جاقىندا ەلىمىزدىڭ ءۇشىنشى مەگاپوليسىندە «ۇلتتىق كيىم – ۇرپاققا مۇرا» دەگەن اتپەن ماڭىزدى فەستيۆال ءوتتى. فەستيۆال قازاقستان حالقى اسسامبلەياسىنىڭ شىمكەنت قالاسىنداعى فيليالىنا قاراستى دوستىق ۇيىندە ۇيىمداستىرىلدى.
مادەني ءىس-شارا اياسىندا كورمە ءوتىپ, وعان جەرگىلىكتى قولونەر شەبەرلەرى مەن ديزاينەرلەرى دايىنداعان ۇلتتىق كيىمدەر مەن زەرگەرلىك بۇيىمدار ۇلگىلەرى قويىلدى. سونداي-اق ەتنوستيلدىك, زاماناۋي ساندىك كيىم ۇلگىلەرىنىڭ كورسەتىلىمى بولدى. ەرەكشە سانمەن تىگىلگەن كيىمدەر جيىنتىعى كوپشىلىككە قاتتى ۇنادى. ەڭ باستىسى, جەرگىلىكتى ديزاينەرلەر كورسەتىلىم ارقىلى جينالعان جۇرتشىلىق ىقىلاسىن وزدەرىنە اۋدارا ءبىلدى.
ۇلتتىق قۇندىلىقتاردى, مادەنيەتتى دارىپتەۋ ماقساتىن كوزدەگەن شىرايلى شاراعا شىمكەنت قالاسى ىشكى ساياسات جانە جاستار ىستەرى جونىندەگى باسقارماسىنىڭ باسشىسى ايگەرىم جۇماعۇلوۆا قاتىستى. سالا باسشىسى قۇتتىقتاۋ سوزىندە ۇلت مادەنيەتى مەن ۇلتتىق قۇندىلىقتاردى تالماي ناسيحاتتاپ جۇرگەن قولونەر شەبەرلەرىنە كوپشىلىك اتىنان ۇلكەن العىس ءبىلدىردى.
«شىمكەنتتە ۇلتتىق كيىم ۇلگىلەرىن تىگەتىن, قازاقتىڭ ويۋ-ورنەگىمەن زەرگەرلىك بۇيىمدار جاسايتىن قولونەر شەبەرلەرى جەتەرلىك. ولارعا بۇگىنگى تاڭدا كەرەگى – قولداۋ مەن ناسيحات. ونەرلى جاندار جاساپ جاتقان ىستەرىنە كوڭىل بولگەندى, ەڭبەكتەرىنىڭ لايىقتى باعاسىن العاندى قالايدى. ءبىزدىڭ ماقساتىمىز – وسىنداي ىسمەرلىك, قولونەرشىلىك ونەرمەن اينالىساتىن ەرەكشە جانداردىڭ جۇمىستارىن, دۇنيەلەرىن ەلگە تانىستىرىپ, جۇرتشىلىققا جاريالاۋ. شىمكەنتتىك شەبەرلەردىڭ, سۋرەتشى-ديزاينەرلەردىڭ تۋىندىلارى تالايدان بەرى كوپتىڭ اۋزىنا ىلىگىپ, تاڭدايلارىن قاقتىرىپ ءجۇر. ەندىگى رەتتە وسىلاردى دارىپتەۋىمىز كەرەك. جەرگىلىكتى حالىق ءوز ونەرپازدارىن ماقتاپ, قولداۋ بىلدىرمەسە ولاردى كىم ناسيحاتتايدى, ولارعا كىم دەمەۋشىلىك تانىتادى. بۇگىنگى تاڭدا جالپىۇلتتىق بىرلىك پەن تاتۋلىق قۇندىلىقتارى ەل ىشىندە ءبىرىنشى ورىنعا شىقتى. ىنتىماق بار جەردە ءبارى دە بولادى. ەلىمىزدىڭ جەتىستىگى سول ىنتىماق پەن بىرلىك جەمىسى. قازىر الەم دۇرلىگىپ تۇر. شيەلەنىستەردىڭ باستى سەبەبىنىڭ ءبىرى قوعامداعى بىرلىك پەن تاتۋلىقتىڭ جوقتىعى. قۇدايعا شۇكىر, ەلىمىز دوستىق پەن ىنتىماقتىڭ ارقاسىندا گۇلدەنىپ, جۇرت قىزىعا قارايتىنداي دارەجەگە جەتتى. ەندى وسى بايلىعىمىزدى ساقتاۋ – بىزدەرگە پارىز», دەدى باسقارما باسشىسى ا.جۇماعۇلوۆا.
