ش.ايمانوۆ اتىنداعى «قازاقفيلم» كينوستۋدياسى سوڭعى كۇندەرى رىسقۇلوۆ داڭعىلى, 101ب مەكەنجايىندا ورنالاسقان جەر ۋچاسكەسى مەن بۇرىنعى «قازكينو» كەشەنىن ساتۋ تۋرالى تاراپ كەتكەن اقپارات شىندىققا جاناسپايتىنىن مالىمدەدى. قازىرگى ۋاقىتتا ۋچاسكە مەن عيمارات كينوستۋديانىڭ مەنشىگىندە جانە ساتۋعا شىعارىلمايدى, دەپ جازادى Egemen.kz.
اتالعان ۋچاسكەدە اۆاريالىق جاعدايدا تۇرعان عيمارات انىقتالدى. بۇل كينوستۋديا ماماندارىنىڭ بىرنەشە رەت جۇرگىزگەن تەكسەرۋلەرىندە راستالدى. اۋماقتاعى قاۋىپسىزدىكتى قامتاماسىز ەتۋ جانە جازاتايىم جاعدايلاردىڭ الدىن الۋ ماقساتىندا «قازاقفيلم» الماتى قالاسى اكىمدىگىنىڭ وكىلدەرىن تارتا وتىرىپ, كەشەندى ساراپتاما جۇرگىزۋدى باستادى.
«ساراپشىلاردىڭ قورىتىندىسى بويىنشا وسى عيماراتتى قاۋىپسىز پايدالانۋ ءۇشىن قاجەتتى شەشىمدەر قابىلدانادى. جەر ۋچاسكەسى مەن كەشەندى ساتۋ تۋرالى بارلىق اقپارات جالعان. بۇل جالعان اقپارات ءارى قاراي تارالعان جاعدايدا سوتقا جۇگىنۋگە قۇقىعىمىز بار.
«قازاقفيلم» كينوستۋدياسىنىڭ اۋماعىنداعى وتكىزۋ رەجيمىنىڭ قاتاڭداتىلۋى تۋرالى حابارلامالار دا شىندىققا جاناسپايدى. قولدانىستاعى وتكىزۋ جۇيەسى قىزمەتكەرلەردىڭ قاۋىپسىزدىگىن قامتاماسىز ەتۋگە جانە كينوستۋديا مۇلكىن قورعاۋعا ارنالعان. مۇنداي شارالار الەمدەگى بارلىق كينوستۋديالاردا قالىپتى تاجىريبە بولىپ سانالادى جانە ۇرلىق, ورتەۋ جانە باسقا دا وقيعالاردىڭ الدىن الۋ ءۇشىن قاجەت. جاقىندا ەنگىزىلگەن قاۋىپسىزدىك شارالارى ستۋديا اۋماعىندا بولعان ءورت پەن قىزمەتكەرلەرگە جاسالعان شابۋىل سياقتى وقيعالارعا جاۋاپ رەتىندە جاسالىپ, ستۋديادا جۇمىس ىستەيتىندەردىڭ بارلىعىن قورعاۋعا باعىتتالعان», دەلىنگەن ۆەدومستۆونىڭ رەسمي دەرەگىندە.
سونىمەن قاتار قازاقفيلم باسشىلىعى كينوجوبالاردى قارجىلاندىرۋ تۋرالى اقپاراتتى ءتۇسىندىرۋدى ءجون كورگەن. 2023 جىلى ۇلتتىق كينونى قولداۋ مەملەكەتتىك ورتالىعى 18 جوبانى وندىرىسكە جىبەرىپ, ولاردىڭ 10-ىن 70%-دان استام قارجىلاندىردى. ونىڭ ىشىندە ەكى جوبا 100% قارجىلاندىرىلدى.
«ال قالعان سەگىز جوبا 50%-دان تومەن قارجىلاندىرۋ الدى, الايدا ولاردىڭ بىرقاتارىنا ارالىق تولەمدەر جاسالدى. كەيبىر جوبالاردى قارجىلاندىرۋدىڭ كەشىگۋى قازىناشىلىق كوميتەتتىڭ كەش قارجى بولۋىمەن بايلانىستى. سونىمەن قاتار, كەشىكتىرىلۋ ەسەپتەردىڭ ۋاقىتىلى تاپسىرىلماۋىمەن دە بايلانىستى, بۇل كەلەسى ترانشتاردى الۋ ءۇشىن قاجەتتى شارت», دەپ مالىمدەدى ۇجىم باسشىلىعى.
«قازاقفيلم» كينوستۋدياسى جالعان اقپارات تاراتۋ قازاقستان رەسپۋبليكاسىنىڭ زاڭناماسىنا سايكەس جاۋاپكەرشىلىككە اكەلەتىنىن ەسكە سالادى. ۇجىم اقپارات بەرۋدە دالدىكتى ساقتاۋعا شاقىرادى جانە بەدەلىن قورعاۋ, جالعان مالىمەت تاراتقانداردى جاۋاپقا تارتۋ ءۇشىن ءتيىستى ورگاندارعا جۇگىنۋگە قۇقىلى.