قاسىم-جومارت توقاەۆ چەحيانىڭ سىرتقى ىستەر ءمينيسترى يان ليپاۆسكيدى قابىلدادى, دەپ جازادى Egemen.kz.
پرەزيدەنت قاسىم-جومارت توقاەۆ سىرتقى ساياسات ۆەدومستۆوسىنىڭ باسشىسىنا ءىلتيپات بىلدىرە وتىرىپ, قازاقستان مەن چەحيا اراسىندا دوستىق پەن ءوزارا قۇرمەتكە قۇرىلعان كوپجىلدىق ءارى ناتيجەلى ىنتىماقتاستىق قالىپتاسقانىن اتاپ ءوتتى.مەملەكەت باسشىسى ءمينيستردىڭ ساپارى ەكى ەل اراسىنداعى كوپجاقتى قارىم-قاتىناستىڭ نىعايۋىنا تىڭ سەرپىن بەرەتىنىنە سەنىم ءبىلدىردى. ونىڭ ايتۋىنشا, قازاقستان ەۋروپا وداعىنداعى ماڭىزدى سەرىكتەستەرىنىڭ ءبىرى سانالاتىن چەحيامەن تىعىز ىقپالداستىق جاساۋعا بەيىل.پرەزيدەنت ەكى ەلدىڭ ساۋدا جانە ينۆەستيتسيالىق بايلانىستارىن ودان ءارى دامىتۋعا مول مۇمكىندىك بار ەكەنىنە نازار اۋدارىپ, ەلىمىزدىڭ چەح ينۆەستورلارىنا الداعى ۋاقىتتا دا قولداۋ بىلدىرۋگە دايىن ەكەنىن ايتتى.
يان ليپاۆسكي كەزدەسۋگە مۇمكىندىك جاساعانى ءۇشىن مەملەكەت باسشىسىنا ريزاشىلىعىن ءبىلدىرىپ, چەحيا پرەزيدەنتى پەتر پاۆەلدىڭ قاسىم-جومارت توقاەۆتى پراگاعا رەسمي ساپارمەن كەلۋگە شاقىرعانىن جەتكىزدى.چەحيا سىرتقى ىستەر ءمينيسترى قارقىندى ەكونوميكالىق بايلانىستار قازاق-چەح ىنتىماقتاستىعىنىڭ نەگىزى سانالاتىنىنا نازار اۋداردى. يان ليپاۆسكي ونەركاسىپ, «جاسىل» دامۋ تالاپتارىنا كوشۋ جانە ەنەرگەتيكا سالالارىن بىرلەسكەن جۇمىستىڭ باسىم باعىتتارى رەتىندە اتاپ ءوتتى.سونىمەن قاتار قاسىم-جومارت توقاەۆ پەن يان ليپاۆسكي وڭىرلىك جانە حالىقارالىق كۇن تارتىبىندەگى ماسەلەلەر جونىندە پىكىر الماستى.كەزدەسۋ سوڭىندا مەملەكەت باسشىسى چەحيا پرەزيدەنتى پەتر پاۆەلگە ىزگى تىلەگىن جەتكىزدى.