پرەزيدەنت قاسىم-جومارت توقاەۆ قازان قالاسىندا ءوتىپ جاتقان بريكس-ءتىڭ پلەنارلىق وتىرىسىنىڭ «بريكس پليۋس»/«اۋتريچ» فورماتىندا ءسوز سويلەدى, دەپ حابارلايدى Egemen.kz.
پرەزيدەنت قاسىم-جومارت توقاەۆ سونداي-اق بريكس-ءتىڭ دامۋعا زور الەۋەتى بار ەكەنىن جانە بارلىق قاتىسۋشىلاردىڭ يگىلىگى ءۇشىن ىنتىماقتاستىقتى نىعايتىپ, بىرلەسكەن مۇمكىندىكتەردى ءتيىمدى پايدالانا وتىرىپ, ءارتۇرلى كونتينەنتتەردىڭ مەملەكەتتەرىن بىرىكتىرەتىنىن اتاپ ءوتتى.
«بريكس دامۋ تۇرعىسىنان مول الەۋەتكە يە جانە ءتۇرلى قۇرلىقتاعى مەملەكەتتەردى بىرىكتىرەدى. سونداي-اق ىنتىماقتاستىقتى نىعايتىپ, ورتاق رەسۋرستاردى بارلىق قاتىسۋشىنىڭ يگىلىگىنە ءتيىمدى پايدالانادى. ءوزارا قۇرمەت پەن سەرىكتەستىك, بىرلەسە وركەندەۋ قاعيداتتارىنا نەگىزدەلگەن كەلەشەكتىڭ ىرگەسىن قالاۋعا بريكس-ءتىڭ تاجىريبەسى دە, مۇمكىندىگى دە جەتەدى», دەدى مەملەكەت باسشىسى.
ەسكە سالا كەتەيىك, 22-24 قازان ارالىعىندا قازاندا بريكس-كە مۇشە ەلدەردىڭ ءسامميتى ءوتىپ جاتىر. ءىس-شاراعا ءۇندىستان پرەمەر-ءمينيسترى نارەندرا مودي, وڭتۇستىك افريكا رەسپۋبليكاسىنىڭ پرەزيدەنتى ماتامەلا سيريل رامافوسا, ەفيوپيا پرەمەر-ءمينيسترى ابي احمەد, مىسىر پرەزيدەنتى ابدەل فاتتاح ءال-سيسي, قىتاي توراعاسى سي تسزينپين, تۇركيا پرەزيدەنتى رەجەپ تايىپ ەردوعان سىندى بىرنەشە مەملەكەتتىڭ باسشىلارى قاتىسىپ جاتىر.