2024 جىلدىڭ 14 قازانىندا اقتاۋ تۇرعىنى جەدەل جاردەمگە قوڭىراۋ شالىپ, دەنساۋلىق جاعدايىنا شاعىمدانعان. اقىرى «ناۋقاس» 80 مىڭ تەڭگە كولەمىندە ايىپپۇل تولەۋگە ءماجبۇر بولدى, دەپ حابارلايدى Egemen.kz.
انىقتالعانداي, جەرگىلىكتى تۇرعىن ارنايى قىزمەتكە كوپ كولەمدە ءدارى-دارمەك قابىلداعانىن ايتىپ قوڭىراۋ شالعان. الايدا جەدەل جاردەم بريگاداسى شاقىرتۋعا بارعاندا, ەر ادام مۇنىڭ «پرانك» ەكەنىن ايتقان. ماڭعىستاۋ وبلىستىق جەدەل جانە شۇعىل مەديتسينالىق كومەك ستانتسياسىنىڭ ءباسپاسوز قىزمەتى بۇل فاكتىنى راستادى.
«شاقىرتۋ جالعان قوڭىراۋ ەسەبىندە تىركەلىپ, اقتاۋ قالاسىنىڭ تۇرعىنىنا قر اكىمشىلىك قۇقىق بۇزۋشىلىق تۋرالى كودەكسىنىڭ 438-بابى بويىنشا ارناۋلى قىزمەتتەردى كورىنەۋ جالعان شاقىرتۋ بويىنشا 80 000 تەڭگە كولەمىندە ايىپپۇل سالىندى», دەلىنگەن حابارلامادا.