«تازا قازاقستان» جالپىۇلتتىق ەكولوگيالىق اكتسياسى اياسىندا ح.دوسمۇحامەدوۆ اتىنداعى اتىراۋ ۋنيۆەرسيتەتى ستۋدەنتتەرىنىڭ ەكولوگيالىق ماسەلەلەردى شەشۋگە ارنالعان يننوۆاتسيالىق جوبالار مەن كرەاتيۆتى ارت تۋىندىلار كورمەسىنىڭ باق وكىلدەرىنە ارنالعان پرەزەنتاتسياسى ءوتتى, دەپ حابارلايدى Egemen.kz.
مەملەكەت باسشىسى قاسىم-جومارت توقاەۆ «تازا قازاقستان» جالپىۇلتتىق ەكولوگيالىق اكتسياسىنىڭ ماڭىزىنا توقتالا وتىرىپ, ونىڭ قازاقستاندىقتاردى تابيعاتقا قامقور بولۋ يدەياسىنىڭ توڭىرەگىنە بىرىكتىرە الاتىن ماعىناعا يە ەكەنىن اتاپ وتكەن ەدى. باستامانىڭ بۇل اسپەكتىسى ماڭىزدى, بىراق جوبانىڭ ومىرشەڭدىگى مەن وڭ ناتيجەگە جەتۋ ءۇشىن قوسىمشا شارالار قاجەت, سونىڭ ىشىندە ستۋدەنتتىك عىلىمي جوبالار مەن ەكولوگيالىق سالاداعى زەرتتەۋ ناتيجەلەرىن تارتۋدىڭ ماڭىزى زور.
ح. دوسمۇحامەدوۆ اتىنداعى اتىراۋ ۋنيۆەرسيتەتى «تازا قازاقستان» جالپىۇلتتىق ەكولوگيالىق اكتسياسىنىڭ وڭىردە ءساتتى جۇزەگە اسىرىلۋىنا بەلسەندى اتسالىسۋدا. وقىتۋشىلار مەن ستۋدەنتتەر جالپى پروتسەسكە «ەكوجوبالار» جانە «تازا بەيسەنبى» باعىتتارى بويىنشا تارتىلعان.
ءبىرىنشى باعىت بويىنشا ۋنيۆەرسيتەتتىڭ «جاس سانا» ورتالىعىندا يننوۆاتسيالىق جوبالار مەن كرەاتيۆتى ارت تۋىندىلار پرەزەنتاتسياسى ۇيىمداستىرىلدى. پرەزەنتاتسياعا اتىراۋ ۋنيۆەرسيتەتىنىڭ «ەكوس» ەكولوگيالىق ۇيىرمەسىنىڭ جوبالارى قويىلدى. ولاردىڭ اراسىندا ستارتاپ جوبا رەتىندە قارجىلاندىرىلعاندارى دا بار.
«شىنى قالدىقتارىن پايدالانا وتىرىپ, ەپوكسيدتى شايىردان بۇيىمدار جاساۋ» جوباسى اۆتورلارىنىڭ ايتۋىنشا بۇل تۇرمىستىق قالدىقتاردى ادەمى ءارى پايداعا جارامدى بۇيىمعا اينالدىرۋعا باعىتتالعان بىرەگەي جوبا.
«بۇل تەك لاستانۋدىڭ الدىن الۋ عانا ەمەس, سونىمەن قاتار شاعىن جانە ورتا بيزنەستى دامىتۋعا دا ۇلكەن مۇمكىندىك. بۇل جوبا ءالى دە جەتىلدىرىلۋ ۇستىندە. بولاشاقتا دايىن ونىمدەر جەرگىلىكتى نارىققا شىعارىلاتىن بولادى», دەيدى جوبا اۆتورلارىنىڭ ءبىرى اقمارال ساعىنعاليەۆا.
