وسى ۋاقىتقا دەيىن انا مەن بالانىڭ, وتباسىلىق قۇندىلىقتاردىڭ ماڭىزىن ناسيحاتتاپ, ۇلتتىق ءداستۇردى جاڭعىرتۋعا ۇلەس قوسىپ جۇرگەن «اناعا قۇرمەت» مۋزەيى بيىل العاشقى 10 جىلدىق مەرەيلى بەلەسىن اتاپ ءوتتى.
اناعا ارنالعان العاشقى مۋزەيدىڭ ونجىلدىق مەرەيتويىن لايىقتى اتاپ وتۋگە ۇجىم جان-جاقتى ازىرلەنىپ, ارنايى باعدارلاما, مازمۇندى جوسپار ءتۇزدى. مەرەكەلىك كورمە, شىعارماشىلىق كەزدەسۋ, شەبەرلىك ساباقتارى جانە ارداقتى انالارمەن كەزدەسۋ, سىرلاسۋ سياقتى قىزىقتى جيىندار ۇيىمداستىرىلدى. بۇل ءىس-شارانىڭ ءبارى دە انانىڭ وتباسىنداعى ءرولىن ەرەكشە اتاپ كورسەتۋگە, قوعامداعى مارتەبەسىن ارتتىرۋعا باعىتتالعان. وتباسىندا اياۋلى جار, قوعامدا ايتارى بار, ءتۇرلى سالادا ەڭبەك ەتىپ جۇرگەن ياكي زەينەت جاسىنداعى انالاردىڭ پەرزەنت تاربيەسى, شاڭىراق شاتتىعى تۋرالى پايىمى مەن شىعارماشىلىق تۋىندىلارى قوناقتاردىڭ كوڭىلىنەن شىعىپ, ەستەلىكتەر مەن ەستى اڭگىمەلەردى بولىسەتىن الاڭعا اينالدى.
مۋزەي باسشىلارىنىڭ ايتۋىنشا, «اناعا قۇرمەت» مۋزەيى – تەك انالارعا ارنالعان الەمدە تەڭدەسى جوق جالعىز مۋزەي. الاتاۋدىڭ باۋرايىندا, تازا اۋا مەن تاڭعاجايىپ تابيعات ۇيلەسىم تاپقان, ءتىل جەتپەيتىن سۇلۋلىق پاتشالىعىندا قونىس تەپكەن بىرەگەي ساۋلەت كەشەنى. مۇندا اق جاۋلىعى جاراسقان ابىز انالاردىڭ الۋان ءتۇرلى پورترەتتەرى مەن تۇركى جۇرتىنىڭ ايەلدەرىنە ارنالعان تاقىرىپتىق كورمەنى, تاريحي ارتەفاكت پەن كوركەم ينستاللياتسيالاردى تاماشالاۋعا بولادى. جيىنعا قازاقستاننىڭ حالىق ءارتىسى, ەڭبەك ەرى ءاسانالى ءاشىموۆ, حالىق قاھارمانى, گەنەرال-پولكوۆنيك ءسات توقپاقباەۆ پەن جازۋشى, قازاقستاننىڭ ەڭبەك سىڭىرگەن قايراتكەرى ساۋلە دوسجان قاتىسىپ, اياۋلى انالار مەن ارۋلاردىڭ مارتەبەسىن كوتەرىپ, ەڭبەك ەتىپ جۇرگەن «اناعا قۇرمەت» مۋزەيىنىڭ ۇجىمىنا العىس ايتتى.
مۋزەي قورىندا 500-گە جۋىق قۇندى جادىگەر ساقتالعان. سونىمەن قاتار جاقىندا مۋزەي ىشىنەن «الىپ انادان تۋادى» تاقىرىبىندا ارنايى بۇرىش اشىلدى. وندا ەلگە تانىمال باتىرلار مەن ەڭبەك سىڭىرگەن قايراتكەرلەر, تۇلعالار اناسىنىڭ پورترەتتەرى قويىلادى. ونجىلدىق مەرەكە اياسىندا ءاسانالى ءاشىموۆتىڭ دە اناسىنىڭ كوركەم بەينەسى كورمەنىڭ كوز تارتار بۇيىمدارىنىڭ قاتارىن تولىقتىرىپ, كورنەكى تۇسقا ءىلىندى. ءدال وسى كۇنى مۋزەيگە ەكونوميكا عىلىمدارىنىڭ دوكتورى, بەلگىلى مەملەكەت جانە قوعام قايراتكەرى بەردىبەك ساپارباەۆتىڭ, وليمپيادا چەمپيونى جاقسىلىق ۇشكەمپىروۆتىڭ, تاۋەلسىز قازاقستان كونستيتۋتسياسىنىڭ العاشقى اۆتورلارىنىڭ ءبىرى ناعاشىباي شايكەنوۆتىڭ, تاعى باسقا دا ازاماتتاردىڭ اناسىنىڭ پورترەتى تاپسىرىلدى.
