2026 جىلعى 1 ناۋرىزداعى جاعداي بويىنشا بىرىڭعاي جيناقتاۋشى زەينەتاقى قورىنىڭ (بجزق) زەينەتاقى اكتيۆتەرى 25,9 ترلن تەڭگەنى قۇرادى. 2025 جىلى بۇل كورسەتكىش 12%-عا, ياعني 2,7 ترلن تەڭگەگە ءوستى, دەپ حابارلايدى Egemen.kz.
قور پورتفەلىنىڭ قۇرىلىمىندا تەڭگەلىك اكتيۆتەر 59,6%-دى, ال شەتەل ۆاليۋتاسىنداعى ۇلەس 40,4%-دى قۇرايدى. ينۆەستيتسيالاردىڭ باسىم بولىگى مەملەكەتتىك باعالى قاعازدارعا (43%), كۆازيمەملەكەتتىك سەكتور وبليگاتسيالارىنا (9,2%) جانە ەكىنشى دەڭگەيلى بانكتەر وبليگاتسيالارىنا (2,4%) باعىتتالعان.
2025 جىلى سەناتتىڭ ۇسىنىستارىنان كەيىن ۇلتتىق بانك ينۆەستيتسيالىق ستراتەگيانى جاڭارتتى. اتاپ ايتقاندا, اقش مەملەكەتتىك باعالى قاعازدارىنىڭ ۇلەسى 30%-دان 15%-عا دەيىن قىسقارتىلىپ, اكتسيالار ۇلەسى 30%-عا دەيىن ۇلعايتىلدى. سونىمەن قاتار, ۆاليۋتالىق پورتفەلگە 10% كولەمىندە بالامالى ينۆەستيتسيالار ەنگىزىلدى.
جاڭا قۇرىلىم بويىنشا ۆاليۋتالىق پورتفەل جاھاندىق اكتسيالاردان (30%), دامۋشى نارىق وبليگاتسيالارىنان (25%), كورپوراتيۆتىك وبليگاتسيالاردان (20%), بالامالى قۇرالداردان (10%) جانە دامىعان ەلدەردىڭ مەملەكەتتىك باعالى قاعازدارىنان (15%) تۇرادى. ساراپشىلاردىڭ باعالاۋىنشا, بۇل ءتاسىل پورتفەل كىرىستىلىگىن ارتتىرۋعا مۇمكىندىك بەرەدى.
ەاەو ەلدەرىنىڭ 100 مىڭنان استام ازاماتىنا زەينەتاقى جارناسى تولەندى
2025 جىلدىڭ قورىتىندىسىندا بجزق اكتيۆتەرىنىڭ كىرىستىلىگى 7,43%-دى قۇراپ, ينۆەستيتسيالىق تابىس 1,77 ترلن تەڭگەگە جەتتى. ۇلتتىق بانك الداعى ۋاقىتتا پورتفەلدى ءارتاراپتاندىرۋدى جالعاستىرىپ, ۆاليۋتالىق ۇلەستى 40% دەڭگەيىندە ساقتاۋدى جوسپارلاپ وتىر.
ايتا كەتەيىك, بۇعان دەيىن بجزق زەينەتاقى اكتيۆتەرىن ينۆەستيتسيالىق باسقارۋ بويىنشا invest.enpf.kz بىرىڭعاي اقپاراتتىق ينتەرنەت-پلاتفورماسىن ىسكە قوسقانىن حابارلاعان ەدىك. بۇل ارقىلى ازاماتتار زەينەتاقى اكتيۆتەرىن ينتەرنەت-پلاتفورما ارقىلى باقىلاي الادى.