جىل اياعىنا دەيىن ەلوردا مەكتەپتەرىندە جاڭا 5 ينكليۋزيانى قولداۋ كابينەتى اشىلادى. بارلىعى, بۇعان دەيىن ىسكە قوسىلعانداردى ەسەپتەگەندە, ءتيىستى 10 كەڭىستىكتى استاناداعى مەكتەپتە وقيتىن ەرەكشە بالالاردىڭ 10 پايىزى قولدانا الماق.
وقۋ جىلىنا وراي ەسىگىن ايقارا اشقان باس قالاداعى 5 ينكليۋزيا كابينەتى ناتيجەسىندە 150-دەن استام مۇگەدەكتىگى بار بالا قاتارلاستارىمەن بىرگە مەكتەپتە وقىپ جاتىر. جاڭا سيپاتتاعى سىنىپتار بۇعان دەيىن سول جاعالاۋداعى №22 مەكتەپ-گيمنازيادا, №36 ورتا مەكتەپتە, ك.مىڭباەۆ اتىنداعى №59 مەكتەپ-ليتسەيدە, ءا.بوكەيحان اتىنداعى №76 مەكتەپ-ليتسەيدە جانە №97 مەكتەپ-گيمنازياسىندا تابىستى جابدىقتالدى. ەندى مەملەكەتتىك ستاندارتقا ساي, قور مەن ساراپشىلار تاراپىنان جەتىلدىرىلگەن تىڭ ۇلگىدەگى ينكليۋزيا كابينەتتەرى جەلتوقسان ايىندا ەسىل وزەنىنىڭ وڭ جاعاسىنداعى №32, 52, 61, 65, 90 مەكتەپتەردە اشىلماق. وسىلايشا, ەرەكشە قاجەتتىلىگى بار تاعى 238 بالا وي-ساناسىن كەڭەيتىپ, دامۋعا مۇمكىندىك الادى. بارلىق مەكتەپتە ءار بالاعا دەربەس باعدارلاما قاراستىرىلىپ, مۇعالىمدەرگە ءبىر جىل بويى ادىستەمەلىك قولداۋ جاسالادى.
«بارشا تاراپتى استانا قالاسىندا ينكليۋزيانى قولداۋ كابينەتتەرىنىڭ سانىن 10-عا جەتكىزۋگە بەلسەندى اتسالىسۋعا شاقىرامىز. ماسەلەن, ءىرى كومپانيالار قوعامداعى كراۋدفاندينگ باستامالارىنا قوسىلىپ, جارنا جاساۋ ارقىلى قوعام مەن بيزنەس ۇندەستىگىنە قادام جاساي الادى. وسىلايشا بيزنەس وكىلدەرى sk-trust.kz سايتىنداعى QR كود نەمەسە ەسەپشوت دەرەكتەمەسى ارقىلى قايىرىمدىلىق باستامالاردى قولداسا, قۇبا-قۇپ. سايكەسىنشە, كاسىپكەرلەر قوعاممەن بايلانىسىن جاقسارتىپ, الەۋمەتتىك جاۋاپكەرشىلىگىن نىعايتا تۇسەدى. ءارى بۇل قادام قوعامدا قايىرىمدىلىق مادەنيەتىن دامىتۋعا ىقپال ەتەدى», دەيدى «Samruk-Kazyna Trust» كق باس ديرەكتورى الفيا اديەۆا.
سونىمەن قاتار تاياۋدا, رەسپۋبليكا كۇنىنە وراي قور قولداۋىمەن اقمولا وبلىسىنىڭ 4 بىردەي اۋىلىندا ينكليۋزيا بولمەسىنىڭ تۇساۋى كەسىلدى. ءوڭىردىڭ اۋىلدىق جەرلەرىندەگى ەرەكشە بالالاردىڭ ساپالى ءبىلىم الۋىنا جاعداي جاساۋدا ينكليۋزيا كابينەتتەرى ورازاق, قىزىلجار, قارامەندى, ى.التىنسارين اۋىلدارىندا قولدانىسقا بەرىلسە, تاعى بىرەۋىن الداعى ۋاقىتتا كوكشەتاۋ قالاسىندا پايدالانۋعا تاپسىرۋ جوسپارلانىپ وتىر. جالپى سوماسى 87,3 ملن تەڭگەنى قۇرايتىن 5 ينكليۋزيا كابينەتىنىڭ جۇمىسى ناتيجەسىندە كەم دەگەندە مەكتەپكە, بالاباقشاعا باراتىن, ۇيدەن وقىپ كەلگەن مۇگەدەكتىگى بار 120 بالا قامتىلادى.
قور بيىلعى كومپانيالار توبىنداعى ەڭبەك ادامدارىنا ارنالعان كورپوراتيۆتىك شارالاردان تۇسكەن قايىرىمدىلىق قاراجاتىن دا ينكليۋزيا كابينەتتەرىنە باعىتتاماق. ماسەلەن, «Samruk-Kazyna Trust» كق ۇيىمداستىرۋىمەن «سامۇرىق-قازىنا» اق كومپانيالار توبىنىڭ كاسىپورىندارى اراسىندا وتكەن «SK ءازىل Fest» كوڭىلدى تاپقىرلار قايىرىمدىلىق كەشىنەن تۇسكەن قارجىعا كەم دەگەندە ءبىر ينكليۋزيا كابينەتىن اشۋ مەجەلەنىپ وتىر.
الدابەرگەن كەمپىرباي