سارىكول قالاسىنىڭ 36 جاستاعى تۇرعىنى پاترۋلدىك پوليتسەيلەردىڭ توقتاۋ تۋرالى تالابىن ەلەمەگەن. كەيىن ەر ادامنىڭ ماس كۇيدە بولعانى جانە جۇرگىزۋشى كۋالىگى بولماعانى بەلگىلى بولعان, دەپ حابارلايدى Egemen.kz.
انىقتالعانداي, ەر ادام كولىكتىڭ الدىڭعى دوڭگەلەگى جارىلعانىنا قاراماستان, باسقا جۇرگىزۋشىلەردىڭ ومىرىنە قاۋىپ توندىرە وتىرىپ, كوشەلەردى ارالاپ جۇرە بەرگەن.
«پوليتسەيلەر ادام شىعىنى مەن اۋىر زارداپتاردىڭ الدىن الىپ, جول قوزعالىسى ەرەجەلەرىن بۇزعان جۇرگىزۋشىنى توقتاتتى. الايدا, ۇستاۋ كەزىندە قۇقىق بۇزۋشى ءوز كولىگى مەن پوليتسيانىڭ قىزمەتتىك كولىگىنە زاقىم كەلتىرگەن. قۇجاتتاردى تەكسەرۋ كەزىندە جۇرگىزۋشىدەن الكوگولدىڭ ءيىسى شىقتى», دەپ حابارلادى قوستاناي وبلىسى ءىىد ءباسپاسوز قىزمەتى.
ەر ادام كولىكتى ماس كۇيىندە جۇرگىزگەنى ءۇشىن 6 جىلعا دەيىن باس بوستاندىعىنان جانە ءومىر بويىنا جۇرگىزۋشى كۋالىگىنەن ايىرىلۋى مۇمكىن.
سونىمەن قاتار پوليتسەيلەردىڭ كولىكتى توقتاتۋ تۋرالى زاڭدى تالاپتارىن ەلەمەگەنى ءۇشىن سوت ونى 15 تاۋلىككە قاماۋعا الۋ تۋرالى ۇكىم شىعارعان. ەر ادام ارنايى ۋاقىتشا ۇستاۋ يزولياتورىنا قامالعان.
ايتا كەتەيىك, جول پوليتسياسىنىڭ مالىمەتىنشە, جىل باسىنان بەرى ماس كۇيىندە كولىك جۇرگىزگەن 1100-دەن استام جۇرگىزۋشى اكىمشىلىك جاۋاپكەرشىلىككە تارتىلعان. كولىك جۇرگىزۋ قۇقىعىنان ايىرىلعان تاعى 66 ماس جۇرگىزۋشىگە قىلمىستىق جازا تاعايىندالعان.