جەتىسۋ جەرىندە تولىق تسيكلدى ونەركاسىپتىك باتارەيالار شىعاراتىن العاشقى زاۋىت ىسكە قوسىلدى. بۇل – ەلىمىزدەگى ەنەرگەتيكا سالاسىنداعى تەڭدەسسىز تۇڭعىش كاسىپورىن.
جەتىسۋ وبلىسىنىڭ ىرگەسى قالانعالى ءوڭىر كولەمىندە ءىرىلى-ۇساقتى بىرنەشە كاسىپورىن اشىلعانى بەلگىلى. سونىڭ ىشىندە باسەكەگە قابىلەتتى ءارى ەكسپورتقا يكەمدى قۇرىلىمى ۇلكەن جاڭا زاۋىت – «Asma Industrial» جشس. اتالعان ءوندىرىس ورنىندا وزىق زاماناۋي تەحنولوگيالاردىڭ كومەگىمەن وندىرىلەتىن باتارەيالار مۇناي-گاز, تاۋ-كەن ونەركاسىبىندە, تەلەكوممۋنيكاتسيادا, تەمىرجولداردا, ەنەرگەتيكادا تاپتىرماس قۋات كوزى سانالادى. ءوڭىر اكىمى ءباسپاسوز قىزمەتىنىڭ مالىمەتىنشە, ودان بولەك جاسىل ەنەرگەتيكادا, اتاپ ايتقاندا, كۇن, جەل ەلەكتر ستانسالارىنان الىناتىن ەلەكتر ەنەرگياسىن ساقتاۋدا ۇزدىكسىز قۋات كوزى رەتىندە پايدالانىلادى. ەڭ ماڭىزدىسى, ءونىمنىڭ 40%-ى وتاندىق نارىققا, 60%-ى ەكسپورتقا باعىتتالعان. وبلىس اكىمى بەيبىت يساباەۆ اشىلۋ سالتاناتىندا ونەركاسىپ قىزمەتكەرلەرىن قۇتتىقتاپ, وبلىس ءۇشىن وتە ماڭىزدى وقيعا ەكەنىن جەتكىزدى.
«بۇگىن ءبىز ەلىمىزدە بالاماسى جوق جاڭا زاۋىت – «Asma Industrial» جشس-نى اشىپ وتىرمىز. ونىڭ بىرەگەيلىگى سول, ءارتۇرلى سالالاردا كەڭىنەن قولدانىلاتىن تولىق تسيكلدى ونەركاسىپتىك اككۋمۋلياتورلارىن شىعارادى. بۇل ينۆەستيتسيالىق جوبانىڭ ىسكە اسىرىلۋى وبلىسىمىز ءۇشىن وتە ماڭىزدى وقيعا دەپ ەسەپتەيمىن. ءبىز ءوز تاراپىمىزدان بارىنشا قولداۋ كورسەتتىك. جەرگىلىكتى بيۋدجەت قاراجاتى ەسەبىنەن 260 ملن تەڭگە سوماسىنا ينجەنەرلىك جەلىلەر تارتىلدى. كومپانيا ءوز سالاسىنداعى يننوۆاتسيالىق كوشباسشى رەتىندە مارتەبەسىن نىعايتىپ, مەملەكەت باسشىسى قويىپ وتىرعان وندىرىستىك ساياساتتى العا باستىرۋ مىندەتىن ىسكە اسىرۋ جولىندا جوعارى ناتيجەلەرگە قول جەتكىزەدى دەپ ۇمىتتەنەمىز», دەدى ب.يساباەۆ.
