ۇلتتىق مەرەكە - رەسپۋبليكا كۇنىنە وراي قاراعاندى قالاسىنىڭ تۋتۇعىر الاڭىندا «قىران ەلىم — قازاقستان» اتتى پاتريوتتىق اكتسيا ءوتتى. ءۇش مىڭنان اسا قاراعاندىلىق مەملەكەتتىك ءانۇرانىمىزدى اسقاقتاتا شىرقادى, دەپ جازادى Egemen.kz.
سالتاناتتى ءىس-شاراعا قاراعاندى وبلىسىنىڭ اكىمى ەرماعانبەت بولەكپاەۆ قاتىسىپ, جيىلعان جۇرتتى ايتۋلى مەيراممەن قۇتتىقتادى.
«قىمباتتى قاۋىم, قادىرلى جەرلەستەر! بارشاڭىزدى رەسپۋبليكا كۇنىمەن قۇتتىقتايمىن. بۇل ەلىمىزدىڭ بىرەگەي ۇلتتىق مەيرامى. تاۋەلسىزدىكتىڭ باستاۋى. ەگەمەندىك جىلدارىنداعى تالاي قيىندىقتى بىرگە ەڭسەردىك. ءبىز بىرلىگى بەكەم ادىلەتتى قازاقستاندى بىرگە قۇرامىز. ەلگە جاناشىر ءار سانالى ازامات ءوز ۇلەسىن قوسۋ كەرەك. ورتاق ماقسات, ءبىر مۇددەگە ساي ارەكەت ەتسەك, رەسپۋبليكامىزدىڭ كەلەشەگى كەمەل, بولاشاعى جارقىن. قازاقستاننىڭ كوك تۋى بيىكتە جەلبىرەپ, ءانۇرانىمىز جەر-جەردە شىرقالىپ جاتىر. بۇل اتا بابا اڭساپ وتكەن ەگەمەندىكتىڭ ارقاسى. ەندەشە ەگەمەندىگىمىزدىڭ قادىرىن ءتۇسىنىپ, تاۋەلسىزدىكتى نىعايتۋعا اتسالىسايىق», دەدى ايماق باسشىسى.
اكتسياعا مۇنىمەن قوسا دەپۋتاتتار, سپورتشىلار, ارداگەرلەر, قوعام قايراتكەرلەرى مەن جاستار قاتىستى.مۇنداي ەلدىڭ رۋحىن كوتەرەتىن ءىس-شارا وبلىستىڭ بارلىق قالا, اۋداندارىندا ءوتىپ جاتقانىن ايتا كەتكەنىمىز ءجون.