استانادا الماتى اۋدانى, بۇقتىرما كوشەسىندە ورنالاسقان عيماراتتا ءورت شىقتى, دەپ حابارلايدى Egemen.kz.
بۇل تۋرالى قازاقستان رەسپۋبليكاسى توتەنشە جاعدايلار مينيسترلىگى مالىمدەدى. ءورت عيماراتتىڭ ءۇشىنشى قاباتىندا باستالىپ, توبە جابىندارى مەن شاتىردى دا شارپىعان.
ءورت سوندىرۋشىلەر كەلگەنگە دەيىن ءۇشىنشى قاباتتىڭ توبە جابىندارى قۇلاپ كەتكەن. عيماراتتان ءوز بەتىنشە 40 ادام, ونىڭ ىشىندە 10 بالا ەۆاكۋاتسيالانعان. وقيعا ورنىندا ءورت ءسوندىرۋ جۇمىستارى بويىنشا جەدەل شتاب قۇرىلىپ, ەۆاكۋاتسيالانعاندار ءۇشىن جىلىنۋ پۋنكتى ۇيىمداستىرىلدى. سونىمەن قاتار, تجم مەديتسينالىق جانە اپاتتان قۇتقارۋ ورتالىعىنىڭ قىزمەتكەرلەرى زارداپ شەككەندەرگە مەديتسينالىق جانە پسيحولوگيالىق كومەك كورسەتتى.
قازىرگى ۋاقىتتا زارداپ شەككەندەر تۋرالى اقپارات ناقتىلانۋدا. ءورتتىڭ الدىن الا اۋماعى 300 شارشى مەتردى قۇرادى. ءورت ءسوندىرىلدى, ال ونىڭ سەبەپتەرى انىقتالۋدا. وقيعا ورنىندا توتەنشە جاعدايلار قىزمەتىنىڭ ماماندارى جۇمىسىن جالعاستىرۋدا.