اقمولادا استىق مول

جاز جاۋىندى بولدى. مول ىلعال, جوعارى اگروتەحنيكالىق شارالار القاپتارداعى اقىق ءداننىڭ بىتىك شىعۋىنا اسەرىن تيگىزدى. ۋاقىتپەن ساناس­پاي قاجىرلى ەڭبەك ەتكەن ديقان­دار كوكتەن ءيىپ, جەردەن بەرگەن يگىلىك­تىڭ ءبىر ءدانىن شاشاۋ شىعارماي, قۇت قام­باسىنا قۇيىپ الىپ جاتىر. 4,5 ملن گەكتار ءداندى جانە بۇرشاق داقىل­دارى جينالدى. گەكتار بەرەكەسى ورتا­شا ەسەپپەن 14 تسەنتنەردەن اينال­دى. كەيبىر وزات شارۋاشىلىقتار بار جۇمىسىن وڭتايلى اتقارىپ, ەگىستىك مادەنيەتىن جەتىلدىرۋدىڭ ناتيجەسىندە 60 گەكتاردان ءونىم جيناپ جاتىر.

وڭىردەگى كوشباسشىلار قاتارى­نان ساندىقتاۋ اۋدانىنداعى «ماكسيموۆسكوە», زەرەندى اۋدانىن­داعى «ديقان پليۋس», بۇلاندى اۋدا­نىنداعى «جۋراۆلەۆكا-1» سەرىكتەس­تىكتەرى جەتىپ وتىر. تاعى ءبىر ايتا كەتەرلىگى, وڭىردەگى بىرقاتار ءىرى اۋىل شارۋاشىلىعى قۇرىلىمى ەگىن جيناۋ ناۋقانىن تولىق اياقتادى.

وبلىستىق اۋىل شارۋاشىلىعى جانە جەر قاتىناستارى باسقارماسى­نىڭ باسشىسى كەنەش ءالىمجانوۆتىڭ ايتۋىنا قاراعاندا, جوعارى ناتيجە­گە اۋىل شارۋاشىلىعى قۇرىلىم­دارىنىڭ, مايتالمان مەحا­ني­زاتورلاردىڭ, الدىنان جۇمىس ۇركىپ وتىراتىن وزات كومباينەرلەردىڭ ءبىر جەڭنەن قول, ءبىر جاعادان باس شىعارعان ەڭسەلى ەڭبەكتەرى ارقىلى قول جەتكىزىلىپ وتىر. بۇل ارادا ديقانداردى قولداعان مەملەكەتتىك كومەكتىڭ مول بولعانىن جانە ول دەر كەزىندە كورسەتىلگەنىن ايتا كەتۋ – پارىز.

– اقمولالىق ديقاندار تولىمدى تابىسقا قول جەتكىزە وتىرىپ, ەلى­مىز­­دىڭ ازىق-ت ۇلىك قاۋىپسىزدىگىن نىعاي­­تىپ قانا قويماي, زاماناۋي اگروتەح­­نو­لوگيالاردىڭ مەيلىنشە ءتيىمدى ەكەنىن كورسەتە ءبىلدى. وبلىس ەلىمىزدىڭ ەكونوميكاسى مەن اۋىل شارۋاشىلىعى سالاسىندا ماڭىزدى ءرول اتقارا وتىرىپ, اقىق ءدان ايالاعان, بەرەكەنىڭ باستاۋىندا تۇرعان نەگىزگى ءوڭىردىڭ ساپىنان تابىلا بەرەدى, – دەيدى باسقارما باسشىسى.

ءسوز سوڭىندا كۇزگى دالا جۇمىس­تارىنا 8,9 مىڭ استىق جيناۋ تەحنيكا­سى قاتىسقانىن ايتا كەتەيىك. ءبىر جاق­سى­سى, ونىڭ 4,8 مىڭى – ءونىمدى جۇمىس ىستەيتىن زاماناۋي كومبايندار.

كۇن وڭ قاباق تانىتسا, ەندى بىرەر تاۋلىكتە بەرەكەلى القاپتارداعى جا­ۋاپتى ناۋقان ءبىرجولا اياقتالماق.

اقمولا وبلىسى