ۇلتتىق كىتاپ كۇنى مەرەكەسىنە وراي مادەنيەت جانە اقپارات مينيسترلىگى «ۇلتتىق كىتاپ» بايقاۋىن جاريالايدى.
اتالعان بايقاۋ كىتاپ وقۋ مادەنيەتىن قالىپتاستىرۋ, ۇزدىك اۆتورلاردى انىقتاپ, قازاق ادەبيەتىنىڭ, رۋحانياتىنىڭ دامۋىنا ىقپال ەتىپ, اۋدارماشىلاردى, باسپاگەرلەر مەن كىتاپ ديزاينەرلەرىن قولداۋ جانە ىنتالاندىرۋ ماقساتىن كوزدەيدى.
جۇلدەدەن ءۇمىتتى جۇمىستار 2025 جىلعى 15 قاڭتار – 1 ءساۋىر ارالىعىندا قابىلدانادى. كونكۋرسقا كەيىنگى ەكى جىلدا جارىق كورگەن تۋىندىلار عانا قاتىسا الادى. قابىلداۋ مەرزىمى اياقتالعاننان كەيىن تۇسكەن جۇمىستار تىركەلمەيدى.
بايقاۋدا 10 اتالىم بار: «بالالارعا ارنالعان ۇزدىك كىتاپ», «ۇزدىك كوميكس», «نون فيكشن باعىتىنداعى ۇزدىك كىتاپ», «دەتەكتيۆ جانرىنداعى ۇزدىك كىتاپ», «ساتيرا جانرىنداعى ۇزدىك كىتاپ», «ۇزدىك يلليۋستراتسيالىق كىتاپ», «ۇزدىك اۋدارما كىتابى», «فانتاستيكا جانرىنداعى ۇزدىك كىتاپ», «ۇزدىك باسپا», «جىل كىتابى» (گران-پري سىيلىعى).
دوداعا قاتىساتىن جۇمىس كوركەمدىك دەڭگەيى, ءتىل تازالىعى, سوزدىك قورى, وزىندىك ستيل, تاقىرىپ وزەكتىلىگى, مازمۇن تەرەڭدىگى, تاريحي ادىلدىگى, وندىرىستىك ساپانىڭ جوعارى بولۋى, ديزاينەرلىك جۇمىستىڭ ەرەكشەلىگى سياقتى تالاپتارعا ساي كەلۋى كەرەك.
ايتا كەتسەك, ەلىمىزدە ۇكىمەت قاۋلىسىمەن 23 ءساۋىر «ۇلتتىق كىتاپ كۇنى» مەرەكەسى بولىپ بەكىتىلدى. بۇل مەرەكەلىك داتا مەملەكەت باسشىسىنىڭ قوعامدا جوعارى كىتاپ وقۋ مادەنيەتىن قالىپتاستىرۋ ماقساتىندا ءۇشىنشى ۇلتتىق قۇرىلتايدىڭ نەگىزگى وتىرىسىندا بەرگەن تاپسىرماسىمەن ەنگىزىلدى.