بۇگىن (1904-1989) مەملەكەت جانە قوعام قايراتكەرى نۇرتاس ءداندىباي ۇلى وڭداسىنوۆتىڭ تۋعانىنا 120 جىل تولدى, دەپ حابارلايدى Egemen.kz.
ول وڭتۇستىك قازاقستان وبلىسى تۇركىستان اۋدانىندا تۋعان. 1920-1926 جىلدارى تاشكەنتتەگى قازاق مەكتەپ-ينتەرناتىندا تاربيەلەنىپ, تۇركىستان ورمان تەحنيكۋمىندا وقىعان. بك(ب)پ ورتالىق كوميتەتى جانىنداعى جوعارى پارتيا مەكتەبىن بىتىرگەن.
1926-1930 جىلدارى قىزىلوردا وبلىستىق ورمان شارۋاشىلىعى ورمانشىسىنىڭ كومەكشىسى, سۋ شارۋاشىلىعى ءبولىمىنىڭ ءستاتيستى, جامبىلداعى تالاس زەرتتەۋ پارتياسىنىڭ كىشى تەحنيگى, شىمكەنت وبلىستىق سۋ شارۋاشىلىعى ءبولىمىنىڭ تەحنيگى بولعان.
1931-1938 جىلدارى تاشكەنت يرريگاتسيا ينستيتۋتىنىڭ ءبولىم مەڭگەرۋشىسى, كەڭشار ديرەكتورلارىن دايارلايتىن كۋرس ديرەكتورىنىڭ ورىنباسارى, قازاق ورمان شارۋاشىلىعى ترەسى ديرەكتورىنىڭ ورىنباسارى, ديرەكتورى, قازاق كسر جەر حالكوماتى باسقارماسىنىڭ باستىعى, 1938 جىلى شىعىس قازاقستان وبلىستىق اتقارۋ كوميتەتىنىڭ توراعاسى.
1938-1951 جىلدارى قازاق كسر حالىق كوميسسارلار كەڭەسىنىڭ توراعاسى. 1954-1962 جىلدارى قازاق كسر جوعارعى كەڭەسى تورالقاسى توراعاسىنىڭ ورىنباسارى, توراعاسى, گۋرەۆ (اتىراۋ) وبلىستىق اتقارۋ كوميتەتىنىڭ توراعاسى, گۋرەۆ وبلىستىق پارتيا كوميتەتىنىڭ ءبىرىنشى حاتشىسى بولىپ قىزمەت ەتتى.
ۇلتتىق كادرلار دايىنداۋعا زور كوڭىل بولگەن. 1946 جىلى قازاق كسر-ءنىڭ عىلىم اكادەمياسىن قۇرۋعا اتسالىسقان. 1962 جىلدان ماسكەۋدە عىلىمي جۇمىستارمەن اينالىستى. اراب-قازاق, پارسى-قازاق تۇسىنىكتەمە سوزدىكتەرىنىڭ اۆتورى.
ەكى مارتە ەڭبەك قىزىل تۋ, ءۇش مارتە لەنين وردەنىمەن ماراپاتتالعان. تۋعان اۋىلىنا, ونداعى ورتا مەكتەپ پەن كوشەلەرگە ەسىمى بەرىلگەن.
2021 جىلى الماتى قالاسىندا نۇرتاس وڭداسىنوۆقا ەسكەرتكىش ورناتىلدى.