فەستيۆال بارىسىندا وزبەكالى جانىبەكوۆ اتىنداعى وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتى جانىنداعى «اق بايان» ءسان تەاترى قازاقتىڭ ۇلتتىق كيىمدەرىنىڭ ەتنوستيلدىك, زاماناۋي ۇلگىلەرىنىڭ توپتاماسىن كورسەتتى. سونىمەن بىرگە جۇرت ا.يسمايلوۆ اتىنداعى كاسىپتىك كوللەدجدىڭ ساندىك كيىمدەرىن تاماشالادى. ودان بولەك جينالعان قاۋىم گ.ەسپاي جەتەكشىلىك ەتەتىن «ارۋ انالاردىڭ» كيىم ۇلگىلەرىن باعالادى. ساندىك كورسەتىلىم بارىسىندا №5 جەڭىل ونەركاسىپ جانە سەرۆيس كوللەدجىنىڭ ديزايىندىق ونەر بۇيىمدارى دا كوپشىلىك كوڭىلىنەن شىقتى. اسىرەسە ءا.قاستەەۆ اتىنداعى ونەر جانە ديزاين كوللەدجىنىڭ «اسىل مۇرا» توپتاماسى قوناقتاردى ەرەكشە اسەرگە بولەدى. تالعامى بيىك ونەر سۇيەر قاۋىم ساندىك كيىمدەر كورسەتىلىمىندە ب.جەتىباەۆا جەتەكشىلىك ەتەتىن «اسىل مۇرا» توپتاماسىنا دا ايرىقشا ءىلتيپات تانىتتى. مۇنان بولەك, فەستيۆالدە ورتالىق ازيا يننوۆاتسيالىق ۋنيۆەرسيتەتىنىڭ ء«سان» توپتاماسىنداعى تاماشا كيىم ۇلگىلەرى جۇرتشىلىق نازارىنا ۇسىنىلدى.
سونىمەن ءىس-شارا قورىتىندىسىندا كاسىبي مامانداردان جاساقتالعان قازىلار القاسى ءو.جانىبەكوۆ اتىنداعى وقمپۋ جانىنداعى «اق بايان» ءسان تەاترى مەن ءبيبىحاديشا جەتىباەۆا باسقاراتىن «اسىل مۇرا» توبىنىڭ ساندىك كيىمدەر توپتاماسىن ۇزدىك دەپ تانىدى. بارلىق قاتىسۋشىلارعا ارنايى ديپلومدار مەن باعالى سىيلىقتار تاپسىرىلدى.
ايتا كەتۋ كەرەك, اتالعان ءىس-شارا قازاقستان حالقى اسسامبلەياسىنىڭ «قازاقتانۋ» جوباسى اياسىندا قولعا الىندى. وسكەلەڭ ۇرپاقتى ۇلتتىق رۋحتا تاربيەلەۋ مەن ۇلتتىق قۇندىلىقتاردى ناسيحاتتاۋ ماقساتىندا اسسامبلەيا تاراپىنان وسى سەكىلدى كوپتەگەن مادەني جوبالار جۇزەگە اسىرىلىپ كەلەدى. سونىڭ ءبىرى رەتىندە بيىل كۇزدە وتكەن «قازاق داستارقانى» فەستيۆالىن اتاپ وتۋگە بولادى.
شىمكەنتتىڭ ەتنومادەني بىرلەستىك مۇشەلەرىنىڭ ايتۋىنشا, قازاقتىڭ سالت-ءداستۇرى مەن ادەت-عۇرپىن ەلىمىزدە ءومىر ءسۇرىپ جاتقان بارشا حالىق ءبىلۋى ءتيىس. تەك ءبىلىپ قانا قويماي, سونىمەن بىرگە شىنايى ومىردە دە ولاردى قولدانۋعا تىرىسۋ قاجەت. ماسەلەن, بۇگىنگى فەستيۆالدى الساق, جۇرتتى ەرەكشە قىزىقتىرعان ەتنوستيلدەگى كيىمدەر تەك ءسان كورسەتىلىمىندە عانا تاماشالانباي, ەلىمىزدىڭ ءاربىر ازاماتى ۇلتتىق ناقىشتاعى مۇنداي كيىمدەردى كۇندەلىكتى تىرشىلىكتە دە كيىپ جۇرسە قانداي جاراسىمدى بولار ەدى.
شىمكەنت