كۇرەڭ قىزىل بەرەت – جاۋىنگەرلىك داڭقتىڭ, باتىلدىق پەن ابىرويدىڭ بەلگىسى. شىمكەنتتىڭ «وردا» پوليگونىندا ارنايى وپەراتسيالار كۇشتەرىنىڭ 29 اسكەري قىزمەتشىسى بىلىكتىلىك سىناعىنان سۇرىنبەي وتكەندىكتەن وسىناۋ مارتەبەگە قول جەتكىزدى. مۇنداي اسكەري باسكيىم كيۋ – تەك مىقتىلاردىڭ قولىنان كەلەتىن ءىس.
و باستا سىناققا 54 ۇمىتكەر قاتىسىپتى. ولاردىڭ بارلىعى – دەنەشىنىقتىرۋ نورماتيۆتەرىن تاپسىرىپ, پسيحولوگيالىق, تەوريالىق تەستىلەۋدەن, سونداي-اق مەديتسينالىق تەكسەرۋدەن وتكەندەر. اسكەري ەمتيحان بارىسىندا ارنايى جاساق قانداي امالدار جاسادى؟ الدىمەن مارش جۇگىرىپ, گازتۇمىلدىرىق كيدى, زالالدى اۋماقپەن 400 مەتر ءجۇرىپ ءوتتى, شارتتى نىسانعا جاسىرىن جىلجىپ باردى, جارالىلاردىڭ قانىن قالاي توقتاتۋدىڭ ادىستەرىن قولداندى, سوسىن جاراقاتتانعانداردى ەۆاكۋاتسيالاۋ بويىنشا ەرەجە-تالاپتاردى ىسكە اسىردى. قارسىلاسپەن اتىس جۇرگىزىپ جاتقاندا وق-دارىلەردى جەتكىزۋ, تاۋلى, سۋلى جەرلەرمەن ءجۇرىپ ءوتۋ كۇردەلى ءىس بولدى. بۇعان قوسا اسكەري قىزمەتشىلەر اتىس قارۋىن قولدانۋدا شەبەرلىگىن كورسەتىپ, قويان-قولتىق توبەلەستە كۇشتىلىگىن بايقاتتى. ءوز كەزەگىندە ەرەكشە كوزگە تۇسكەن جاۋىنگەرلەردى ارنايى وپەراتسيالار كۇشتەرىنىڭ قولباسشىسى پولكوۆنيك ايدوس مىرزاحمەتوۆ ايرىقشا قۇتتىقتادى.
– بۇل – قازاقستان قارۋلى كۇشتەرى تاريحىنداعى العاشقى بىلىكتىلىك سىناعى. سەندەر مىقتى ەرىك-جىگەردى, شىدامدىلىقتى جانە توزىمدىلىكتى كورسەتە وتىرىپ, وسىنداي كۇردەلى جولمەن سىننان وتتىڭدەر. كۇرەڭ قىزىل بەرەت كيۋ قۇقىعىنا لايىق بولۋ كەرەك. بۇگىن اسا كۇردەلى تاپسىرمالاردى ورىنداپ, كەز كەلگەن جاعدايدا ارەكەت ەتە وتىرىپ, العا قويعان ماقساتتارعا قول جەتكىزۋگە بولاتىنىن دالەلدەدىڭدەر, – دەدى ول.
جوسپار بويىنشا ەندى مۇنداي سىناق جىل سايىن وتكىزىلەدى. سونداي-اق بۇل اسا كۇردەلى مىندەتتەردى ورىنداۋ ءۇشىن ارنايى وپەراتسيالار كۇشتەرىنىڭ كاسىبي دايارلانعان اسكەري قىزمەتشىلەرىنىڭ رەزەرۆىن قۇرۋعا مۇمكىندىك بەرەدى.