كورنەكتى زاڭگەر, پەداگوگ, Maqsut Narikbayev University ديرەكتورلار كەڭەسىنىڭ توراعاسى جانە قۇرمەتتى رەكتورى بولات اجاقاي ۇلى سەمبين دۇنيەدەن ءوتتى, دەپ جازادى Egemen.kz.
بولات سەمبين جامبىل وبلىسى, بايقادام اۋىلىندا دۇنيەگە كەلگەن. 1969 جىلى س.م. كيروۆ اتىنداعى قازمۋ-ءدىڭ زاڭ فاكۋلتەتىن تامامداعان.
ول ەڭبەك جولىن پروكۋراتۋرا ورگاندارىندا باستاعان. سونىڭ ىشىندە قازاقستان رەسپۋبليكاسىنىڭ باس پروكۋرورىنىڭ ورىنباسارى سياقتى جوعارى لاۋازىمداردى دا اتقارعان.
2000 جىلدان باستاپ ب.سەمبين Maqsut Narikbayev University-دە پروكۋرورلىق قاداعالاۋ جانە قىلمىستىق سوت تورەلىگى بويىنشا دارىستەر وقىپ, تاجىريبەسى مەن ءبىلىمىن ستۋدەنتتەرمەن ءبولىستى.
سونداي-اق, ول Maqsut Narikbayev University ديرەكتورلار كەڭەسىنە توراعالىق ەتۋمەن قاتار, عىلىمي جانە پەداگوگيكالىق قىزمەتىن دە جوعارى دەڭگەيدە ۇيلەستىرە بىلگەن. ب.سەمبين «قازاقستان رەسپۋبليكاسىنداعى پروكۋراتۋرا تۋرالى», «قازاقستان رەسپۋبليكاسىنىڭ سوتتارى جانە سۋديالاردىڭ مارتەبەسى تۋرالى» زاڭداردى ازىرلەۋگە بەلسەنە اتسالىسقان.
«مەملەكەت الدىنداعى سىڭىرگەن ەڭبەگى ءۇشىن بولات اجاقاي ۇلى «قۇرمەت» جانە «قۇرمەت بەلگىسى» وردەندەرىمەن, «قازاقستان رەسپۋبليكاسى پروكۋراتۋراسىنىڭ قۇرمەتتى قىزمەتكەرى» توسبەلگىسىمەن, «3-ءشى سىنىپتى مەملەكەتتىك ادىلەت كەڭەسشىسى» اتاعىمەن, ءبىلىم جانە عىلىم مينيسترلىگىنىڭ «قازاقستان رەسپۋبليكاسىنىڭ جوعارى ءبىلىمىنىڭ قۇرمەتتى قىزمەتكەرى» توسبەلگىسىمەن ماراپاتتالدى. سونداي-اق, «10 جىل استانا» جانە «قازاقستان رەسپۋبليكاسىنىڭ تاۋەلسىزدىگىنە 30 جىل» مەرەيتويلىق مەدالدارىمەن, عىلىم جانە ءبىلىم مينيسترلىگىنىڭ عىلىمدى دامىتۋداعى ەڭبەگى ءۇشىن ءتوس بەلگىسىن يەلەنگەن. تۋىسقاندارى مەن جاقىندارىنىڭ قايعىسىنا ورتاقپىز», دەلىنگەن Maqsut Narikbayev University-ءتى تاراتقان حابارلامادا.