ۇكىمەتتە ۆيتسە-پرەمەر سەرىك جۇمانعاريننىڭ توراعالىعىمەن وتكەن جەر رەسۋرستارى ماسەلەلەرى جونىندەگى كوميسسيانىڭ وتىرىسىندا فەرمەرلەردەن جەر ۋچاسكەلەرىن الۋعا بايلانىستى بىرقاتار ماسەلەلەر قارالدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
نەگىزگى ماسەلە — ۋاكىلەتتى ورگاندارعا وسى شەشىمدەردى قابىلداۋ كەزىندە قۇقىقتىق نەگىزدە ارەكەت ەتۋگە مۇمكىندىك بەرەتىن جەردى ادال جانە جوسىقسىز پايدالانۋشىلاردى ايقىنداۋ ءۇشىن قۇقىقتىق بازا قۇرۋ.
ول ءۇشىن وبلىس اكىمدەرىنىڭ ورىنباسارلارى, باس پروكۋراتۋرا, سوت اكىمشىلىگى, سىبايلاس جەمقورلىققا قارسى ءىس-قيمىل اگەنتتىگى, ۇلتتىق ەكونوميكا مينيسترلىگى جانە «اتامەكەن» ۇكپ وكىلدەرى كىرەتىن اۋىل شارۋاشىلىعى ۆيتسە-ءمينيسترىنىڭ توراعالىعىمەن جۇمىس توبى وڭىرلەردە ارنايى كوميسسيالار قۇرۋ جونىندە ۇسىنىستار ازىرلەدى.
بۇل كوميسسيالار بىرقاتار كريتەريلەر نەگىزىندە جەردى پايدالانۋ قۇقىعىن جالعاستىرۋ ماسەلەسىن رەتتەۋمەن اينالىسادى. ولاردىڭ قاتارىندا جەردى نىسانالى ماقساتىنا سايكەس پايدالانۋ, سالىق تولەۋ, ينۆەستيتسيالار تارتۋ, اۋىلدىق اۋماقتاردى دامىتۋ جانە باسقالارى بار.
قازىرگى ۋاقىتتا بارلىق زاڭدى راسىمدەردى ساقتاۋ ءۇشىن اۋىل شارۋاشىلىعى مينيسترلىگىنىڭ ەرەجەسىنە مەملەكەتتىك ورگانعا وسى ارنايى وڭىرلىك كوميسسيانىڭ ۇلگىلىك ەرەجەسى مەن ءىس-قيمىل الگوريتمىن ازىرلەۋ جانە بەكىتۋ بويىنشا قۇزىرەت بەرۋ بولىگىندە وزگەرىستەر ەنگىزىلىپ جاتىر. اشم جۇمىس ىستەپ تۇرعان اۋىل شارۋاشىلىعى وندىرۋشىلەرى ءۇشىن جەر پايدالانۋ قۇقىعىن جالعاستىرۋ ماسەلەسىن رەتتەۋ جونىندەگى وڭىرلىك كوميسسيانىڭ ەرەجەسى مەن ءىس-قيمىل الگوريتمىن ازىرلەيدى.
سونداي-اق وتىرىستا قاراعاندى جانە پاۆلودار وبلىستارىنداعى شەكارالاردىڭ بەلگىلەنۋىنە بايلانىستى, يەلىگىندە قايتالانۋى تۋىنداعان اۋىل شارۋاشىلىعى جەرلەرى يەلەرىنىڭ ماسەلەسى قارالدى. تالقىلاۋ قورىتىندىسى بويىنشا سەرىك جۇمانعارين داۋلى جەرلەردىڭ شىنايى شەكارالارىن انىقتاۋ جانە تۋىنداعان ماسەلەنى شەشۋ ءۇشىن بارلىق مۇراعاتتىق قۇجاتتار مەن كارتوگرافيالىق دەرەكتەردى مۇقيات زەردەلەۋدى تاپسىردى.
«2024 جىلدىڭ باسىنان بەرى 2 ملن گەكتاردان استام اۋىل شارۋاشىلىعى جەرى مەملەكەت مەنشىگىنە قايتارىلدى. قر اشم جەر رەسۋرستارىن باسقارۋ كوميتەتى جەر پايدالانۋشىلارعا قاتىستى 2,8 ملن گا جالپى الاڭدا 1748-دەن استام جوسپاردان تىس تەكسەرۋلەر جۇرگىزدى, ونىڭ ناتيجەلەرى بويىنشا 2,2 ملن گا الاڭدا جەر زاڭناماسىن بۇزۋشىلىقتاردى جويۋ تۋرالى 1342 ۇيعارىم ەنگىزىلدى», دەلىنگەن حابارلامادا.
ايتا كەتەيىك, بۇرىن بەرىلگەن ۇيعارىمدار بويىنشا بيىل 311,3 مىڭ گا الاڭدا اۋىل شارۋاشىلىعى جەرلەرىن يگەرۋ باستالدى. 200,4 مىڭ گا الاڭدا اۋىل شارۋاشىلىعى جەرلەرىن ماجبۇرلەپ الىپ قويۋ بويىنشا سوت تالقىلاۋلارى جۇرگىزىلىپ جاتىر.
بۇدان باسقا, جەردى پايدالانۋ مەن قورعاۋدى, اتاپ ايتقاندا, قر جەر زاڭناماسى سالاسىندا جەرگىلىكتى اتقارۋشى ورگاندار قابىلداعان شەشىمدەردىڭ زاڭدىلىعىن مەملەكەتتىك باقىلاۋ شەڭبەرىندە 368,5 مىڭ گا القاپتا اۋىل شارۋاشىلىعى ماقساتىنداعى جەر ۋچاسكەلەرىن بەرۋ تۋرالى اكىمدىكتەردىڭ 875 زاڭسىز شەشىمى انىقتالعان. ونىڭ ىشىندە 84 شەشىمنىڭ كۇشى جويىلعان.
بارلىق تەكسەرۋلەر ازاماتتاردىڭ وتىنىشتەرى مەن پروكۋراتۋرا ورگاندارىنىڭ ۇسىنىستارى نەگىزىندە جۇرگىزىلگەن.. بۇزۋشىلىقتاردىڭ نەگىزگى سيپاتىنا – جەردى كونكۋرستان تىس بەرۋ, اۋىل شارۋاشىلىعى جەرلەرىن بەرۋ بويىنشا كونكۋرستاردى وتكىزۋ ءتارتىبىن بۇزۋ, ورتاق پايدالانىلاتىن جايىلىمدىق جەرلەردى بولەك جەر پايدالانۋعا بەرۋ جانە باسقالارى جاتادى.