مۇنداعى ستاتسيونارلىق باتارەيالار 20 جىلعا دەيىن قىزمەت كورسەتەدى. ستارتەرلىك اككۋمۋلياتوردان ايىرماشىلىعى قوزعالىسسىز ءبىر ورىندا تۇرادى ءارى قىزمەت كورسەتۋ ۋاقىتى الدەقايدا جوعارى. زاۋىت ديرەكتورى سەرىكباي اجماعامبەتوۆتىڭ ايتۋىنشا, جوبانىڭ قۇنى – 8,5 ملرد تەڭگە. زاۋىت جىلىنا 210 مىڭ دانا ءونىم شىعارۋعا قاۋقارلى. ءوندىرىس تولىق قۋاتىنا شىققاندا, جۇمىس ورىندارىنىڭ سانى 180-نەن اسىپ, جەرگىلىكتى تۇرعىندار تۇراقتى جۇمىسپەن قامتاماسىز ەتىلەدى. بۇل رەتتە زاۋىت ءونىمىنىڭ ءبىر بولىگى ەكسپورتقا جونەلتىلىپ, ءبىر بولىگى جەرگىلىكتى نارىققا شىعارىلادى.
«وسى جوبانى 2021 جىلدان قولعا الا باستادىق. سودان بەرى بىزگە قولداۋ كورسەتىپ كەلە جاتقان ازاماتتاردىڭ بارىنە العىسىمدى بىلدىرەمىن. ءبىزدىڭ ۇجىمىمىز جاس, ەندى قالىپتاسۋ ۇستىندە, قاجەتتى كادرلاردى قابىلداۋ جۇمىستارى ءجۇرىپ جاتىر. ماماندارىمىزدىڭ كوپشىلىگىنىڭ وسى سالادا بىرنەشە جىلدىق تاجىريبەسى بار. ال جاس مامانداردى ۇدەرىس بارىسىندا وقىتىپ, ۇيرەتەتىن بولامىز. ونىمدەرىمىزگە سۇرانىس بار, بۇل رەتتە ىرگەلى كومپانيالارمەن كەلىسىمدەر جاسالۋدا», دەيدى س.اجماعامبەتوۆ.
جاڭا زاۋىتقا جۇمىسقا تۇرعانداردىڭ اراسىندا تالدىقورعاندىق داستان قاناتقانوۆ تا بار. ول قازىر قورعاسىن پلاستينكالارىن قۇيۋ تسەحىنىڭ باستىعى قىزمەتىندە.
ء«وندىرىس سالاسىندا جۇمىس ىستەپ جۇرگەنىمە 10 جىلداي بولدى. ەلىمىزدە مۇنداي زاۋىت بىرەۋ-اق, سوندىقتان وسى بىرەگەي كاسىپورىندا جۇمىس ىستەپ, كاسىبي دامۋىمدى جالعاستىرۋ مەن ءۇشىن وتە ماڭىزدى. ءبىزدىڭ زاۋىتتا كورەيا تەحنولوگياسى قولدانىلادى, بۇل شىعاراتىن باتارەيالار اسا كۇردەلى سالالاردا – تاۋ-كەن, تەمىرجول, تەلەكوممۋنيكاتسيا سالالارىندا قولدانىلادى. كەز كەلگەن ءوڭىردىڭ قۋاتتى ىرگەتاسى – ونداعى ءىرى ءوندىرىس ورىندارى. ياعني سالىق ءتۇسىمى مولايىپ, سول ارقىلى ايماقتا ينفراقۇرىلىم جاقسارادى, جول, سۋ, جارىق, گاز سياقتى حالىققا كەرەكتى جاعدايلار جاسالادى. سوندىقتان بۇل جاڭا زاۋىتتىڭ وبلىستىڭ دامۋىنا قوساتىن ۇلەسى مول بولادى دەپ سەنەمىن», دەدى زاۋىت قىزمەتكەرى.
جالپى, جەتىسۋ وبلىسىنىڭ ونەركاسىپ وندىرىسىندە 549 كاسىپورىن جۇمىس ىستەيدى. ونىڭ 14-ءى ءىرى, 13-ءى ورتا كاسىپورىن, وندا 30 مىڭنان استام ادام جۇمىسپەن قامتىلعان. 2024 جىلدىڭ 10 ايىندا 3,9% وسىممەن 278,8 ملرد تەڭگە ونەركاسىپتىك ءونىم ءوندىرىلدى.
جەتىسۋ وبلىسى