بيىلعى ماۋسىمدا ەڭ كوپ ەيس جاساعان تەننيسشىلەردىڭ ءتىزىمىن چجەن تسينۆەن باستاپ تۇر. 22 جاستاعى قىتايدىڭ وكىلى 445 رەت سوققىسىن دىتتەگەن جەرىنە ءدوپ تۇسىرگەن ەكەن. ەكىنشى ورىندا – ەلەنا رىباكينا. ەلىمىزدىڭ ەڭ ۇزدىك ويىنشىسى 358 ەيس جاسادى. ودان كەيىنگى ساتىلارعا بەلارۋستىك ارينا سوبولەنكو (307 ەيس), رەسەيلىك ەكاتەرينا الەكساندروۆا (284), يسپانيالىق پاۋلا بادوسا (265) جايعاستى.
مانەرلەپ سىرعاناۋشى ميحايل شايدوروۆ گران-پري تۋرنيرلەر سەرياسىنىڭ فينالىنا جولداما الدى. «شىنىمدى ايتسام, وسىنداي ءدۇبىرلى دوداعا قاتىساتىن ەلىمىزدىڭ تۇڭعىش سپورتشىسى ەكەنىمدى ءالى دە سەزىنە الماي وتىرمىن. مەن ءۇشىن بۇل – كەرەمەت جاڭالىق», دەيدى جەرلەسىمىز. اتالعان جارىس 5–8 جەلتوقسان ارالىعىندا فرانتسيادا وتەدى.
30 قاراشا مەن 1 جەلتوقساندا الماتىداعى «شىمبۇلاق» تاۋ شاڭعىسى كۋرورتىندا سكي-الپينيزمنەن ەل چەمپيوناتىنىڭ جالاۋى جەلبىرەيدى. جارىستا الماتى, اقمولا, سولتۇستىك قازاقستان, قاراعاندى, شىعىس قازاقستان وبلىستارى, الماتى, شىمكەنت قالالارىنىڭ سپورتشىلارى باق سىنايدى.
قۇرلىقتىق حوككەي ليگاسىندا (قحل) ونەر كورسەتىپ جۇرگەن استانانىڭ «بارىسى» كەزەكتى تۋر ويىنىن ءنوۆوسىبىر قالاسىندا جەرگىلىكتى «سيبير» كلۋبىنا قارسى وتكىزدى. ماتچ 2:0 ەسەبىمەن رەسەيلىك كوماندانىڭ پايداسىنا شەشىلدى.
حالىقارالىق بوكس قاۋىمداستىعى (IBA) تاياۋ كۇندەرى تايلاندتىڭ چيانگماي قالاسىندا باستالاتىن ازيا چەمپيوناتىنىڭ جۇلدە قورىن جاريالادى. ول 500 000 اقش دوللارىن قۇرايدى. ناقتىلاپ ايتساق, باس جۇلدەنى ولجالاعان بىلعارى قولعاپ شەبەرلەرى 8 000, كۇمىسپەن كۇپتەلگەندەر 4 000, قولاعا قول جەتكىزگەندەر 2 000 دوللاردان الادى. شيرەك فينالعا شىققاندارعا 1 000 دوللار تيەسىلى. ەستەرىڭىزگە سالا كەتەيىك, بۇل جارىستا ەرلەر مەن ايەلدەردى قوسا العاندا 25 جۇلدە جيىنتىعى ساراپقا سالىنادى.
الىپتارمەن ايقاسىپ جۇرگەن ەلىمىزدىڭ تانىمال كاسىپقوي بوكسشىسى يۆان دىچكو 27 جەلتوقساندا الماتىدا ۇيىمداستىرىلاتىن جارىستا ونەر كورسەتەدى. وسىعان دەيىن 14 كەزدەسۋىنىڭ بارلىعىن جەڭىسپەن اياقتاپ, 13 قارسىلاسىن ەسىنەن تاندىرعان 34 جاستاعى بوكسشى ۆيتالي كۋدۋحوۆپەن كۇش سىناسادى. رەسەي بوكسشىسىنىڭ رەكوردى – 9 كەزدەسۋدە 7 جەڭىس, 3 نوكاۋت.
بۇل كۇندەرى شۆەتسيانىڭ حەلسينگبورگ قالاسىندا ۇستەل تەننيسىنەن جاستار اراسىنداعى الەم بىرىنشىلىگى ءوتىپ جاتىر. سول جارىستا باق سىناعان الان قۇرمانعاليەۆ 1/8 فينالعا دەيىن جەتتى. بۇل مەجەدە ول گەرمانيالىق اندرە بەرتەلسمايەردەن 1:4 ەسەبىمەن ۇتىلدى.