قر سىرتقى ىستەر ءمينيسترىنىڭ ورىنباسارى الىبەك قۋانتىروۆ يتاليا رەسپۋبليكاسى سىرتقى ىستەر جانە حالىقارالىق ىنتىماقتاستىق ءمينيسترىنىڭ ورىنباسارى ەدموندو چيريەلليمەن كەلىسسوزدەر وتكىزدى, دەپ حابارلايدى Egemen.kz.
سۇحبات بارىسىندا ەكىجاقتى ىنتىماقتاستىقتىڭ نەگىزگى ماسەلەلەرى, اتاپ ايتقاندا, قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ 2024 جىلعى قاڭتاردا يتالياعا رەسمي ساپارىنىڭ قورىتىندىسى بويىنشا قول جەتكىزىلگەن ۋاعدالاستىقتاردى ىسكە اسىرۋ بارىسى تالقىلاندى.
سونىمەن قاتار تاراپتار «ورتالىق ازيا + يتاليا» ديالوگى اياسىندا, سونداي-اق حالىقارالىق ۇيىمدار الاڭىندا ءوزارا ءىس-قيمىل ماسەلەلەرى بويىنشا پىكىر الماستى.
ءا. قۋانتىروۆ يتاليا قازاقستاننىڭ ەۋروپا وداعىنداعى ەڭ ءىرى ساۋدا ارىپتەسى ەكەنىن حابارلادى. قازاق ديپلوماتى ە. چيريەلليدىڭ ەلوردامىزعا ساپارى اياسىندا وتكەن ەكونوميكالىق جانە ونەركاسىپتىك ىنتىماقتاستىق پەن الماسۋ جونىندەگى قازاقستان-يتاليا ۇكىمەتارالىق جۇمىس توبىنىڭ 9-شى وتىرىسىنىڭ ءساتتى وتكەنىن ريزاشىلىقپەن اتاپ ءوتتى.
ءوز كەزەگىندە يتاليالىق ديپلومات ءريمنىڭ استانامەن ستراتەگيالىق ارىپتەستىككە ءداستۇرلى تۇردە جوعارى ءمان بەرەتىنىن راستادى. اتاپ ايتقاندا, «Sogesid» كومپانياسىنىڭ ارال تەڭىزى ايماقتارىن الەۋمەتتىك-ەكولوگيالىق جاڭعىرتۋعا باعىتتالعان جوباسى تۋرالى حاباردار ەتتى.
وسىعان وراي سىرتقى ىستەر ءمينيسترىنىڭ ورىنباسارى يتاليالىق تاراپتىڭ اۋىل شارۋاشىلىعى, دەنساۋلىق ساقتاۋ, كولىك, جوعارى ءبىلىم, سۋ رەسۋرستارى جانە ەنەرگەتيكا سالالار بويىنشا جۇمىس توپتارىنىڭ كەزدەسۋلەرىن كوزدەيتىن ورتالىق ازيا مەن يتاليا اراسىندا ءبىلىم الماسۋ جەلىسىن قۇرۋ بويىنشا ءىس-شارالار جوسپارىن ازىرلەۋ جونىندەگى باستاماسىن قۇپتادى.
كەزدەسۋ قورىتىندىسى بويىنشا تاراپتار قازاقستان-يتاليا ستراتەگيالىق ارىپتەستىگىنىڭ بارلىق سپەكترىن نىعايتۋعا باعىتتالعان كوپقىرلى ديالوگتى جالعاستىرۋعا كەلىستى.