قاراعاندى وبلىسى ساران قالاسىندا جۇك كولىگىن شىعاراتىن زاۋىت سالىنادى. بۇگىن شانحايدا ۇكىمەت باسشىسى ولجاس بەكتەنوۆتىڭ قاتىسۋىمەن وتكەن دوڭگەلەك ۇستەلدە وسىنداي كەلىسىمگە قول قويىلدى, دەپ جازادى Egemen.kz.
ەندى قازاقستان-قىتاي بىرلەسىپ جۇك كولىگىن شىعاراتىن كاسىپورىن قۇرىلىسىن باستاماق. زاۋىت جۇمىسىن ءساتتى باستاسا 1,5 مىڭ ادامعا جاڭا جۇمىس ورنى اشىلماق.
«بىرلەسكەن كاسىپورىن قۇرۋ تۋرالى كەلىسىمگە قول قويىلدى. «ساران» يندۋستريالىق ايماعىنىڭ بازاسىندا جۇك جانە كوممەرتسيالىق تەحنيكا وندىرەتىن جاڭا زاۋىت سالىنادى. سونداي-اق ءبىز جاڭا دانەكەرلەۋ, كاتافورەز, بوياۋ جانە شاعىن توراپتى قۇراستىرۋ ءۇشىن زاماناۋي جابدىقتار ساتىپ الامىز. جاس ينجەنەرلەر قىتايدا قولدانىلاتىن جاڭا داعدىلاردى يگەرۋ مۇمكىندىگىن يەلەنەدى», دەدى بىرلەسكەن جوبانىڭ جەتەكشىسى ارعۇلان مايقونوۆ.