ارمان كارىباي ۇلى – اقمولا وبلىسى ششۋچينسك قالاسىنداعى «بولاشاق» شاعىن ورتالىعىندا تاربيەشى. ون ءۇش جىل قاتارىنان بالدىرعاندارمەن ءتىل تابىسىپ, ولاردىڭ جان-جاقتى دامۋىنا ۇلەس قوسىپ كەلەدى.
العاشىندا اتا-انالار ەر ادامنىڭ بالاباقشادا تاربيەشى بولىپ جۇرگەنىن قابىلداي الماپتى. بىراق ۋاقىت وتە كەلە ونىڭ توبىنا ۇل-قىزىن بەرگىسى كەلەتىن اتا-انالار كوبەيگەن.
«بالالاردى تاربيەلەۋ وڭاي ەمەس. سول ءۇشىن بارلىق ىسىڭدە وزىڭە ەسەپ بەرە الاتىنداي مۇقيات بولۋىڭ كەرەك. ويتكەنى ولاردىڭ ارقايسىسىنا جاۋاپ بەرەسىڭ, كوزىڭنەن تاسا قالدىرۋعا بولمايدى. ۇنەمى قاداعالاپ وتىرۋ كەرەك. بىراق ءوز ءىسىڭدى ۇناتساڭ, ونىڭ قيىنشىلىعى دا قىزىق بولىپ كورىنەدى ەمەس پە؟
توپتاعى بالالاردى دارەتحاناعا اپارۋ, قىزداردى كيىندىرۋ جۇمىستارىن كومەكشىم جانار قابىلقىزىنا تاپسىرامىن. جالپى, مەن بۇل جۇمىسقا كەلگەنىمە ەش وكىنبەيمىن. بالالارمەن جۇمىس ىستەگەننەن جۇرت ويلاعانداي جۇيكەم جۇقارمايدى, كەرىسىنشە ولاردىڭ شىنايىلىعىنان شابىت الامىن. جاس ۇرپاقتى تاربيەلەپ, قوعامدى جاقسىلىققا باعىتتاعىم كەلەدى. كوپشىلىكتىڭ ەر تاربيەشىلەرگە تىكسىنە قارايتىنى بەلگىلى. بىراق بۇل قىزمەتتى تەك ايەلدەردىڭ ماماندىعى دەگەن پىكىردى جوققا شىعارعىم كەلەدى», دەيدى ول.
جۇرەك قالاۋىن تاۋىپ, جۇمىسىن «ماماندىقتىڭ تورەسى» دەپ باعالايتىن ارمان اعاي ەڭبەك جولىن بۋراباي اۋدانىنىڭ ۇرىمقاي اۋلىندا باستاۋىش سىنىپ مۇعالىمى قىزمەتىنەن باستاعان. ال تاربيەشىلىك قىزمەتكە كەلۋى كەزدەيسوق بولىپتى.
«مەكتەپتە جۇرگەندە-اق مۇعالىم بولسام دەپ ارماندايتىنمىن. بىراق بالاباقشادا تاربيەشى بولامىن دەپ ەش ويلاعان جوقپىن. وقۋعا قۇجات تاپسىرار ساتتە باستاۋىش سىنىپ مۇعالىمى ماماندىعىن تاڭدادىم. وسىلايشا, 2001 جىلى ششۋچينسك قالاسىنداعى پەداگوگيكالىق كوللەدجىنىڭ باستاۋىش سىنىپ مۇعالىمى ماماندىعىن ءتامامدادىم. قىزىعى سول, «ارمان» مەكتەپتەن تىس وقىتۋ-تاربيەلەۋ ورتالىعىندا قىزمەت ەتىپ جۇرگەنمىن. ول جاقتا 4-5 جاستاعى بالالارعا ارنالعان ءورىستىلدى ستۋديا بار ەدى. ءبىر كۇنى مۇعالىمدەرى كەلمەي قالىپ, مەنى سول بالالارمەن جۇمىس ىستەي تۇرۋعا جىبەردى. مەن بار ىقىلاسىممەن ساباق بەرىپ شىقتىم. سول كەزدە ارىپتەستەرىم بالاقايلارمەن جاقسى ءتىل تابىساتىنىمدى اڭعارىپ, وڭ باعاسىن بەردى. وسىلايشا, ورتالىقتىڭ ديرەكتورى ايگۇل ايتجانقىزى ستۋديانى قازاق تىلىندە دە اشساق دەگەن ۇسىنىسىن ايتتى. مەن بىردەن كەلىستىم. «بولاشاق» دەگەن اتىن دا ءوزىم ۇسىندىم. سودان بەرى وسى ورتالىقتىڭ تاربيەشىسىمىن», دەيدى ول.
ايتا كەتەيىك, ارمان كارىباي ۇلى – اقمولا وبلىسىنداعى مەكتەپكە دەيىنگى مەكەمەلەردە تاربيەشى بولىپ جۇمىس ىستەيتىن جالعىز ەر-ازامات. ول كوپتەگەن بايقاۋدا جۇلدەلى ورىن يەلەنىپ, ءوزىنىڭ بىلىكتى مامان ەكەنىن سان مارتە دالەلدەگەن. «تاربيەشى اعاي» ساباقتى كوبىنە-كوپ ويىن تۇرىندە وتكىزەدى ەكەن. باستاپقىدا ورىسشا شۇلدىرلەپ كەلگەن بالالار وسى جەردە قازاقشانى ۇيرەنىپ, قازاق مەكتەپتەرىنە بارىپ جاتقان كورىنەدى.
بالالار-جاسوسپىرىمدەر شىعارماشىلىق ورتالىعى ديرەكتورىنىڭ مىندەتىن اتقارۋشى ءلاززات ەگەمبەرديەۆانىڭ ايتۋىنشا, بالا تاربيەسىندە ەر ادامنىڭ ءرولى زور.
«تاربيەشى – قيىن دا قىزىقتى ماماندىقتىڭ ءبىرى. وعان اركىمنىڭ جۇرەگى داۋالامايدى. قازىر ەر ادامداردىڭ كوبى جۇمىسباستى. سوندىقتان دا بالا تاربيەسىمەن انالار كوبىرەك اينالىسادى. مەكتەپتە دە وقۋشىلارعا ساباق بەرىپ جۇرگەن مۇعالىمدەردىڭ باسىم كوپشىلىگى – ايەلدەر. بۇل – بالانىڭ مىنەز-قۇلقىنا كەرى اسەر ەتەدى, قىز مىنەزدى جىگىتتەردىڭ كوبەيۋى سونىڭ سالدارى. قازاقتىڭ تۇرمىس-سالتىندا بالا تاربيەسىمەن انالار اينالىسقانىمەن, ەر-ازاماتتىڭ قاس-قاباعى, مىسى, ءبىراۋىز ءسوزى كوپ نارسەنى شەشەدى. ال ەندى وسى سالاعا ءوزىنىڭ قۇلشىنىسىمەن كەلگەن ارمان كارىباي ۇلىنىڭ ەڭبەگى ماقتاۋعا تۇرارلىق. بالالاردى ۇيىمداستىرۋى, قۇندىلىققا نەگىزدەلگەن ساباق وتكىزۋ ءادىسى ءبىزدى ەرەكشە ءتانتى ەتتى», دەيدى ل.ەگەمبەرديەۆا.