالانى دامىتۋدىڭ جول كارتاسىن ازىرلەپ, تانىستىرۋدى تاپسىردى, ونىڭ ىشىندە: ەكولوگيالىق ماسەلەلەردى شەشۋ, كوشەلەردى جارىقتاندىرۋدى جاڭعىرتۋ, ەكونوميكاداعى, قۇرىلىس پەن اباتتاندىرۋداعى نەگىزگى جوبالاردى اياقتاۋ, قالانىڭ تۋريستىك تارتىمدىلىعىن ارتتىرۋ ءۇشىن كاسىپكەرلىك نىساندارىنىڭ بىرىڭعاي جوبالىق كودەكسىن ەنگىزۋ.
ەستەرىڭىزگە سالا كەتەيىك, وسكەمەننىڭ بۇرىنعى اكىمى جاقسىلىق ومار 27 قاراشادا وكىلەتتىگىنىڭ اياقتالۋىنا بايلانىستى قىزمەتىنەن كەتكەن ەدى.