ماڭعىستاۋ وبلىسىندا يتبالىقتاردىڭ قىرىلۋىنا قاتىستى جۇرگىزىلگەن زەرتتەۋدىڭ الدىن الا قورىتىندىسى جاريالاندى. گيدروبيولوگيا جانە ەكولوگيا ينستيتۋتىنىڭ ماماندارى بۇل جاعدايعا ەپيدەميا سەبەپ بولماعانىنا سەنىمدى, - دەپ حابارلايدى Egemen.kz كتك تەلەارناسىنا سىلتەمە جاساپ.
ەكولوگتاردىڭ سوزىنشە, سۋ جانۋارلارى اۋرۋ جۇقتىرعان جاعدايدا ولار جاپپاي ءبىر جەردە ولۋگە ءتيىس ەدى. الايدا ولەكسەلەر ءار جەردەن تابىلعان. سونداي-اق قىرىلعان انالىق يتبالىقتاردىڭ جارتىسىنان كوبى بۋاز ەكەن. بۇل ولاردىڭ تىرشىلىككە بەيىم بولعانىن كورسەتەدى.
ايتا كەتەيىك, كاسپي جاعالاۋىنان قازاننىڭ 27-ءسى مەن 30-ى ارالىعىندا 300-دەن اسا يتبالىق ولەكسەسى تابىلعان. ال وسى اپتانىڭ باسىندا تاعى 121 تەڭىز جانۋارى ءولى تابىلدى. قىرىلعان سۋ جانۋارلارىن زەرتتەۋمەن اينالىسقان اسەل بايمۇقانوۆانىڭ ايتۋىنشا, يتبالىقتار كۇزدە كوبەيۋى ءۇشىن سولتۇستىك كاسپيگە قاراي اۋىسادى. ولار تەڭىزدىڭ وسى بولىگىنە شوعىرلانۋ كەزىندە ولگەن بولسا كەرەك.
- الاڭداتاتىنى, زەرتتەلگەن انالىقتاردىڭ جارتىسىنان كوبى بۋاز بولىپ شىقتى. سونداي-اق سەمىز يتبالىقتار ەكەنى كورىنىپ تۇر. ولاردىڭ ءولىمى تابيعي ەمەس, كەنەتتەن بولعانداي. ءولىمنىڭ سەبەبى ءارتۇرلى بولۋى مۇمكىن: تابيعي (جەر سىلكىنىسى, تابيعي گاز شىعۋى), تەحنوگەندى (تەڭىز ايماقتارىنىڭ لاستانۋى), اۋرۋلار (ەپيدەميالار). ەگەر ەپيدەميا بولسا, يتبالىقتار جاپپاي ءبىر جەردە قىرىلاتىن ەدى, - دەدى گيدروبيولوگيا جانە ەكولوگيا ينستيتۋتىنىڭ ەكولوگى اسەل بايمۇقانوۆا.