تۋريزم جانە سپورت ءمينيسترى ەربول مىرزابوسىنوۆ ەلوردادا البانيا استاناسى تيرانادا كۇرەس تۇرلەرىنەن وتكەن الەم چەمپيوناتىنىڭ جەڭىمپازدارى مەن جۇلدەگەرلەرىن ماراپاتتادى, دەپ جازادى Egemen.kz.
ءىس-شاراعا قازاقستان گرەك-ريم, ەركىن جانە ايەلدەر كۇرەسى فەدەراتسياسىنىڭ پرەزيدەنتى داۋلەت تۇرلىحانوۆ, ەركىن كۇرەستەن ەرەسەكتەر اراسىنداعى جەڭىمپازى نۇرقوجا قايپانوۆ (70 كگ), ەركىن كۇرەستەن 23 جاسقا دەيىنگى پالۋاندار اراسىنداعى الەم چەمپيونى ريزابەك ايتمۇحان (97 كگ), گرەك-ريم كۇرەسىنەن كۇمىس جۇلدەگەر ەرجەت جارىلقاسىن (63 كگ), ايەلدەر كۇرەسىنەن كۇمىس مەدال يەگەرى ءجاميلا باقبەرگەنوۆا (72 كگ) جانە جاتتىقتىرۋشىلار قاتىستى.
«ماڭىزدى جەڭىستەردىڭ ءبىرى رەتىندە نۇرقوجا قايپانوۆتىڭ التىن مەدالىن ەرەكشە اتاپ ءوتۋ كەرەك. سونداي-اق كۇمىس مەدالعا قول جەتكىزگەن ەرجەت جارلىقاسىن مەن ءجاميلا باقبەرگەنوۆا دا مىقتى سپورتشى ەكەنىن دالەلدەدى. ريزابەك ايتمۇحاندى ايىرىقشا اتاپ وتكىم كەلەدى. ول ءبىر جىلدا ەكى جاس ساناتىنداعى الەم چەمپيوناتىندا توپ جارىپ, ءوز سالماعىندا رەكورد ورناتتى. بۇل ونىڭ 2028 جىلى لوس-اندجەلەستە وتەتىن وليمپيادادا ءساتتى ونەر كورسەتۋىنە جول اشادى دەپ سەنەمىن», دەدى ەربول مىرزابوسىنوۆ.
جيىن سوڭىندا تۋريزم جانە سپورت ءمينيسترى ريزابەك ايتمۇحان مەن ەرجەت جارىلقاسىنعا قازاقستان رەسپۋبليكاسىنىڭ ەڭبەك سىڭىرگەن سپورت شەبەرى اتاعىن تابىستادى. وزگە سپورتشىلار مەن جاتتىقتىرۋشىلاردى العىس حاتپەن ماراپاتتادى.