استانا قالاسىنىڭ ازاماتتىق ىستەر جونىندەگى اۋدانارالىق سوتى 12 ءجۋرناليستىڭ قر مادەنيەت جانە اقپارات مينيسترلىگىنە قاتىستى نورماتيۆتىك-قۇقىقتىق اكتىلەردىڭ تومەندە كورسەتىلگەن بولىكتەرىن زاڭعا قايشى جانە جارامسىز دەپ تانۋ تۋرالى تالاپ قويۋ بويىنشا ءىستى قارادى, دەپ حابارلايدى Egemen.kz.
ء«ىستىڭ ءمان-جايلارىنان 2024 جىلعى 20 تامىزدا جۋرناليستەردى اككرەديتتەۋدىڭ ۇلگىلىك قاعيدالارى بەكىتىلگەنى, ولار قول قويىلعان ساتتەن باستاپ قولدانىسقا ەنگىزىلگەنى كورسەتىلگەن. تالاپكەرلەر بۇيرىق ادىلەت ورگاندارىندا مەملەكەتتىك تىركەۋدەن بۇرىن جانە رەسمي جاريالانعاننان بۇرىن زاڭسىز قولدانىسقا ەنگىزىلگەن دەپ سانايدى. ۇلگىلىك قاعيدالاردا اككرەديتتەلگەن ءجۋرناليستىڭ مىندەتتەرىنىڭ تىزبەسى كوزدەلگەن, ونىڭ ىشىندە اككرەديتتەۋگە ءتيىستى ءوتىنىش كەلىپ تۇسكەن باق-تا عانا تاراتۋ مۇمكىندىگى تۋرالى كورسەتىلگەن. وسى تالاپتاردى ەكى نەمەسە ودان دا كوپ رەت بۇزۋ ءجۋرناليستى تۇراقتى اككرەديتتەۋدەن ايىرۋعا اكەپ سوعادى», دەلىنگەن حابارلامادا.
تالاپكەرلەردىڭ پىكىرىنشە, ۇلگىلىك قاعيدالاردىڭ اتالعان تارماقتارى باسقا باق-تا, ونلاين-پلاتفورمالاردا, ارىپتەستەرىمەن, دوستارىمەن اڭگىمەلەسۋلەردە (چاتتاردا) اقپارات تاراتۋعا بايلانىستى ءسوز بوستاندىعىنا قۇقىقتى شەكتەيدى.
مينيسترلىك شولۋدا بەلگىلى ءبىر باق-پەن ەڭبەك قاتىناسىندا تۇراتىن اككرەديتتەلگەن جۋرناليست ولاردان اككرەديتاتسيا الا وتىرىپ, ەڭبەك مىندەتتەرىن اتقاراتىنىن كورسەتتى. تيىسىنشە, بىرنەشە باق-تا جاريالاناتىن بولسا, ولاردىڭ ارقايسىسىنان اككرەديتاتسيا الۋى كەرەك.
سوت شەشىمىمەن تالاپ قويۋدى قاناعاتتاندىرۋدان باس تارتىلدى.
«سوت قورىتىندىلارى اككرەديتتەۋ قاعيدالارى ءسوز بوستاندىعىنا كونستيتۋتسيالىق قۇقىقتى شەكتەمەيدى, تەك اككرەديتتەلگەن جۋرناليستەردىڭ اقپارات الۋ جانە تاراتۋ ءتارتىبىن رەتتەيدى. بۇل «بۇقارالىق اقپارات قۇرالدارى تۋرالى» زاڭنىڭ 28-بابىنا سايكەس مينيسترلىكتىڭ ءتيىستى قۇزىرەتىمەن بەكىتىلگەن», دەپ حابارلادى سوت.
وسىلايشا, اتالعان باپتا ۋاكىلەتتى ورگان جۋرناليستەردى اككرەديتتەۋدىڭ ۇلگىلىك قاعيدالارىن بەكىتەتىنى انىقتالدى.
سونىمەن قاتار, اككرەديتتەۋ ءراسىمى بارلىق باق جۋرناليستەرىنە تەڭ شارتتاردا اقپارات بەرۋگە باعىتتالعان.
«تالاپ قويۋدىڭ ەكىنشى بولىگى بويىنشا «قۇقىقتىق اكتىلەر تۋرالى» زاڭنىڭ 42-بابىنا سايكەس مينيسترلەردىڭ نورماتيۆتىك قۇقىقتىق بۇيرىقتارى, ەگەر قۇقىقتىق اكتىنىڭ وزىندە وزگەشە كوزدەلمەسە, ولار العاش رەسمي جاريالانعان كۇننەن كەيىن كۇنتىزبەلىك 10 كۇن وتكەن سوڭ قولدانىسقا ەنگىزىلەدى. اتالعان قاعيدالار 2024 جىلعى 20 تامىزدا بەكىتىلدى – ياعني «قۇقىقتىق اكتىلەر تۋرالى» زاڭنىڭ نورمالارىنا سايكەس قولدانىسقا ەنگىزۋدىڭ وزگە مەرزىمى بەلگىلەنگەن», دەپ جازدى سوتتىڭ ءباسپاسوز قىزمەتى.
وسى قاعيدالاردى رەسمي جاريالانعانعا دەيىن قولدانىسقا ەنگىزۋ تالاپكەرلەردىڭ قۇقىقتارىن بۇزبايدى جانە نورماتيۆتىك قۇقىقتىق اكتىنىڭ جارامسىزدىعىنا اكەپ سوقپايدى.
شەشىم زاڭدى كۇشىنە ەنگەن جوق.