سونداي-اق كورمەدە «كۇكىرت قالدىقتارىنان كۇكىرت بەتونىن جاساۋ» جانە «تەمەكى قالدىقتارىن پايدالانا وتىرىپ, تاس توسەنىشتەر ءوندىرۋ» سياقتى يننوۆاتسيالىق جوبالار ۇسىنىلعان. قالدىقسىز ءوندىرىس تۇرعىسىنان جانە قورشاعان ورتاعا زياندى مەيلىنشە ازايتۋ تۇرعىسىنان ءتيىمدى كورىنگەن جوبالاردىڭ ءبىرى – «بيوپلاستيك جاساۋ». ستۋدەنتتەردىڭ ايتۋى بويىنشا, جەرگىلىكتى شيكىزاتتان بيوپلاستيك الۋ, بۇل يمپورتتى الماستىرۋ جانە ەكولوگيالىق جۇكتەمەنى ازايتۋ تۇرعىسىنان وتە ءتيىمدى جوبا.
«باستى ماقسات – جارامدى شيكىزات كوزىن انىقتاپ, بيولوگيالىق ورتادا تەز ىدىرايتىن بيوپلاستيك ءوندىرىسىنىڭ تەحنولوگياسىن جاساقتاۋ. بۇنداي باستامالاردى قولداۋ قازاقستانداعى اناعۇرلىم تازا جانە تۇراقتى ورتانى قالىپتاستىرۋداعى ۇلكەن قادام بولاتىن ەدى», دەپ ەسەپتەيدى جوبا اۆتورىنىڭ ءبىرى دميتري ۋرگارچەۆ.
«تازا قازاقستان» جالپىۇلتتىق ەكولوگيالىق اكتسياسىن جۇزەگە اسىرۋدا ۋنيۆەرسيتەت ۇستانعان ەكىنشى باسىم باعىت – جالپى ۋنيۆەرسيتەتتىك ەكولوگيالىق اكتسيالار. ءار بەيسەنبىدە 100-گە جۋىق ستۋدەنت ۋنيۆەرسيتەتكە قاراستى اۋماقتىڭ تازالىعىن قامتاماسىز ەتەدى. «تازا قازاقستان» اكتسياسى باستاۋ العاننان بەرى جالپى كولەمى 3 تونناعا جۋىق قاتتى تۇرمىستىق قالدىق جينالعان.
ستۋدەنتتەر ءار اپتا سايىن, ساباقتان تىس كۇندەرى, ءوز ەركىمەن وقۋ عيماراتتارى مەن جاتاقحانالار اۋماعىن تازالاۋ جۇمىستارىن جۇرگىزىپ تۇرادى. جاستاردىڭ بويىندا تۋعان جەرگە دەگەن سۇيىسپەنشىلىكتى وياتۋ جانە ەكو-مادەنيەتتى قالىپتاستىرۋ ماقساتىندا ساباق كەزىندە, اتالمىش باعىت بويىنشا ەڭبەكتەنىپ, باستاپقى تاجىريبە جيناقتاپ ۇلگەرگەن جاس عالىمدار ءۇشىن پراكتيكالىق جانە تەوريالىق دارىستەر وتكىزىلەدى.
ودان بولەك اتىراۋ ۋنيۆەرسيتەتى ۇجىمى مەن ستۋدەنتتەرى كوكتەمگى سۋ تاسقىنى قاۋپى كەزىندە, وزدەرىنە سەنىپ تاپسىرىلعان 5 شاقىرىمنان استام جاعالاۋ اۋماعىندا, جاعالاۋدى بەكىتۋ جانە دامبا سوعۋ جۇمىستارىنا بەلسەندى ارالاستى.
بۇل باعىتتاعى جۇمىستار الداعى ۋاقىتتا دا جالعاسىن تاپپاق. كوكتەم جانە كۇز ايلارىندا ۋنيۆەرسيتەت ۇجىمى ءداستۇرلى تۇردە جالپىقالالىق كوشەت وتىرعىزۋ جۇمىستارىنا كىرىسەدى.