بۇل كۇندەرى بارشا قازاق جانكۇيەرلەرى 19 قازاندا اقش-تىڭ لاس-ۆەگاس قالاسىندا وتەتىن UFC Fight Night 245 ءتۋرنيرىن تاعاتسىزدانا كۇتىپ وتىر. سول كەشتە اسا جەڭىل سالماقتاعى اسۋ الماباەۆ برازيليا سپورتشىسى ماتەۋس نيكولاۋمەن كۇش سىناسادى.
30 جاستاعى اسۋدىڭ الەمدەگى ەڭ بەلدى پروموۋشەندە ونەر كورسەتىپ جۇرگەنىنە ءبىر جىلدان ەندى عانا استى. سوعان قاراماستان جامبىل وبلىسىنىڭ تۋماسى ءوزىنىڭ ورەلى ونەرىمەن جانكۇيەرلەر جۇرەگىن جاۋلادى. 2023 جىلدىڭ 5 تامىزىندا ول يامايكالىق ودي وسبورندى قىلعىندىرىپ تاستاسا, بيىل اقش-تىڭ قوس ءاپايتوسى – سي-دجەي ۆەيگارا مەن حوسە دجونسوندى جەڭدى. بۇل باسەكەلەردە تورەشىلەردىڭ بارلىعى دا الماباەۆتىڭ مىقتىلىعىن ءبىراۋىزدان مويىندادى. وسى جەڭىستەرىنىڭ ارقاسىندا قانداسىمىز UFC رەيتينگىندە 14 ورىنعا كوتەرىلدى. ال ساناۋلى كۇندەردەن كەيىن ول ءوزىنىڭ العاشقى رەيتينگتىك جەكپە-جەگىن وتكىزەدى. ەگەر اسۋ وسى قارسىلاسىن ۇتسا, وندا قازاق فايتەرىن توپ-10-دىقتىڭ قاتارىنان كورىپ قالۋىمىز ابدەن مۇمكىن.
ماتەۋس نيكولاۋدىڭ جاسى 31-دە. برازيليانىڭ ميناس-جەرايس ايماعىندا دۇنيەگە كەلگەن ول 2010 جىلدان بەرى ارالاس جەكپە-جەكپەن اينالىسادى. سول ارالىقتا 27 رەت وكتاگونعا شىعىپ, 21 قارسىلاسىن قاپى قالدىردى. ءوز باسەكەلەرىنىڭ تەڭ جارتىسىنان استامىن «زۇلپىقار» (اسۋدىڭ جاناما ەسىمى – رەد.) مەرزىمىنەن بۇرىن اياقتادى. بەس رەت ۇتىلىپ, تاعى ءبىر ايقاستا تەڭ ناتيجە تىركەلدى. ماتتەۋستىڭ UFC-دە كۇش سىناسىپ جۇرگەنىنە 10 جىلعا جۋىقتادى. العاشىندا ول ىرىكتەۋ تۋرنيرىنەن ىركىلمەي ءوتتى. پروموۋشەننىڭ نەگىزگى جارىسىنداعى تۇساۋكەسەر كەزدەسۋىن برازيليالىق 2015 جىلدىڭ 7 قاراشاسىندا برۋنو كورەيراعا قارسى وتكىزىپ, ءوز وتانداسىن «جاپون گالستۋگى» دەپ اتالاتىن ادىسكە سالىپ, «ۇيىقتاتىپ» تاستادى. ودان كەيىن دجون ماراگا, لۋيس سمولكا, الدان دوس سانتوس, فەليپە ەفرەين, مانەل كاپە, تيم ەليوت, داۆيد دۆوراك, مەتت شمەلدى ۇتتى. بىراق داتسين ورتيز, برەندون رويۆال, الەكس پەرەز سىندى ساڭلاقتارعا ماتتەۋستىڭ ءالى جەتپەدى.
قالاي دەسەك تە, نيكولاۋدىڭ وتە قاۋىپتى قارسىلاس ەكەنىن مويىنداۋعا ءتيىسپىز. ول ۇرىپ تا قۇلاتا الادى, سابميشن ادىستەرىن دە ءساتتى قولدانا بىلەدى. ءيا, برازيليالىقتىڭ سوڭعى ەكى جەكپە-جەگىندە ويسىراي ۇتىلعانى راس. ەكى رەتىندە دە نوكاۋتقا ءتۇستى. دەسەك تە, ماتتەۋستىڭ مول تاجىريبەسى بارىن دا ەستەن شىعارمايىق. ول شەگىنۋدى بىلمەيتىن جۇرەكتى جىگىت, تەحنيكالىق ارسەنالى دا مول. گرەپپلينگى وتە جاقسى, سوققىلارى دا جويقىن. UFC رەيتينگىندە وڭتۇستىك امەريكانىڭ وعىلانى قازاق فايتەرىنەن باقانداي جەتى ساتى جوعارى تۇر. سوندىقتان دا اسۋ الماباەۆقا الداعى جارىسقا ساقاداي ساي دايىندىقپەن كەلۋ كەرەك.