مەملەكەت باسشىسى موڭعوليانىڭ ۇلى مەملەكەتتىك حۋرالىنىڭ توراعاسى داشزەگۆين امارباياسگالانمەن كەزدەستى, دەپ جازادى Egemen.kz اقوردا ءباسپاسوز قىزمەتىنە سىلتەمە جاساپ.
قازاقستان پرەزيدەنتى ۇلان-باتىرعا مەملەكەتتىك ساپارى بارىسىندا موڭعوليانىڭ ۇلى مەملەكەتتىك حۋرالىنىڭ توراعاسى داشزەگۆين امارباياسگالانمەن كەزدەسۋ وتكىزدى.
مەملەكەت باسشىسى پرەزيدەنت ۋحنااگين حۋرەلسۋحپەن وتكەن كەلىسسوزدەرگە جوعارى باعا بەرىپ, سونىڭ ناتيجەسىندە مەملەكەتارالىق ىنتىماقتاستىق ستراتەگيالىق سەرىكتەستىك دەڭگەيىنە كوتەرىلگەنىن ايتتى.
قاسىم-جومارت توقاەۆ سپيكەردى جانە بۇكىل موڭعول حالقىن بيىل ماۋسىم ايىندا پارلامەنت سايلاۋىنىڭ تابىستى وتۋىمەن قۇتتىقتادى. پرەزيدەنت حۋرالدىڭ جاڭا قۇرامى ەلدەگى دەموكراتيالىق ۇدەرىستەردىڭ دامۋىنا ەلەۋلى ۇلەس قوسىپ, موڭعوليانىڭ حالىقارالىق ارەناداعى ابىروي-بەدەلىن ارتتىرۋعا وڭ ىقپال ەتەتىنىنە سەنىم ءبىلدىردى.
مەملەكەت باسشىسى زاڭ شىعارۋشى ورگانداردىڭ ديالوگى قازاق-موڭعول قاتىناستارىن ىلگەرىلەتەتىن ماڭىزدى الاڭ دەپ سانايدى. سونداي-اق دەپۋتاتتاردىڭ دوستىق توبى پارلامەنتارالىق بايلانىستاردى نىعايتۋ ىسىندە زور ءرول اتقاراتىنىن جەتكىزدى.
قاسىم-جومارت توقاەۆ حۋرال توراعاسىنا قازاقستانداعى ساياسي جانە ەكونوميكالىق جاڭعىرۋلار جونىندە ايتتى.
ەلىمىزدە قابىلدانىپ جاتقان اۋقىمدى ساياسي شارالار قوعامدا ادىلدىك پەن زاڭ ۇستەمدىگى قاعيداتتارىن ورنىقتىرۋدى كوزدەيدى.
مەملەكەت باسشىسى ەكى ەل قارىم-قاتىناسىندا مادەني-گۋمانيتارلىق ىنتىماقتاستىقتىڭ ورنى ايرىقشا ەكەنىن اتاپ ءوتىپ, الەمدىك جانە ءداستۇرلى دىندەر كوشباسشىلارىنىڭ سەزىنە قولداۋ بىلدىرگەنى ءۇشىن موڭعول تاراپىنا ريزاشىلىق ءبىلدىردى. موڭعولياداعى بۋددا عيباداتحانالارىنىڭ كورنەكتى وكىلدەرى اتالعان فورۋم جۇمىسىنا تۇراقتى تۇردە قاتىسىپ كەلەدى.
مەملەكەت باسشىسى كەلەسى جىلى ۇيىمداستىرىلاتىن VIII سەزد «دىندەر ديالوگى: بولاشاق جولىنداعى سينەرگيا» تاقىرىبىنا ارنالاتىنىن جەتكىزدى. ونىڭ ايتۋىنشا, بەيبىتشىلىك پەن تۇراقتىلىقتى جاقتايتىن قازاقستان مەن موڭعوليا ادامزات الدىنداعى سىن-قاتەرلەردى شەشۋ ءۇشىن كۇش بىرىكتىرە الادى.
موڭعوليا ۇلى مەملەكەتتىك حۋرالىنىڭ توراعاسى زاڭ شىعارۋشى ورگاندار اراسىنداعى بايلانىستى دامىتۋعا جان-جاقتى قولداۋ كورسەتكەنى ءۇشىن قازاقستان پرەزيدەنتىنە العىس ايتتى. داشزەگۆين امارباياسگالان پارلامەنتارالىق ىقپالداستىقتى ودان ءارى نىعايتۋ جانە ەكىجاقتى قاتىناستاردىڭ قۇقىقتىق بازاسىن كەڭەيتۋ ماقساتىندا بىرلەسىپ جۇمىس ىستەۋگە دايىن ەكەنىن راستادى.