مەملەكەت باسشىسى Newsmaker Interview فورماتىنداعى ارنايى سەسسياعا قاتىسىپ, مودەراتور, سNN ءجۋرناليسى دجۋليا چاتتەرلەيدىڭ سۇراقتارىنا جاۋاپ بەردى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
قازاقستان پرەزيدەنتى, ەڭ الدىمەن, بۇۇ-نىڭ ءتيىمدى قىزمەتىنىڭ ماڭىزى مەن ورتا دەرجاۆالاردىڭ ۋاقىت وتكەن سايىن ارتىپ كەلە جاتقان ءرولى تۋرالى ايتتى.
- بۇۇ امبەباپ ۇيىم رەتىندە ادامزات ءۇشىن وتە قاجەت. سەبەبى ونىڭ بالاماسى جوق. وكىنىشكە قاراي, ءىرى دەرجاۆالار الەمدەگى بەيبىتشىلىك پەن تۇراقتىلىقتى تولىق ساقتاي الماي وتىر. ال بۇگىنگى احۋال كوپتەگەن ەلدى, سونىڭ ىشىندە قازاقستاندى دا الاڭداتادى. سوندىقتان بىرىككەن ۇلتتار ۇيىمى رەفورمالاۋدى قاجەت ەتەدى. ءىرى دەرجاۆالار اراسىندا ىمىرالاستىق بولۋى كەرەك دەپ سانايمىز. ولاردىڭ كەلىسىمگە كەلە الماۋى سالدارىنان قاۋىپسىزدىك كەڭەسى تىعىرىققا تىرەلدى. قازاقستان سياقتى ورتا دەرجاۆالار ايماقتىق دەڭگەيدە, سونداي-اق جاھاندىق كەڭىستىكتە بەيبىتشىلىك پەن قاۋىپسىزدىكتى ىلگەرىلەتۋدە وتە ماڭىزدى ءرول اتقارا الادى, – دەدى قاسىم-جومارت توقاەۆ.
مەملەكەت باسشىسى الەمدىك ساۋداداعى قايشىلىقتارعا قاتىستى كوزقاراسىن جەتكىزدى.
-مەنىڭ ويىمشا, ساۋدا قاقتىعىستارى, سونىڭ ىشىندە تاريف قولدانۋ شارالارى – وڭتايلى شەشىم ەمەس. بۇل – تىم كۇماندى ساياسات. قازاقستان دسۇ-عا مۇشە ەل رەتىندە وسى ماڭىزدى ساۋدا-ەكونوميكالىق ۇيىمنىڭ بارلىق نورمالارى مەن ەرەجەلەرىن قاتاڭ ساقتايدى. ءبىز كەدەرگىلەر مەن قاقتىعىستاردى قولدامايمىز. قازاقستان ازىرگە ونداي قيىندىقتارعا تاپ بولا قويعان جوق. ويتكەنى وڭىردەگى كورشىلەرىمىزبەن جانە باسقا دا مەملەكەتتەرمەن سىندارلى ءارى ءوزارا ءتيىمدى قارىم-قاتىناس ۇستانامىز. سوندىقتان ءبىزدىڭ ايماقتا وسىعان ۇقساس كەلەڭسىزدىكتەر تۋىندامايدى دەپ ويلايمىن. بۇل رەتتە بارلىق ءىرى دەرجاۆالاردى مۇنداي قىسىم كورسەتۋ تەتىكتەرىن قولدانباۋعا شاقىرامىز, – دەدى پرەزيدەنت.
قاسىم-جومارت توقاەۆ قازاقستاننىڭ سىرتقى ساياساتىنا, ۋكراينا مەن تاياۋ شىعىستاعى جاعدايدى رەتتەۋگە قاتىستى قويىلعان ساۋالدارعا جاۋاپ بەردى. سونداي-اق ەل دامۋىنداعى جاستاردىڭ رولىنە توقتالدى.