وركەنيەتتىڭ ءبىزدىڭ زامانىمىزعا دەيىنگى II-V عاسىرلاردا-اق دامىعانىن سان رەت جازدىق. باسقاسىن ايتپاعاندا, ساق زامانىندا ءسان ءۇشىن تاققان ميكرو مونشاقتاردىڭ ءوزى قانداي؟ ساق ايەلدەرىنىڭ سانگە كوڭىل بولگەنىنە بەرەل جازىعىنداعى 81-قورعاننان تابىلعان سۇيەك تاراق تا دالەل.
كونە قوڭىر تاراقتىڭ بالەندەي بەزەندىرىلگەن ويۋ-ورنەگى, تاڭبا, بەلگىسى جوق. ايەل ادامنىڭ تۇتىنعان تۇرمىستىق زاتى ەكەنى تۇسىنىكتى. جالپى, قازبا جۇمىسى ناتيجەسىندە قارۋ-جاراقتان بولەك ايەل زاتىنا تيەسىلى كوپتەگەن جادىگەر شىققان. بۇگىنگى كۇنگە دەيىن جۇزدەرى كەرتىلمەي, سۇيەك تاراقتىڭ قاز قالپىندا ساقتالعانى قايران قالدىرادى. جادىگەرگە زەر سالساق, تىستەرى ۇزىنشا, 4-5 سانتيمەتر. تاراقتىڭ جالپى ۇزىندىعى – 9,5 سانتيمەتر بولسا, ەنى – 7 سانتيمەتر. ءپىشىنى تراپەتسيا ءتارىزدى, ۇستىڭگى جاعىندا تەسىگى بار. تىستەرىنىڭ سانى – 15 دانا.
سۇيەك بۇيىم 2016 جىلى بەلگىلى ارحەولوگ زەينوللا ساماشەۆتىڭ جەتەكشىلىگىمەن جۇرگىزىلگەن قازبا جۇمىستارىنىڭ ناتيجەسىندە بەرەل جازىعىنان تابىلعان. قۇندى جادىگەر بۇگىنگى تاڭدا بەرەل قورىق مۋزەيىنىڭ قورىندا تۇر. كەلىمدى-كەتىمدى ساياحاتشىلار مۋزەيدەن كونە تاراقتان باسقا دا قۇندى جادىگەرلەردى كوزبەن كورە الادى.
شىعىس قازاقستان وبلىسى,
بەرەل اۋىلى