بۇگىن استانادا «قازاقستان مەن رەسەي: ەكىجاقتى ىنتىماقتاستىقتى نىعايتۋ» تاقىرىبىندا قازاقستان-رەسەي ساراپشىلىق كەڭەسىنىڭ كەزەكتى وتىرىسى ءوتتى. بۇل تۋرالى ازياتانۋ كافەدراسىنىڭ اعا ساراپشىسى باۋىرجان اۋكەن ءوزىنىڭ الەۋمەتتىك جەلىسىندەگى پاراقشاسىندا جازدى, دەپ حابارلايدى Egemen.kz.
ونىڭ ايتۋىنشا, قازاقستان رەسپۋبليكاسى پرەزيدەنتىنىڭ جانىنداعى قازاقستاندىق ستراتەگيالىق زەرتتەۋلەر ينستيتۋتى (قسزي) جانە ە.م. پريماكوۆ اتىنداعى رعا الەمدىك ەكونوميكا جانە حالىقارالىق قاتىناستار ينستيتۋتى (يمەمو) ۇيىمداستىرعان ءىس-شارا ەكىجاقتى ىنتىماقتاستىقتىڭ وزەكتى ماسەلەلەرىن تالقىلاۋ ءۇشىن ماڭىزدى ساراپتامالىق الاڭعا اينالدى.
«مەملەكەت باسشىسى قازاقستان مەن رەسەي اراسىنداعى حح وڭىرارالىق ىنتىماقتاستىق فورۋمىنىڭ پلەنارلىق وتىرىسىندا اتاپ وتكەندەي, رەسەي ەلىمىزدىڭ سىرتقى ساۋداسىنىڭ 20%-عا جۋىعىن قامتاماسىز ەتەتىن قازاقستاننىڭ ءىرى ساۋدا-ەكونوميكالىق سەرىكتەستەرىنىڭ ءبىرى بولىپ تابىلادى. بۇل ەلىمىزدىڭ ەكونوميكالىق تۇراقتىلىعىن قامتاماسىز ەتۋ ءۇشىن رەسەيمەن ىنتىماقتاستىقتى تەرەڭدەتۋدىڭ ستراتەگيالىق ماڭىزدىلىعىن كورسەتەدى.
كەزدەسۋدە ەكونوميكالىق جانە ەنەرگەتيكالىق ىنتىماقتاستىق, تابيعي رەسۋرستاردى ءتيىمدى پايدالانۋ, كليماتتىق كۇن ءتارتىبى, سونداي-اق ءبىلىم, عىلىم جانە جاستار ساياساتى سالالارىنداعى ءوزارا ءىس-قيمىلدى نىعايتۋ ماسەلەلەرى تالقىلاندى. سونداي-اق جاھاندانۋ, ەكونوميكانى تسيفرلاندىرۋ, ۋربانيزاتسيا جانە بولاشاقتى ستراتەگيالىق بولجاۋ ماسەلەلەرىنە ەرەكشە نازار اۋدارىلدى. تالقىلاۋلار سونىمەن قاتار ەكىجاقتى ديالوگتى ودان ءارى تەرەڭدەتۋگە جانە الداعى كەزدەسۋلەردىڭ كۇن ءتارتىبىن قالىپتاستىرۋعا نەگىز بولدى», دەپ جازدى ول.
ءىس-شاراعا «ەكونوميكالىق زەرتتەۋلەر ينستيتۋتى» اق, مگيمو, «KAZENERGY», «TALAP» قولدانبالى زەرتتەۋلەر ورتالىعى, رف ەبج, «سامۇرىق-قازىنا» اق, استانا حالىقارالىق ۋنيۆەرسيتەتى جانە «التەرناتيۆا» وزەكتى زەرتتەۋلەر ورتالىعى سياقتى ۇيىمداردىڭ وكىلدەرى قاتىستى.
كەزدەسۋ ەكىجاقتى بايلانىستاردى نىعايتۋعا, ولاردى بارلىق نەگىزگى باعىتتار بويىنشا ودان ءارى دامىتۋعا جانە ەاەو اياسىنداعى ۇدەرىستەردى وڭتايلاندىرۋعا ىقپال ەتەتىن قازاقستان مەن رەسەي اراسىنداعى ساراپشىلىق ديالوگتىڭ ماڭىزدىلىعىن راستادى.