ءىس-شارادا جاڭا ەكسپوناتتار تانىستىرىلدى. انالاردىڭ شىعارماشىلىعىن, ولاردىڭ ءمان-مازمۇنىن تارقاتاتىن جاڭا كوللەكتسيالار توپتاستىرىلدى. سونىمەن قاتار, مۋزەيدە انالار تۋرالى مۋلتيمەديالىق جوبالار مەن ينتەراكتيۆتى ەكسپوزيتسيالار قوسىلاتىنى ءمالىم بولدى. ەكسپوناتتار ارقىلى ءاربىر كەلۋشى انانىڭ سۇيىسپەنشىلىگى مەن مەيىرىمىنىڭ شەكسىزدىگىن سەزىنىپ, تاريح تەرەڭىنە بويلاي الاتىنى ايتىلدى. ەلدەگى جەتەكشى ۋنيۆەرسيتەتتەردىڭ پروفەسسورلارى مەن شەتەلدىك قوناقتار, سونداي-اق وسى مەرەكەلىك ءىس-شاراعا ارنايى وڭتۇستىك كورەيادان كەلگەن سەۋلدەگى «International Mind Education» ينستيتۋتىنىڭ پروفەسسورى دجو گيۋ يۋن باستاعان 50-گە جۋىق ۋنيۆەرسيتەت وكىلى مەن ستۋدەنتتەر «اناعا قۇرمەت» مۋزەيىنىڭ تىنىسىمەن تانىسىپ, ءتانتى بولدى. مۋزەي ۇجىمى كەلگەن مەيماندارمەن الداعى ۋاقىتتا اتقاراتىن قوعامدىق جۇمىس جوسپارىمەن ءبولىستى. «جاڭا الەۋمەتتىك جوبالار مەن باستامالاردى ىسكە اسىرۋدى جوسپارلاپ وتىرمىز. انا مەن بالا ماسەلەسىنە ارنالعان سەمينارلار, ترەنينگتەر مەن اقپاراتتىق سەسسيالار وتكىزىلىپ, جاستارعا انا بولۋدىڭ قادىر-قاسيەتى, وتباسى قۇندىلىقتارى تۋرالى ءبىلىم بەرگىمىز كەلەدى. بۇل ءىس-شارالار جاستاردىڭ ساناسىندا انا بەينەسىن بيىكتەتىپ, ماڭگى ۇمىتىلماستاي ساقتالۋىنا باعىتتالعان. ءتىپتى قىلمىستىق جازاعا تارتىلعان ازاماتتاردىڭ بويىندا ىزگىلىك سەزىمىن وياتۋ ءۇشىن تۇزەتۋ كولونيالارىندا كوشپەلى كورمە ۇيىمداستىرامىز. انالارعا, قىز-كەلىنشەكتەرگە ارنالعان جارىستار مەن ءتۇرلى ويىندار وتكىزۋدى جوسپارلاپ وتىرمىز», دەيدى «اناعا قۇرمەت» مۋزەيىنىڭ ديرەكتورى گۇلنار ءابىش.
الەمنىڭ اجىراماس بولىگى, تىرشىلىكتىڭ باستاۋ-بۇلاعى انانىڭ مەرەي-مارتەبەسىن كوتەرۋ ماقساتىندا ارنايى سالىنعان «اناعا قۇرمەت» مۋزەيىنىڭ باستامالارى – انا مەن بالا, ۇلتتىق ءداستۇر مەن وتباسىلىق قۇندىلىقتاردى دارىپتەۋدىڭ جاڭا كەزەڭىندەگى ايشىقتى مىسال. مەرەيتويدا تۇزىلگەن انانىڭ قوعامداعى ءرولى مەن وتباسى ينستيتۋتىن ساقتاۋعا جانە نىعايتۋعا ارنالعان ىلكىمدى ءىس-شارالار تىزبەگى الداعى ۋاقىتتا دا تولاستاماي, كۇن سايىن اتقارىلا بەرمەك. انا – مەيىرىم شۋاعى, ءومىردىڭ شىراعى, ال مۋزەي – سول شىراقتى سوندىرمەي, ۇرپاقتى اداستىرماي, كەلەشەككە جالعايتىن قاستەرلى امانات مەكەنى.
الماتى