مادەنيەت جانە اقپارات مينيسترلىگى مەن « ۇلىتاۋ» ۇلتتىق تاريحي-مادەني جانە تابيعي مۋزەي-قورىعىنىڭ ۇيىمداستىرۋىمەن استانا قالاسىنداعى قر قارۋلى كۇشتەرىنىڭ اسكەري-تاريحي مۋزەيىندە جوشى ۇلىسىنىڭ 800 جىلدىعىنا ارنالعان «التىن وردا (جوشى ۇلىسى) كەزەڭىنىڭ تاريحي-مادەني مۇراسى» تاقىرىبىندا كورمە اشىلدى.
اتالعان ءىس-شارا ەلىمىزدى التىن وردا (جوشى ۇلىسى) يمپەرياسىنىڭ مۇراگەرى رەتىندە جانە سول كەزەڭنىڭ باي تاريحي-مادەني مۇراسىن ساقتاپ وتىرعان مەملەكەت رەتىندە كورسەتۋدى ماقسات ەتەدى.
كورمەگە التىن وردا كەزەڭىنە جاتاتىن كەسەنەلەردىڭ بەزەندىرىلگەن كىرپىشتەرى, سول كەزەڭدەگى تۇلعالاردىڭ بالاۋىز مۇسىندەرى, جوشى حان كەسەنەسىنىڭ قۇبباسى, سارايشىق قالاسىنان تابىلعان قۇمىرالار مەن ىدىس-اياقتار, ورتاعاسىرلىق بىرەگەي مونەتالار, سونداي-اق تاريحي قولجازبالاردىڭ كوشىرمەلەرى, كارتالار مەن كارتينالار, جوشى ۇلىسىنىڭ تاريحىنا قاتىستى كىتاپتار جانە باسقا دا قۇندى جادىگەرلەر قويىلدى.
جيىندا ءسوز العان مادەنيەت جانە اقپارات مينيسترلىگى مادەنيەت كوميتەتى توراعاسىنىڭ ورىنباسارى ايدىن بورانباي ۇلى التىن وردانىڭ تاريحى قازىرگى قازاق مەملەكەتتىلىگىنىڭ جىلناماسىمەن تىعىز بايلانىستى ەكەنىن اتاپ ءوتتى.
«اۋماعى ۇلان-عايىر يمپەريانىڭ نەگىزىن قالاعان جوشى حاننىڭ كەسەنەسى مەن الەمگە ايگىلى بولعان سارايشىق قالاسىنىڭ قازاقستان اۋماعىندا ورنالاسۋى – وسىنىڭ جارقىن دالەلى. اتا-بابالارىمىز قۇرعان قۋاتتى مەملەكەتتىڭ ەكى عاسىردان استام ۋاقىت ەۋرازيانىڭ گەوساياسي جاعدايىنا قاتتى ىقپال ەتىپ وتىرعانىنا تاريحىمىز كۋا بولا الادى. سونداي-اق پرەزيدەنتىمىز قاسىم-جومارت كەمەل ۇلى التىن وردانىڭ تاريحىنا ەرەكشە ءمان بەرىپ جۇرگەنى جانە ونىڭ تاپسىرماسىمەن از ۋاقىتتىڭ ىشىندە ەلىمىزدە مادەنيەت, عىلىم, اقپارات سالالارىندا بىرقاتار ماڭىزدى شارۋالار اتقارىلىپ جاتقانى بەلگىلى. اتاپ ايتساق, جوشى ۇلىسىن زەرتتەيتىن عىلىمي ينستيتۋت قۇرىلىپ, تابىستى ەڭبەك ەتىپ جاتىر. قازاقستاننىڭ 7 تومدىق جاڭا اكادەميالىق تاريحى جازىلىپ, ونىڭ 1-تومى جوشى ۇلىسىنىڭ تاريحىنا ارنالدى. ەلىمىزدىڭ كوپتەگەن قالالارىندا عىلىمي-پراكتيكالىق كونفەرەنتسيالار, سەمينارلار, كونگرەستەر, ارنايى ەكسپەديتسيالار ءوتىپ جاتىر. ۇلىتاۋداعى جوشى حان, دومباۋىل كەسەنەلەرىنە اپاراتىن جولدى سالۋ جۇمىسى اياقتالۋعا جاقىن. التىن وردانىڭ كەزەڭىنە, جوشى حاننىڭ ومىرىنە ارنالعان عىلىمي, ادەبي تۋىندىلار جارىق كورىپ وتىر», دەدى ول.
ءىس-شاراعا « ۇلىتاۋ» ۇلتتىق تاريحي-مادەني جانە تابيعي مۋزەي-قورىعى, «سارايشىق» مەملەكەتتىك تاريحي-مادەني مۋزەي-قورىعى, قاراعاندى وبلىستىق تاريحي-ولكەتانۋ مۋزەيى, قولجازبالار جəنە سيرەك كىتاپتار ۇلتتىق ورتالىعى, قر قارۋلى كۇشتەرىنىڭ اسكەري-تاريحي جانە «قازاقمىس» كورپوراتسياسىنىڭ ق.ساتباەۆ اتىنداعى تاريحي-وندىرىستىك مۋزەيلەرى قاتىستى.
ايتا كەتەيىك, قازىرگى ۋاقىتتا « ۇلىتاۋ» ۇلتتىق تاريحي-مادەني جانە تابيعي مۋزەي-قورىعىنىڭ اۋماعىندا التىن وردا داۋىرىنە جاتاتىن وننان اسا تاريحي ەسكەرتكىشتەر ساقتالعان. اتاپ ايتساق, جوشى حان, بولعان انا, قۇلان انا, اياققامىر (قۇتلىق تەمىر), تالماس اتا, كەلىنتام كەسەنەلەرى, ەدىگە مازارى, التىنشوقى توبەسى جانە باسقالارى بار.